АНУ, Нью-Йорк - Дээрхийн Гэгэээтэн Далай Лам Америкийн Нэгдсэн Улсад (АНУ) хоёр сар орчим эмчилгээ хийлгэснийхээ дараа Энэтхэг рүү буцан залрахаар бэлдэж буйтай холбогдуулан Хойд Америк дахь Төвөдийн нийгэмлэг Америкийн номын нөхдүүдийн хамтаар 17,000 хүний суудалтай талбайг дүүргэн цугларч Дээрхийн Гэгээнтэнд Бат Оршил өргөлөө.
Талбайн тайзны хойморт Бурхан Багш, Жанрайсиг, Цагаан Дарь Эх бурханы машид том шүтээнийг залсан байлаа. Дээрхийн Гэгээнтний сэнтийн хоёр хажуугаар хийдүүдийн одоогийн болон хуучны хамба лам нар сууцгаасан байв. Дээрхийн Гэгээнтэн тайзны зүг морилон сэнтийдээ залрах үеэр уламжлалт хувцас асаасан төвөдийн бүжигчид дуу бүжгийн өргөл өргөн лам хуврагууд бүрээ бишгүүр үлээн хүндэтгэл үзүүлж байв.
Дээрхийн Гэгээтний албан ёсны төлөөлөгч доктор Намжил Чодуп Дээрхийн Гэгээнтнийг хүндэтгэлтэйгээр угтан авч, чин сэтгэл, бат сүжигээр Бат оршил өргөх сайхан боломж олгосонд цугласан олон гүнээ талархаж буйг уламжилав. Цаашлаад тэрбээр Дээрхийн Гэгээнтэнд эмнэлэгийн тусламж үйлчилгээ үзүүлсэн болон халуун дулаанаар хүлээн авч тусалсан бүх хүмүүст талархал илэрхийллээ.
Тайзны өмнөх талбайд 400 орчим төвөд хүүхдүүд Дээрхийн Гэгээнтэнд өлмий бат оршихуйн ерөөл өргөн дуун өргөл өргөлөө. Улмаар унзад лам мандал өргөх уншлагыг тэргүүлэн уншсан юм.
Дээрхийн Гэгээнтэн цугласан олон хандан:
“Өнөөдөр энд цугласан та бүгд Төвөдийн гурван мужийн нэгдмэл байдал, эв нэгдлийг нотлон харууллаа. Төвөдийн соёл уламжлал бол нийт хүн төрөлхтөнд ач тусаа бүрэн дүүрнээр өгч чадахуйц билээ. Бурхан Багш гэгээрэлд хүрснийхээ дараа маш олон айлдвар сургаал айлдсан нь Төвөд болон Гималайн бүс нутагт сайтар хадгалагдан уламжилагдаж ирсэн билээ. Бурхан Багшийн эдгээр айлдвар сургаалууд бол асар их адис жинлав, гүн гүнзгий утгатай юм. Би бага балчир наснаасаа үүнд суралцсаар ирсэн юм.”
“Бурхан Багшийн айлдвар сургаалууд бидний амьдралын зарчимд гүн гүнзгийгээр нөлөөлсөн учраас Төвөдийн ард түмэн одоог хүртэл уламжлан хадгалсаар ирсэн. Ийм цаг үед би 100 гаруй насалж цаашдаа ч хамаг амьтан болоод Төвөдийн ард түмний төлөө үргэлжлүүлэн хичээсээр байх болно.”
“Хятадын коммунист нам Төвөдийн соёл уламжлалыг дорд үзэж болох ч дэлхийн өнцөг булан бүрт бидний уламжлалыг дэмждэг нөхөд олон бий. Бурханы шашны уламжлал зөвхөн Төвөдөд бүрэн эхээрээ уламжлагдан хадгалагдаж байна. Дэлхий даяар тархан суурьшсанаар бидний соёл уламжлалыг илүү олон хүмүүс мэддэг болж байна. Дэлхийн олон орон тэр дундаа Хятадад хүртэл маш олон хүмүүс бурханы шашныг сонирхон судалж байна.”
“Өнөөдөр би та бүхэнд бодь сэтгэлийн увидас хүртээнэ. Бодь сэтгэл бол энгийн мэт боловч асар хүчтэй. Хамаг амьтныг энэрч хайрласан энэрэнгүй сайхан сэтгэлийг хөгжүүлснээр бид бусдыг төдийгүй өөрийн тусыг ч мөн гүйцэлдүүлж чадна. Нэг ёсондоо “Хамаг амьтны тусын тулд би бурханы хутагийг олоё” гэсэн сэтгэлийг төрүүлэх нь бодь сэтгэлийн үндэс юм.”
Дээрхийн Гэгээнтэн Чухаг дээд гуравт аврал итгэл одуулах залбирал болон хамаг амьтан бүгдийг энэрч хайрласан энэрэнгүй сайхан сэтгэлийг төрүүлэх уншлагыг уншин цугласан олныг даган уншихыг хүслээ.
Цаашлаад Дээрхийн Гэгээнтэн:
“Би Бурхан Багшийн айлдвар сургаалыг дагаж мөрдөн түүний нэгэн адил хамаг амьтны тусын тулд бурханы хутагийг олье хэмээн бодь сэтгэлийг анхааран авлагаа болгосоор ирсэн билээ. Та бүхнийг ч бодь сэтгэлийг анхааран авлагаа болгохыг уриалж байна.”
Дээрхийн Гэгээнтэн Бурхан Багш, Дарь Эх, Жанрайсиг, Манзушри, Дамдин Янсан, Манал болон Ловон Бадамажунайн тарнийн аман дамжлагыг хүртээн цугласан олныг тэргүүлэн тарни тус бүрийг уншлаа.
Цаашлаад Дээрхийн Гэгээнтэн:
“Дэлхий дээрх бүх шашны уламжлалд би хүндэтгэлтэй ханддаг. Гэвч эдгээр уламжлалуудаас зөвхөн бурханы шашин л учир шалтгаан, логикт суурилдаг онцлогоороо эрдэмтдийн сонирхолыг ихээхэн татаж байна. Мөн түүнчлэн бурханы шашин дэлхий дээр энх тайвныг бий болгоход маш чухал үүрэгтэй юм.”
“Өнөөдрийн Бат Оршил өргөх ёслолд та бүхэн чин сүсэг, бат итгэлээр оролцож байгаа нь харагдаж байна. Та бүхэн ийн уламжлалаа сайтар хадгалж хамгаалсаар ирсэн нь үнэхээр сайшаалтай хэрэг юм. Цаашдаа ч баяр баясгалантайгаар дээдийн номондоо хичээгээрэй.”
Унзад лам Бат Оршил өргөх ёслолын уншлагыг тэргүүлэн уншиж, зан үйл номын дагуу үргэлжилсэн юм. Бат Оршил өргөх ёслолын төгсгөлд Дээрхийн Гэгээнтэнд мандал өргөлөө.
Хойд Америк дахь Дээрхийн Гэгээтний албан ёсны төлөөлөгч доктор Намжил Чодуп Дээрхийн Гэгээнтний эмнэлэгийн тусламж үйлчилгээтэй холбоотой бүхий л ажлыг машид элгэмсэгээр сайтар зохион байгуулсан Карол болон Сэм Наппи нарт онцгойлон талархал илэрхийлэв. Дээрхийн Гэгээнтэн ч мөн тэдэнд талархал илэрхийлсэн юм. Энэ үеэр цугласан олон алга ташин талархалаа илэрхийлж байлаа.
Зохион байгуулагчдыг төлөөлөн Кунга Таши өнөөдрийн Бат оршил өргөх ёслолыг зохион байгуулахад тусалсан бүх хүмүүст талархал илэрхийлэв.
Дуун өргөлийн дараа унзад лам зориулга ерөөл уншсанаар Бат Оршил өргөх ёслол өндөрлөв. Дээрхийн Гэгээнтэн тайзны урд түр саатан цугласан олны зүг инээмсэглэн мэндчилэхэд олон нийт баясгалантайгаар цагаан торгон хадаг өргөж талархалаа илэрхийлж байлаа.
