Дээрхийн Гэгээнтэн Далай Лам нэг жилийн хугацаанд олон газар ном номлодог ба олон нийтэд лекц яриа ч хийдэг. Энэтхэгт зохион байгуулагдаж буй олон нийтийн яриа болон номлол нь ихэвчлэн үнэ төлбөргүй, нийтэд нээлттэй явагддаг. Харин бусад улс орон дахь номын айлдвар болон олон нийтийн ярианд оролцоход ихэвчлэн тасалбар худалдаж авах шаардлагатай болно. Тасалбарын орлого нь Дээрхийн Гэгээнтний тухайн улс оронд айлчлах зардалд зарцуулагддаг.
Дээрхийн Гэгээнтэн Далай Лам Дарамсала хотын Зүглаг Хан дуганд жилийн хугацаанд хэд хэдэн удаа номын айлдвар айлддаг. Эдгээр номын айлдварыг хятад, солонгос, англи, монгол, япон, вьетнам хэлний албан ёсны орчуулгатайгаар олон нийтэд богино долгионоор цацдаг. Энэтхэгийн өвлийн саруудад Дээрхийн Гэгээнтэн Далай Лам ихэвчлэн Бодьгаяа, эсвэл Өмнөд Энэтхэгт байрладаг Төвөдийн суурингуудад морилж ном номлодог юм.
Дээрхийн Гэгээнтэн Далай Лам ном сургаал айлдахын зэрэгцээ жилд нэлээдгүй олон удаа авшиг (ван) хүртээдэг. Тэдгээрийн дотроос Калачакра буюу Дүйнхорын авшиг томоохонд тооцогдох бөгөөд 2017 оныг хүртэл нийт 34 удаа айлдаад байгаа юм. Гэвч Дээрхийн Гэгээнтэн Далай Лам цаг үргэлж ван авшиг гэхээсээ илүү буддын гүн ухааны тайлбарт номын айлдварт хамрагдаж, буддын гүн ухааныг илүү сайн ойлгож авах нь чухал болохыг онцолдог.
Дээрхийн Гэгээнтэн Далай Лам олон нийтэд илтгэл тавьдаг. Олон нийттэй хийх яриа нь ихэвчилэн нэг цаг орчим үргэлжилдэг ба үүнд асуулт, хариулт багтана. Гадаад айлчлалын үед тавигдсан асуулт, хариултын бичвэрүүд нийтэд ихэд эрэлттэй байдаг.
(Энэтхэгт зохиогдож буй номын айлдварт хамрагдахад хэрэгтэй зөвлөгөө)
