Дээрхийн гэгээн XIV Далай ламын зохиосон
Үнэн үгийн залбирал оршвой
Бурхан, Ном, хуврагийн чуулганы
Их нигүүлсэл дор бишрэн мөргөмүй.
Хэмжээлшгүй эрдмийн цогт далайг эрхшээж,
Бялд өчүүхэн амьтныг ганц хөвгүүн мэт болгоосон
Бурхад, бодисадва, шавь нугууд минь
Бидний үнэний гаслант үг үүнийг болгоогтун.
Орчлонгийн энэлэн зовлон хийгээд
Ойворгон би-д барихуйн хуурмаг жаргалыг үлдэн хөөх
Гэгээрсэн Бурханы төгс сургаал тэргүүтэн
Гэрэлт Замбуутивийн тус амгалангийн цог болон дэлгэртүгэй.
Аяа, номыг баригч мэргэд хийгээд бүтээлч төрөлхтөн нугууд
Арван зүйлийн номын явдлын үйлийг арвитган зохио.
Үл барагдах хатуу муу үйлээр бүрэн мохон
Үе завсаргүй энэлэн буй дорой амьтан нугуудыг
Айлган зовоогч дайн тулаан, өлсгөлөн, өвчин тэргүүтнийг
Амгалан энхийн далай болгон тайтгаруулан зохио.
Тэрчлэн, хар зүгийн харгис зандалчдын
Тэсэшгүй хатуу хэрцгий тамлалд сүйдэж буй
Цаст Төвөдийн орны чин сүжигт түмэн олны
Цус, нулимсаар мэлмэрсэн мөрөн лугаа их зовлонг
Үлэмж нигүүлслийн хүчээрээ
Үтэр түргэн таслан зохио.
Өөдгүй муу сэтгэлийн эрхэнд автан галзуурч
Өөр хийгээд бусдыг хорлон сүйтгэгч
Энэрэн хөөрхийлөлтэй тэдэн мэтийн амьтдын
Эрхбиш буруу, зөвийг ялгах билгийн мэлмий нээгдэж
Нөхөрлөл хийгээд энэрхүйн цогоор
Найрсан амгалан ажрах болтугай.
Уулсын дундах Төвөдийн орноо эрх чөлөөг авчрах гэж
Удаан хүлээсэн чин зүрхний горил хүсэл
Шамдал үгүй биелэн
Шашин, төрийг хослон барихуйн баярын хуримд очих
Сайн хувь бүхнийг
Сааралтгүй түргэн хайрла.
Авран нигүүлсэгч Арьяабал бурхан минь
Авралт шашин ном, бүтээлчин нугууд, ард олон, улс орныхоо төлөө
Элдэв бэрх зовлон эдэлж, амь бие, эд баялгаа зольсон нугуудыг
Энэрэн нигүүлсэж тэтгэн зохио.
Сахин хамгаалагч Арьяабал минь
Сайн номлолт Бурхад, бодисадва нугуудаас
Цастын орныг болгоохыг хүсэн зохио.
Эл залбирлын үр түргэнээ боловсрох болтугай.
Үзэгдэл хоосон чанарт гүн үзлийн шүтэн барилдлага ба
Үлэмж чухаг дээд гурвын их нигүүлсэл хийгээд Үнэн үгийн хүчээр
Хуурмаггүй үйл ба үрийн ид чадлаар
Хувиршгүй чин үнэн залбирал минь саадгүй түргэн бүтэх болтугай
Төвөд эх орондоо энх цагийг авчирч, бурханы сургаал номоо сэргээн, ард нийтээрээ өөрийн эрхээр амьдран суух гэсэн горил хүслийг багтаасан залбирал зохиож өгөхийг Төвөдийн Засгийн газрын албан тушаалтнууд болон лам хувраг, энгийн иргэд санал нэгдэн удаа дараа хүсэмжлэн айлтгасны учирт ийн бүтжээ.
Англи хэлнээс орчуулсан М.Төрмандах
