Нэгдүгээрт, Дээрхийн Гэгээнтэн Далай Лам бие махбодийн хувьд хичнээн таатай байсан ч сэтгэл санаа уйтгар гунигт автсан бол аз жаргалтай байж чадахгүй ба сэтгэл санаа аз жаргалаар дүүрэн бол тав тухгүй байдал таны амар амгаланг эвдэж чадахгүй гэдгийг бусдад ойлгуулахыг хичээдэг. Тэрээр бүх хүн төрөлхтний үнэт зүйлийг энэрэн нигүүлсэх, тэвчээр, хувийн сахилга бат, уучлах чадвар, сэтгэл хангалуун байх гэж тодорхойлдог юм. Хүн төрөлхтөн бүгд тэгш эрхтэй. Бид бүгдээрээ аз жаргалыг хүсдэг, зовохыг хэн ч хүсдэггүй. Ямар нэгэн шашин шүтдэггүй хүмүүс ч энэхүү нийт хүн төрөлхтний үнэт зүйлийн ач холбогдлыг хүлээн зөвшөөрч байна. Өөрсдийн амьдралыг аз жаргалтай болгоход энэ бүхэн бидэнд гарцаагүй хэрэгтэй. Дээрхийн Гэгээнтэн Далай Лам эдгээр үнэт зүйлсийг бүрдүүлэхийн тулд иргэний ёс суртахуун зайлшгүй шаардлагатай гэж үздэг юм. Тэрээр өөртэй нь уулзсан аливаа хүн бүрт энэ үнэт зүйлүүд чухал гэдгийг ухааруулах нь миний гол үүрэг гэж хэлдэг.
Хоёрдугаарт, Дээрхийн Гэгээнтэн Далай Лам буддын хуврага хүний хувьд дэлхийн томоохон шашнуудын бие биенээ харилцан ойлгох ба харилцан зохицох явдлыг сурталчлах нь өөрийн хоёр дахь үүрэг гэж үзжээ. Гүн ухааны үзэл онолын хувьд дэлхийн томоохон шашнууд хоорондоо ялгаатай боловч сайн хүнийг бий болгоход эн тэнцүүгээр нөлөөлж чадах билээ. Тийм учраас бүх шашны, янз бүрийн урсгалууд өөр хоорондоо хүндэтгэлтэй хандаж аль нэг шашны үнэт зүйлийг хүлээн зөвшөөрөх нь тун чухал. Тэрээр "Нэг үнэн, нэг шашин" томъёолол бол зөвхөн хувь хүний хувьд л үнэн болох ба нийгмийн түвшинд “олон үнэн, олон шашин” байх нь зайлшгүй хэмээн үзэж байна.
Гуравдугаарт, Дээрхийн Гэгээнтэн Далай Лам төвөд хүн бөгөөд "Далай Лам" хэмээх алдар зүүсэн тул төвөдүүд түүнд өөрсдийн итгэл найдварыг даатгадаг. Тиймээс түүний гурав дахь үүрэг бол Төвөдийн хэл соёл, мөн эртний Энэтхэгийн их багш нараас дамжсан Наландагийн нандин уламжлалыг хадгалах явдал юм. Тэрээр Төвөдийн хүрээлэн буй байгаль орчныг хамгаалах тал дээр онцгой анхаарал хандуулж буй.
Мөн тэрээр сүүлийн үед Энэтхэгийн залуучуудад эртний Энэтхэгийн оюун ухамсарын талаарх гүн гүнзгий мэдлэгийг таниулах тал дээр үүрэг хүлээн ажиллаж байна. Эртний Энэтхэгийн оюун ухаан хийгээд сэтгэл хөдлөлийн талаарх гүн мэдлэг, сэтгэл оюун ухаанаа засч залруулах арга техник нь өнөөгийн дэлхий дахинд хичнээн чухал болохыг тайлбарлаж буй билээ. Тэрээр өнө эртний учир шалтгаан хийгээд логик, шашнаас ангид иргэний гэх хандлага, эдгээрийн академик судалгааны уламжлалыг орчин үеийн боловсролтой холбох хэрэгтэй хэмээн үзэж буй.
