Дээрхийн Гэгээнтэн Далай Ламын Энэтхэг дэх номын айлдварт суухыг хүсэгчдэд зориулсан тохиромжтой зөвлөгөө
Дээрхийн Гэгээнтэн Далай Ламын Энэтхэгт айлдах номын айлдварын үед та бүхэн дараах зүйлсийг авч ирэх хэрэгтэй. Үүнд доороо дэвсэж суух дэвсгэр, аяга, нарны малгай, богино долгионы фм радио байна. Ном айлдах газарт шалган нэвтрүүлэх хэсгүүд дуганы дэргэд байрлах бөгөөд өөрсдийн авч ирсэн зүйлсээ авсаархан болговол орж, гарахад илүү хялбар байх болно.
Бүртгэл
Энэтхэгт явагдах номын айлдварын үйл ажиллагаа үнэгүй ба олон нийтэд ил тод явагддаг. Дарамсала дахь номын айлдварт суухыг хүсэгчид Маклоёд Ганж-ын “Тibet hotel”-ын дэргэдэх Төвөдийн Аюлгүй Байдлыг Хангах Салбар газрын байранд бүртгүүлнэ. Энд урьдчилан бүртгүүлэх төлбөрт үйлчилгээ байхгүй. Бүртгэл ойролцоогоор номын айлдвар эхлэхээс гурван өдрийн өмнө эхлэх ба номын айлдварын эхний өдөр дуусна. Та бүртгүүлэхдээ паспортын хэмжээний хоёр хувь зургийг паспортын хамт авч ирнэ үү. Мянга мянган хүмүүс номын айлдварт оролцдог тул та бүгдийг хоёроос гурван өдрийн өмнө ирж өөрсдийн байрлах буудал, бусад зүйлсээ тохируулан сонгоорой гэж зөвлөж байна. Ном айлдах цагийн хуваарь нэг, эсвэл хоёр өдрийн өмнөөс товлогдож олон нийтэд зарлагддаг.
Суудал
Түрүүлж ирсэн хүнд илүү аятай тухтай суудал олдох болно. Баруунд зохиогдож буй ихэнхи олон нийтийн арга хэмжээнд суудал болон суудлын дугаар нь бичигдсэн байдаг бол Энэтхэгт ийм үйлчилгээ байхгүй. Энэтхэгт номын айлдварт суухдаа ихэвчилэн газар суудаг. Төвөд ард түмний дунд хэвшил болсон зүйл бол айлдварын эхний өдөр суусан суудал дээрээ тэмдэг тавьдаг ба бусад өдрүүдэд тухайн суудал дээрээ суудаг. Энэхүү уламжлал болсон арга нь нэг нэгэнтэйгээ өдөр болгон суудлын маргаан гаргахаас зайлсхийж байгаа хэрэг юм. Хүмүүс ихэвчилэн нэгээс хоёр өдрийн өмнө ирж өөрсдийн суудлаа авдаг.
Орчуулга
Дээрхийн Гэгээнтэн номын айлдвараа төвөд хэлээр айлдах бөгөөд англи, хинди, монгол, солонгос, вьетнам гэх мэт хэлээр албан ёсны орчуулагчид хөрвүүлдэг. Хэрэв та орчуулга сонсохыг хүсвэл богино долгионы фм радио авч ирэх хэрэгтэй. Чихэвчийг зайлшгүй авч ирэх хэрэгтэй. Учир нь номын айлдварт сууж буй хүмүүсийн олонхид орчуулга хэрэггүй байх тул та чихэвчээр орчуулга сонсох шаардлагатай болно. Радио долгион цацах хэмжээ тухайн газрын нөхцөл байдлаас хамаарах бөгөөд та бүхэн үргэлж долгионоо шалгаарай.
Номын айлдварт зориулсан цай болон өргөл
Номын айлдварт суусан хүн бүрт цайгаар үйлчлэх нь тогтсон уламжлал учраас өөрийн аягаа авч ирэх хэрэгтэй. Номын айлдварын үед лам нарт зэд /мөнгө/ барьдаг. Цай болон өргөлийн зүйлийг ихэвчлэн олон нийтээс цугларсан хандивын мөнгөөр бэлддэг. Та хандив өргөхийг хүсвэл номын айлдвар болж буй газрын ойролцоох албан ёсны байранд хандана уу. Хэр хэмжээний өргөл өргөх нь таны сонголт юм.
Нар болон цаг агаарын хамгаалалт
Дээрхийн Гэгээнтэн Далай Лам номын айлдварын үеэр наранд сууж буй хүмүүст анхаарлаа ихэд хандуулдаг бөгөөд нарнаас өөрсдийгөө хамгаалахыг байнга зөвлөдөг. Мөн бороотой үед шүхэр зайлшгүй хэрэгтэй. Тиймээс малгай эсвэл жижиг шүхрийг цаг агаартаа тохируулан номын айлдварын үед биедээ авч яваарай.
Гутал
Төвөдүүд зарим нь газар суухдаа гутлаа тайлдаггүй, эсвэл суусан хойноо гутлаа тайлдаг. Гутлаа тайлаад сууж байгаа олон хүмүүсийн дундуур барьж алхах нь хүмүүсийн нүүрний өмнө гутлаа аваачиж байгаатай адил байдаг тул ихэнхи хүмүүс ийм зүйлд дургүйцдэг.
