Эх дэлхийн өдөр тохиож буй энэ өдөр, хүн бүр аз жаргалтай амьдрахыг л хүсдэгийг санацгаая. Зөвхөн хүмүүс гэлтгүй амьтад, шувууд, шавьж хүртэл. Бид бүгдээрээ шүтэн барилдаж оршдгоо анхаарах хэрэгтэй. Гайхамшигт оюун ухаан бүхий хүн болохынхоо хувьд бидэнд гайхалтай сайн үйлсийг хийх боломж байдаг ч өнөөдрийн дэлхийн нөхцөл байдал ямар байгааг харвал бид илүү сайныг хийх хэрэгтэй болоод байна . Бидэнд цогц боловсрол буюу бусдын сайн сайхны төлөөх энэрэнгүй сэтгэл бүхий дотоод мөн чанарыг багтаасан сэтгэлийн боловсрол хэрэгтэй байна.
Бидний дэлхий шүтэн барилдаж оршдог. Шинэ шинэ сорилтууд болох цаг агаарын өөрчлөлт бидэнд нөлөөлж байна, мөн түүнчлэн дэлхийн эдийн засаг дахь бидний оролцоо зэргээс үзэхэд хүн төрөлхтөн бүгдээрээ энэ бүхнийг анхаарах хэрэгтэй болж байна. Бид дэлхий нийтийн ашиг сонирхолыг нэн тэргүүнд тавих хэрэгтэй.
Бид шатамхай ашигт малтмалын хэрэглээг бууруулах үүний оронд салхи болон нарны эрчим хүч буюу сэргээгдэх эрчим хүчийг хэрэглэх яаралтай арга хэмжээг авах шаардлагатай байна. Бид ой мод олноор устаж байгаад анхаарч хүрээлэн буй орчноо илүү сайн хамгаалах хэрэгтэй. Бид илүү олон мод тарьж түүнийгээ арчлах шаардлагатай. Эхлээд Төвдөд, дараа нь Дарамсалад мөнх цасны хэмжээ буурч байгааг би нүдээрээ харж байна. Үнэхээр ч зарим эрдэмтэд надад Төвд шиг газрууд хүртэл цөл болох эрсдэлтэй гэж хэлсэн. Тийм ч учраас би Төвдийн эмзэг байгалийг хамгаалахын төлөө дуу хоолойгоо өргөсөөр байна.
Бидний амьдрал сайн сайхан зүйл болно гэсэн хүсэл, найдвар дээр суурилдаг. Найдвар нь ирээдүйтэй холбоотой байдаг. Ирээдүйн талаарх ямар ч зүйл баталгаагүй хэдий ч бид итгэл найдвараа хадгалсаар байдаг нь гутранги байхаас хавь илүүтэй билээ. Дэлхийн дулаарал эрчимжиж байгаа хэдий ч олон олон залуус шийдлийг олж, хуваалцахын төлөө хамтран ажиллаж байна. Тэд бол бидний найдвар.
Өнөө үед уур амьсгалын өөрчлөлтийн улмаас ноцтой асуудлуудтай тулгарч байгаа тул энэ өөрчлөлтийн төлөө цагийн хуваарь, төлөвлөгөө гаргах замаар бие биедээ туслах, ажиллах шаардлагатай байна. Нэг л дэлхий дээр амьдарч буй хүн төрөлхтний хувьд бид аз жаргалтай амьдрахын тулд хүчин чармайлт гаргах шаардлагатай. Уур амьсгалын өөрчлөлтийн аюул нь улс үндэстний хилээр хязгаарлагдахгүй - энэ нь бидэнд бүгдэд нөлөөлж байна. Бид цорын ганц гэр болсон байгаль, дэлхийгээ хамгаалахын төлөө ажиллах ёстой.
Далай лам
Англи хэлнээс орчуулсан Б.Баярмаа
