Ерөнхийлөгч Буш, тэргүүн хатагтай Лаура Буш, Төлөөлөгчдийн танхимын дарга Пелоси, Сенатор Бёрд, шагнал хүртэгч нөхөр Эли Визел, Конгрессын хүндэт гишүүд, эрхэм ахан дүүс ээ.
Конгрессын Алтан медалийг хүлээн авч буй нь миний хувьд машид нэр төрийн хэрэг билээ. Энэхүү хүндэтгэл нь миний өмнө онцгой хариуцлага хүлээдэг төвөдийн ард түмэнд асар их баяр баясгалан, урам зориг өгөх болно. Тэдний сайн сайхан байдал бол миний үйл ажиллагааны байнгын хөдөлгөгч хүч бөгөөд би бээр өөрийгөө тэдний дуу хоолойг чөлөөтэй илэрхийлэгч хэмээн үргэлжид үздэг. Энэхүү шагнал нь энх тайван, харилцан ойлголцол, эв найрамдлыг бэхжүүлэхийн төлөө зүтгэж буй олон хүнд хүчтэй айлдвар хүргүүлж байна гэж би бээр итгэдэг.
Хувь хүнийхээ хувьд хэлэхэд, Төвөдийн алслагдсан Амдо бүс нутгийн энгийн гэр бүлд төрсөн буддын шашны лам надад ийм агуу хүндэтгэл үзүүлж байгаад сэтгэл минь гүнээ хөдөлж байна. Бага насандаа би үнэхээр энэрэнгүй сэтгэлтэй ээжийнхээ хайр халамжид өсөж торнисон юм. 4 настайдаа Лхас хотод ирснийхээ дараа эргэн тойрны бүх хүмүүс, багш нар, тэр ч байтугай гэрийн ажилчид хүртэл надад нинжин, үнэнч, халамжтай хүн байхын утга учрыг зааж сургасан билээ. Би ийм л орчинд өссөн. Хожим нь буддын шашны үзэл санааны талаарх албан ёсны боловсрол эзэмшихдээ харилцан хамаарал, хүн төрөлхтний хязгааргүй энэрэн нигүүлсэхүйн чадавх зэрэг ойлголттой танилцсан юм. Эдгээр нь бүх нийтийн хариуцлага, хүчирхийлэлгүй байх, шашин хоорондын ойлголцлын ач холбогдлыг гүнээ ухаарахад надад тусалсан билээ. Өнөөдөр эдгээр үнэт зүйлд итгэх итгэл минь хүний үндсэн үнэт зүйлсийг түгээн дэлгэрүүлэх хүчтэй урам зоригийг надад өгч байна. Төвөдийн ард түмний эрх, илүү их эрх чөлөөний төлөөх тэмцлийнхээ хүрээнд ч эдгээр үнэт зүйлс нь хүчирхийлэлгүй замыг сонгон, түүнийгээ тууштай баримтлахад намайг чиглүүлсээр ирсэн юм.
Би 1991 онд таны сайхан улсад айлчлахдаа энэ танхимд нэг удаа байх хүндтэй завшаан тохиож байлаа. Тэр үед намайг угтан авч байсан олон хүнийг өнөөдөр энд дахин харж буйдаа би маш их баяртай байна. Тэдний олонх нь тэтгэвэртээ гарсан бол зарим нь бидний дунд үгүй болжээ. Гэсэн хэдий ч энэ боломжийг ашиглан тэдний сайхан сэтгэл, оруулсан хувь нэмрийг онцлон тэмдэглэхийг хүсэж байна. Америк найзууд минь хамгийн хүнд хэцүү цаг үед, асар их дарамт шахалт дор ч бидэнтэй хамт байсаар ирсэн билээ.
Ноён ерөнхийлөгч өө, таны хүчтэй дэмжлэг мөн хатагтай Буш та хоёрын надад хувиасаа үзүүлсэн халуун дотно нөхөрлөлд талархал илэрхийлье. Төвөдөд хандах таны дэмжлэг, ойлголт, түүнчлэн шашны эрх чөлөө болон ардчиллын үйл хэргийн төлөөх таны тууштай байр сууринд би бээр гүнээ талархаж байна.
Хатагтай Спикер, та надад болон төвөдийн ард түмний шударга үйл хэрэгт тууштай дэмжлэг үзүүлээд зогсохгүй дэлхийн бусад хэсэгт ардчилал, эрх чөлөө, хүний эрхийг хүндэтгэх үйл хэргийг дэмжихийн төлөө шаргуу ажиллаж ирсэн билээ. Үүний төлөө танд онцгой талархал илэрхийлье.
Төвөдийн асуудалд Америкийн зүгээс үзүүлж буй тууштай дэмжлэгийг Хятад улс ч анзаарсан. Энэ нь АНУ, Хятадын харилцаанд тодорхой хэмжээний хурцадмал байдал үүсгэсэнд би машид харамсаж байна. Өнөөдөр Төвөд, Хятад улсын ирээдүй харилцан үл итгэлцлээс ангижирч, харилцан хүндэтгэл, итгэлцэл болоод нийтлэг ашиг сонирхлыг хүлээн зөвшөөрөхөд суурилсан харилцаа руу шилжинэ гэсэн чин сэтгэлийн хүслээ та бүхэнтэй хуваалцахыг хүсэж байна.
Өнөөдөр бид Хятад улс хурдацтай урагшилж байгааг харж байна. Эдийн засгийн либералчлал нь баялаг, шинэчлэл, их гүрний хүч нөлөөг авчирлаа. Урт удаан түүх, баялаг соёлтой, хүн амын тоогоороо дэлхийд тэргүүлэгч хоёр улс болох Энэтхэг, Хятад улсын өнөөгийн эдийн засгийн амжилтыг өндрөөр үнэлэх нь зүйтэй гэж би үздэг. Шинээр олж авсан байр суурийнхаа ачаар энэ хоёр улс дэлхийн тавцанд чухал, манлайлах үүрэг гүйцэтгэхэд бэлэн болоод байна. Энэхүү үүргээ биелүүлэхийн тулд Хятад улсад ил тод байдал, хууль дээдлэх ёс, мэдээллийн эрх чөлөө нэн чухал гэж би үзэж байна. Дэлхийн олон орон Хятад улс хэрхэн өөрийн үзэл баримтлалаа.
