Энэтхэг, Бихар муж, Бодгаяа хот. 2010 оны 1-р сарын 5 (Налин Верма, Телеграф, Калькутта) - 74 настай тэрбээр залуучуудын хувьд тийм ч нийтлэг "зорих газар" биш байж магадгүй. Гэхдээ 22 настай Бернард Уилсоноос асуувал тэрбээр Далай ламд бараалхах л гэж Мельбурнээс ирсэн гэж хэлнэ.
Тэрбээр оюун санааны удирдагчийг сонсохоор тэнгис далайг гатлан ирсэн цорын ганц хүн биш юм.
Өнөөдөр эхэлсэн төвөд хувраг Далай ламын жил бүрийн Дэлхийн энх тайвны лекцэнд оролцохоор Бодгаяад цугласан 30,000 хүний дотор багадаа 1,000 нь Австрали, Итали, Чех, Испани, Англи, Бразил болон Африкийн хэд хэдэн орон зэрэг буддын шашинтай бус орнуудаас ирсний дотор ихэнх нь 20-40 насныхан байна.
Бернард Вилсон (дээд) ба Мартин (доод). Гэрэл зургийг Дипак Кумар.
Энэ нь өнгөрсөн жил Сарнат хотод зохион байгуулагдсан лекцэнд ирсэн барууны орнуудын 300 орчим хүнээс даруй гурав дахин их байна хэмээн Химачал Прадеш мужийн Дарамсала хотод байрлах Төвөдийн хилийн чанад дахь засгийн газрын дээд албан тушаалтан Жигмэ Цэрэн хэллээ.
Гурван жилийн өмнө Дарамсалад болсон номонд 350 гаруй барууныхан цугласан байна.
"Харж байна уу, Дээрхийн гэгээнтэн залуучуудыг татаад байгаагийн учир нь тэднийг өөрсдийн шашнаа өөрчлөхийг огт шаарддаггүйтэй холбоотой." гэж Цэрэн тав хоногийн лекцэнд ийм олон барууныхан оролцож байгаа шалтгааныг тайлбарлав. "Буддын шашин шашнаа солих, эсвэл адис хүртээх ёслолыг сурталчилддаггүй. Тэрбээр харин зовлон зүдгүүртэй энэ цаг үед буддын шашин илүү чухал болж байгааг хэлдэг."
Чехээс ирсэн механик инженер Мартин үүнтэй санал нэгдлээ. "Хэдийгээр христийн шашинтай гэр бүлд төрсөн ч гэлээ би атеист." гэж 31 настай тэрбээр хэлэв. "Гэхдээ би энгийн бөгөөд практик ач холбогдолтой учраас буддын гүн ухааныг хүлээн зөвшөөрдөг."
Хэр практик болохыг нь Далай лам өнөөдөр тайлбарлалаа. "Та зовлонгоосоо ангижрахын тулд мөнхийн, эсвэл үл үзэгдэх зүйлд залбирах шаардлагагүй..." гэж тэрбээр цугласан олонд хэлэв. "Дурлаж татагдах мэт мөнх бус төөрөгдлөөс оюун санаагаа чөлөөлөхийн тулд зүгээр л бясалга. Өөртөө итгэ... Гаутам Буддагийн сургаалд байдаггүй ер бусын ид шидэнд бус өөрийн оюун ухаанд итгэ."
Мартин бол Чехословакаас ирсэн 30 гаруй зочдын нэг бөгөөд оюун санааны удирдагч Далай лам дэлхийн өнцөг булан бүрт тавьсан лекцүүдийнхээ хүрээнд 2008 оны 11-р сард тэнд лекц уншсан аж.
Тэгвэл 1935 онд төрсөн ламтан дэлхийн залуучуудыг ингэтлээ татаж буйн нууц нь юу вэ?
Ажиглагчдын хэлж байгаагаар энэ нь 1989 онд Далай лам Нобелийн энх тайвны шагнал хүртэх үеэс эхэлсэн "алгуур үйл явц" юм. Энэ бол Михайл Горбачёвын Зөвлөлтийн эдийн засаг, улс төрийн системийг “өөрчлөх байгуулах” зорилготой шинэчлэлийн дараа коммунизмын хувьд бас нэгэн цохилт болж, Берлиний хана нурсан жил байв.
Коммунизмын нөлөө буурахын хэрээр хурцадмал, тогтворгүй байдалтай дэлхий ертөнцөд буддын шашин залуучуудыг татах болжээ.
Бурхан багш 2500 жилийн өмнө гэгээрэлд хүрсэн газар болох Бодгаяад ирсэн Бостоны номын санч, буддын шашинтай болоод таван жил болж буй Люси, "Бурхны шашин танд зовлонгоос ангид амьдрах аргыг, ялангуяа энэ стресс, түгшүүртэй цаг үед хэрхэн амьдрахыг зааж өгдөг." гэж хэлэв.
"Харин Далай лам бол яаж гэдгийг нь хамгийн сайн зааж өгч чадах хүн." гэж 41 настай тэрбээр нэмж хэллээ.
Зураг. Төвөдийн оюун санааны удирдагч Далай лам 2010 оны 1-р сарын 5-ны Мягмар гарагт Энэтхэгийн Патнагаас өмнө зүгт 130 км (81 миль) зайд орших Бодгаяа хот дахь Махабоди хийдэд цуврал лекцээ тавихаар бэлдэж байхдаа сүсэгтэн олонтой мэндчилж байна. Бодгаяа бол хунтайж Сиддхарта Гаутама эрчимтэй бясалгал хийсний эцэст гэгээрэлд хүрч, Бурхан багш болсон газар юм. Лекцүүд 1-р сарын 9-нийг хүртэл үргэлжилнэ. (АП Фото/Ражеш Кумар Сингх)
Люсигийн ярьснаар хачгаар дамжин халдварлаж, мэдрэлийн систем, үе мөч, арьс, зүрхэнд нөлөөлдөг түгээмэл өвчин болох Лаймын өвчний улмаас үүссэн асуудлуудыг нь "ажлын байран дахь стресс" улам хүндрүүлжээ. "Сүүлдээ эмч нар хүртэл намайг эдгэршгүй өвчтэй гэсэн" гэж тэр дурсав. Ингээд тэр буддын нэгэн ламтай танилцжээ. Лам түүний өвчнийг эдгээсэн болов уу?
"Үгүй" гэж Люси хэлэв. "Ламтан миний өвчнөөс илүүг эдгээсэн. Тэр миний төгс бус сэтгэлийг эдгээсэн."
Өнгөрсөн жил эдийн засгийн уналтын улмаас ажилгүй болсон Юрий Жезус, найз бүсгүй Делфин нар Бразилаас иржээ. "Ажил бол түр зуурын зүйл. Хэрэв алга болсон бол дахиад олдоно. Би эерэг байх ёстой. Үүнийг буддын шашин бидэнд заасан" гэж тэр хэлэв.
Италийн иргэн, 40 настай Мариса Галассо өвчин, стрессийг "түр зуурын зүйл" гэж үздэг.
Түүний нутаг нэгтэн, хөлбөмбөгчин асан Роберто Бажжио ч бас Буддын шашинтай аж. Гэхдээ Италийн шашны шинжээч Раймондо Бултринийн хэлж буйгаар Дэлхийн цомын од асан нь Далай ламын номлодог Гэлүгвийн ёсноос бага зэрэг ялгаатай Согакки урсгалыг баримталдаг юм байна.
"Гэхдээ л буддизм бол буддизм бөгөөд дэлхийн бусад залуучуудыг татдаг шигээ Бажжиогийн сэтгэлийг татжээ" хэмээн ахмад сэтгүүлч хэлэв.
Орчуулсан Б.Одгэрэл
