Нью-Йорк муж, АНУ - Дээрхийн гэгээнтэн Далай лам 6-р сарын 28-нд АНУ-д өвдөгний үе солиулах мэс засалд орсон билээ. Хагалгаа амжилттай болсны дараа Нью-Йорк мужийн Сиракюз хотын “Nappi Farmhouse” төвд зургаан долоо хоногийн сэргээн засах эмчилгээ хийлгэсний дараа тэрбээр өнөө өглөө Нью-Йорк хотыг зорилоо. Дээрхийн гэгээнтнийг нөхөн сэргээх эмч нар сайн эмчилж, сувилсан.
Нью-Йоркийн Тусгай мэс заслын эмнэлгийн насанд хүрэгчдийн үе мөч солих, сэргээн засах тасгийн эрхлэгч, анагаах ухааны доктор Дэвид Мэйман “Далай ламын биеийн байдал өдрөөс өдөрт сайжирч байна. Энэ хэвээр байвал 6-12 сарын хугацаанд бүрэн эдгэх боломжтой” гэж мэдэгдэв.
Дашрамд дуулгахад, Хойд Америкийн Төвөдийн нийгэмлэгийн гишүүд 8-р сарын 22-нд Нью-Йорк хотын “UBS Arena”-д цугларч, Дээрхийн гэгээнтнийг урт удаан наслахыг ерөөн залбирах аж. Үүний дараа Швейцарийн Цюрих хотноо Далай ламыг түр саатах үеэр буюу 8-р сарын 25-нд Төвөдийн нийгэмлэгээс “Халленштадион”-д мөн л бат оршил өргөх юм. Улмаар Дээрхийн гэгээнтэн 8-р сарын 28-нд Энэтхэгийн Дарамсала хотноо буцаж ирэх төлөвтэй байна.
Дээрхийн гэгээнтэн Нью-Йорк дахь мэс ажилбарын бүхий л бэлтгэлийг ханган, амжилттай зохион байгуулсан анд нөхөд Сэм, Кэрол Наппи нарт чин сэтгэлээсээ талархаж буйгаа дамжууллаа. Тэдний санаачилгаар Сиракюз хотын “Upstate Medical University Hospital” эмнэлэгт нөхөн сэргээх эмч, сувилагчдын багийг бүрдүүлсэн нь эмчилгээний явцад үнэтэй хувь нэмэр оруулсан билээ. Мөн Тусгай мэс заслын эмнэлэг болон Анагаахын их сургуулийн эмч, ажилтнууд мэргэжлийн өндөр түвшинд үйлчилгээ үзүүлж байсанд онцлон талархав.
Орчуулсан Р.Манлай
