Итали, Милан. 2007 оны 12 дугаар сарын 7. “Дээрхийн гэгээн Далай ламын дараагийн дүр эмэгтэй байж болох тухай өчигдөр мэдээлэв. Эмэгтэй хутагт хувилгаад байдаг хэдий ч эрэгтэй лам нар давамгайлдаг бөгөөд өмнөх хувилгааныхаа хүйстэй адилгүй дахин мэндлэх тохиолдол ховор байдаг” хэмээн Далай лам мэдэгдэв. Тэрбээр 10 хоногийн Италийн айлчлалаа эхлүүлээд байхдаа “Хэрэв эмэгтэй хүн илүү хэрэгтэй, илүү тустай байх нь тодорхой болбол лам ийм дүрээр дахин хувилан мэндлэх бүрэн боломжтой” хэмээн айлджээ.
Энэ мэдэгдэл нь өнгөрсөн долоо хоногт хийсэн түүний олны анхаарлыг татсан мэдэгдлийн дараа гарч байна. Тэрбээр өөрийн дараагийн дүрийг жанч халахаасаа өмнө сонгох, цаашлаад Дээрхийн гэгээн Далай ламын институцийг цаашид үргэлжлүүлэх шаардлагатай эсэх талаар ард нийтийн санал асуулга явуулах боломжтой гэж хэлсэн юм. “Хэрэв хүмүүс Далай ламын институци цаашид хэрэгтэй хэвээр байна гэж үзвэл энэ бүхэн үргэлжлэх болно” хэмээжээ.
Уламжлал ёсоор Далай ламын дараагийн дүрийг лам нараас бүрдсэн хороо сонгодог. Тэд өмнөх Далай лам нас барсны дараа төрсөн хүүхдийг эрж олдог бөгөөд уг хүүхэд нь өмнөх Далай ламын сүнс, мөн чанарын илрэлийг харуулах ёстой гэж үздэг. Өдгөө 72 насыг зооглоод буй Дээрхийн гэгээн Далай ламын залгамжлалын асуудал улам бүр чухал болж байна.
Хятадын эрх баригчид төвөдийн буддизмд тавих хяналтаа нэмэгдүүлэх эрмэлзэлтэй болж байна. Хятадын тал Дээрхийн гэгээн Далай ламыг Төвөдийн Өөртөө засах эрх, цаашлаад тусгаар тогтнолын төлөөх хүсэл эрмэлзлийн бэлгэ тэмдэг гэж үздэг тул түүний залгамжлагчийг томилох үйл явцыг хянахыг хүсэж байна. Хятадын эрх баригчид хутагт хувилгаадын дараагийн дүрийг дахин тодруулахаас өмнө Засгийн газрын Шашны хэрэг эрхлэх байгууллагаас урьдчилан зөвшөөрөл авах ёстой гэсэн шаардлага тавьжээ. Энэ нь бүх шашин Коммунист намын хяналтад байдаг тогтолцооны хүрээнд үйл ажиллагаа явуулах ёстой гэсэн зарчимтай нийцэж байна.
Дээрхийн гэгээн Далай лам өнгөрсөн жил Италид айлчлах үеэрээ Пап ламтай уулзсан тул энэ удаагийн айлчлалаар мөн уулзана хэмээн хүлээж байсан. Гэвч энэ удаад уулзах боломжгүй нь тодорхой болсны дараа тэрбээр, “Түүнтэй уулзаж чадахгүйдээ туйлын их харамсаж байна. Энд ирээл, түүнтэй уулзахыг машид хүсэж байлаа” хэмээжээ.
Энэ нь өнгөрсөн долоо хоногт Хятадын өмнөд хэсгийн Гуанжөү хотод төрийн зүгээс анх зөвшөөрөл авсан хамба ламыг томилсонтой холбоотой байж магадгүй гэсэн таамаг гарсан байна. Хятад улс хамба ламыг зөвхөн католик шашны оюун санааны тэргүүн гэж хүлээн зөвшөөрдөг бөгөөд Бээжин бүх хамба ламыг томилох эрхтэй гэж үздэг.
Sky Italia телевизийн сурвалжлагч Дээрхийн гэгээн Далай ламаас Италид байх хугацаанд нь ямар нэгэн хүндрэл үүсэж, хэцүү эвгүй байгаа эсэхийг нь асуухад тэрбээр айлчлалаа улс төрийн зорилготой биш гэдгийг онцолжээ. “Би зүгээр л зочин” хэмээн тэрбээр хариулжээ.
Өчигдөр Хятадын Гадаад хэргийн яамны хэвлэлийн төлөөлөгч Цинь Ган, “Далай лам хаашаа ч явсан, ямар ч нэрийн дор явсан энэ асуудал нь хувь хүн болон шашны асуудал биш. Тэр бол улс орныг хуваахыг оролдож, Төвөдийн тусгаар тогтнолыг эрэлхийлж буй бүлэглэлийг төлөөлдөг бөгөөд Хятадын Засгийн газар болон ард түмэн үүнийг эрс эсэргүүцэж байна” хэмээн мэдэгджээ.
Үүний хариуд Төвөдийн хилийн чанадад буй Засгийн газрын хэвлэлийн төлөөлөгч Цэрэндаш Дээрхийн гэгээн Далай лам хүмүүст сонголт хийх илүү их эрх чөлөө олгохыг хүсэж буйгаа хэлээд, “Тэр шийдвэрийг төвөдийн ард түмэн өөрсдөө гаргах ёстой гэж хэлж байна” хэмээн тайлбарлажээ.
