Амаравати, (www.tibet.net) - 2006 оны 30 дахь удаагийн Дүйнхорын вангийн түүхэн арга хэмжээ 1 дүгээр сарын 16-нд болж өндөрлөлөө. Эцсийн хаалтын ажиллагаанд Далай лам, Андра Прадеш мужийн Санхүү, Эрүүл мэндийн сайд К.Росая, Хоршоолол, Тээврийн сайд К.Лакшми Нараяна, Аялал жуулчлалын сайд Ж. Гита Редди, Татварын сайд Д.Прасад Рао, Хууль тогтоогч асан Д.Маникя Вара Прасад Рао (Тадиконда тосгон), парламентын гишүүн Р.Самбасива Рао (Гунтур дүүрэг) болон муж, дүүргийн захиргааны бусад албан тушаалтнууд оролцов.
Хаалтын ажиллагааны үеэр Дээрхийн гэгээн 300 боть буддын уран зохиолыг Буддын судалгааны төвд хандивлах болно гэжээ. Мөн үүнээс гадна тэрээр Дүйнхор бурхан болон Бодьсадвын хөшөөг уг төвд байрлуулна гэдгийг хэсэн байна. Дүйнхорын ван айлдах үйл ажиллагааг амжилттай зохион байгуулахад бүх талаар дэмжлэг үзүүлсэн мужийн засгийн газар болон иргэдэд талархлаа илэрхийлээд, уг мужид буддын төвүүдийг байгуулж буй хүчин чармайлтыг өндрөөр үнэлэв.
Дээрхийн гэгээн Далай лам, “Энэтхэг улс соёлын олон янз байдлыг нэг урсгалд нэгтгэн авчирч, шашны янз бүрийн уламжлалуудын дунд эв найрамдлыг бэхжүүлэхийн том жишээ болсоор ирсэн билээ” хэмээв. Түүнчлэн буддизмтай холбогдуулан нийгмийн үнэт зүйлсийг түгээн, нийгмийн асуудлуудыг шийдвэрлэж буй Доктор Амбедкарыг магтан сайшаасан юм. “Буддизмд дан ганц сонирхол үзүүлэх нь хангалтгүй, харин буддын жинхэнэ мөн чанарыг ойлгохын тулд илүү гүнзгий судалгаа хийх нь зүйтэй” хэмээн онцолжээ.
Дээрхийн гэгээн Далай лам талархлын тэмдэг болгон одоо баригдаж буй “Дхьяна Будда” төслийн бүтээн байгуулалт болон олон улсын буддын судалгааны төвийн байгуулалтад зориулж 30 лак рупи хандив өргөхөө зарлав.
Сангийн сайд К. Росая, “Дээрхийн гэгээн Далай ламын Дүйнхорын айлдвар дахин энэ газрыг ивээж, одоо энэхүү газар олон улсад танигдсан мөргөлийн төв болж байна” хэмээлээ.
Татварын сайд Дхарман Прасад Рао, “Дүйнхорын ван үйл ажиллагаа бол түүхэн үйл явдал, уг арга хэмжээг үр өгөөжтэй зохион байгуулсан албан тушаалтнууддаа баяр хүргэе” гэжээ.
Үүнээс өмнө Далай лам дүүргийн захиргаанаас хэвлүүлсэн Дүйнхорын вангийн дурсамжийн эмхэтгэлийг нээлээ. Гунтур дүүргийн орлогч захирагч Рахул Божжа (IAS), Дүйнхорын вангийн тусгай албан тушаалтан Вижай Мохан, тусгай үүрэг гүйцэтгэгч Маниш Синха болон бусад хэлтсийн ажилтнуудыг гавьяат гэрчилгээгээр шагнасан байна. Мужийн засгийн газрын нэрийн өмнөөс сайд Дхарман Прасад Рао, доктор Гита Редди нар Дээрхийн гэгээн Далай ламд дурсгалын эд зүйл тэргүүтнийг бэлэгжээ. Энэхүү үйл явдалд хууль тогтоогч асан Д.Маникя Вара Прасад (Тадиконда тосгон), хууль тогтоогч Жанга Кришна Мурти (Гурагала), мужийн Аялал жуулчлалын корпорацийн ерөнхий захирал Рэймонд Питер, Гунтур дүүргийн захирагч хатагтай Г.Жаялакшми нар оролцов.
Орчуулсан Н.Долгар
