Бельги улс, Хюи хот. 2006 оны 5 дугаар сарын 29. Дээрхийн гэгээн Далай ламыг Брюсселийн Завентемийн үндэсний нисэх буудалд Бельгийн Сенатын ерөнхийлөгч Анн-Мари Лизен, Энэтхэгийн ЭСЯ-ны Канцелярийн дарга К.Ж.Фрэнсис, Төвөдийн “Юнтэн Лин” хүрээлэнгийн зохион байгуулах хорооны төлөөлөгчид угтан авчээ.
Далай ламын заларсан автомашины цуваа айлчлалын үеэрх номын айлдвар, олон нийтэд зориулсан арга хэмжээг зохион байгуулагч Хюи хотын Төвөдийн хүрээлэн “Юнтэн Лин”-ийг зорин хөдөлжээ. Дээрхийн гэгээнийг хүрээлэнгийн лам хуврагууд, орон нутгийн иргэд болон Бельгийн Төвөдийн нийгэмлэгийн төлөөлөгчид морилон ирэхэд нь халуун дотноор угтан авсан байна.
Далай лам өдрийн зоог барьсныхаа дараа Бельгийн Сенатын ерөнхийлөгч Анн-Мари Лизен болон Кени улсад суугаа Бельгийн Элчин сайд, буддын шашинт Кристина Фунес Ноппен нарыг хүлээн авч, богино уулзалт хийжээ.
Үүний дараа Төвдөн Шадивлин хийдийн нээлтийн ёслолд оролцож, цугласан олонд товч айлдвар айлдав. Тэрбээр өмнө нь тус хүрээлэнгийн шав тавих ёслолд оролцож байсан бөгөөд энэ удаагийн айлчлалын үеэр сүмийн барилгын ажил талдаа орсонтой танилцсанаа хэлээд мөн сүмийг бүрэн барьж дууссаны дараа дахин ирэхгүй бол энэ үйл явдал дутуу мэт санагдах болно хэмээжээ. Арга хэмжээний төгсгөлд Бельги дэх Төвөдийн нийгэмлэгийн зохион байгуулсан төвөдийн үндэсний урлаг, соёлын тоглолтыг таалан соёрхов. Аадар бороо орж байсан хэдий ч 1500 гаруй хүн Дээрхийн гэгээний адислалыг хүртэж, айлдварыг нь сонсон, төвөдийн соёлын тоглолтыг үзэхээр тэвчээртэй хүлээж байв. Түүний айлчлал хэвлэл мэдээллийнхний анхаарлыг ихэд татан, Бельги улсын томоохон хэвлэл мэдээллийн хэрэгслүүдээр цацагдаж байлаа.
Далай лам маргааш Хюи хотын захиргааны байранд тусгай хүлээн авалтад оролцон, Үндэсний конгресст “Энх тайван, харилцан ойлголцлыг бэхжүүлэх стратеги” сэдвээр айлдвар айлдах аж. Үдээс хойш тэрбээр Брюссель хотыг зорин, Европын комиссоос зохион байгуулах “Үндсэн эрх хийгээд харилцан хүндлэл” сэдэвт хэлэлцүүлэгт оролцох юм.
