Зураг. Дээрхийн гэгээн Далай лам Пүрэв гарагт Токиогийн Ханэда онгоцны буудалд Канагавагийн Буддын шашны холбооны төлөөлөгчидтэй товч уулзжээ. Тус холбооны төлөөлөгчид Төвөдийн удирдагчийг угтан авчээ.
Япон улс, Токио хот. 2007 оны 11 дүгээр сарын 15. Төвөдийн цөллөгт буй удирдагч Дээрхийн гэгээн Далай лам Японы буддын шашны байгууллагуудын урилгаар 9 хоногийн айлчлал хийхээр тус улсад хүрэлцэн ирлээ.
Дээрхийн гэгээн Далай лам “Японы буддын шашны холбоо” (AJBF) үүсгэн байгуулагдсаны 50, “Канагавагийн буддын шашны холбоо” (KBF)-ны үүсгэн байгуулагдсаны 40 жилийн ойг тус тус тэмдэглэхээр 11 дүгээр сарын 14-23-ны хооронд тус улсад айлчлах юм. Төвөдийн удирдагчийг Нарита онгоцны буудалд Дээрхийн гэгээн Далай ламын төлөөлөгчийн газрын албаны хүмүүс угтан авсан бөгөөд Төвөд, Монголын сүсэгтэн олон түүнийг угтан авахаар онгоцны буудалд эгнэн зогсжээ.
Дээрхийн гэгээн Далай лам Токиогийн олон улсын онгоцны буудлаас Ханэда онгоцны буудлыг зорьж, тэнд буддын шашны байгууллагуудын төлөөлөгчидтэй товч уулзав. “Дээрхийн гэгээн Далай лам аа, та бидэнтэй хамт энд хүрэлцэн ирсэнд машид их баяртай байна. Энэ бол бидний хувьд нэр төрийн хэрэг билээ. Япон улс материаллаг талаасаа маш өндөр хөгжсөн хэдий ч энд олон асуудал байсаар байна. Энэ тал дээр биднийг ухаарч ойлгоход таны оюун санааны мэргэн ухаан ихээхэн тус болж чадна” хэмээн Канагавагийн буддын шашны холбооны энэ удаагийн айлчлалыг хариуцсан захирал Вада Тайга Дээрхийн гэгээн Далай ламд хэлжээ. “Би бээр Японд ирэх үнэхээр дуртай байдаг. Та бүхний урилгаар Японд дахин ирсэндээ машид баяртай байна. Зөвхөн материаллаг хөгжилд тулгуурлан хүн төрөлхтний бүх асуудлыг шийдвэрлэхэд тун хэцүү” гэж Дээрхийн гэгээн Далай лам буддын шашны байгууллагуудын төлөөлөгчдөд айлджээ.
Шашин хоорондын эв найрамдлын ач холбогдлыг онцолдог Дээрхийн гэгээн Японы буддын шашны байгууллагуудын төлөөлөгчидтэй хийсэн товч уулзалтынхаа үеэр тэднийг бусад шашны итгэл үнэмшилтэй илүү ойр дотно харилцаа, харилцан ойлголцлыг бий болгохыг уриаллаа.
Дээрхийн гэгээн Далай ламыг Канагавагийн буддын шашны холбооны дэд дарга Курода Рюжо Ханэда онгоцны буудалд хүндэтгэл дүүрэн угтан авчээ. Энэхүү айлчлалынхаа үеэр Дээрхийн гэгээн Далай лам Йокохама болон бусад хотод боловсрол, шашны сэдвээр цуврал айлдвар айлдахаар төлөвлөж байна. 11 дүгээр сарын 20-нд Канагавагийн буддын шашны холбооны үүсгэн байгуулагдсаны 40 жилийн ойн арга хэмжээний хүрээнд Йокохама хотын Үндэсний хурлын танхимд 5000 гаруй хүнд “Итгэл найдвар хийгээд энх тайван” сэдвээр үг хэлэх юм.
Японд байрлах төвөдийн албаны мэдээнээс үзэхэд Далай лам 1959 онд хятадын дарлалын эсрэг төвөдүүдийн бослого амжилтгүй болсны дараа Төвөдөөс дүрвэн гарснаас хойш анх удаа буюу 1967 оны 10 дугаар сард Японд айлчилж байжээ. Энэ нь Төвөдөөс дүрвэснээс хойш Төвөд, Хятад, Энэтхэгээс гадна хийсэн анхны айлчлал нь байлаа. Энэхүү айлчлал нь Дээрхийн гэгээн Далай лам өнгөрсөн сард АНУ-ын Конгрессын Алтан медалиар шагнуулснаас хойш Энэтхэгээс гадна хийж буй анхны айлчлал болж байна. Тэрбээр өмнө нь өнгөрсөн оны 11 дүгээр сард шашны байгууллагын урилгаар Японд айлчилж байсан бөгөөд энэ удаагийнх нь тус улсад хийж буй 11 дэх айлчлал билээ.
Хятад улс Төвөдийн удирдагчийн сүүлийн хэдэн сарын хугацаанд хийсэн гадаад бусад айлчлалыг эрс эсэргүүцэж ирлээ. Мөн Бээжин Дээрхийн гэгээн Далай ламын гадаадад хийдэг олон удаагийн айлчлалыг шүүмжилж, “Түүнийг хүлээн авч буй гадаадын засгийн газрууд Хятадын дотоод хэрэгт хөндлөнгөөс оролцож байна” хэмээн мэдэгджээ. Гэсэн ч Австрали, Герман, Австри, АНУ, Канад улсын удирдагчид энэ оны эхээр Хятадын эсэргүүцлийг үл тоомсорлон, хилийн чанадад буй Төвөдийн удирдагчтай албан ёсны уулзалт хийсэн билээ. Тухайлбал, ерөнхийлөгч Жорж Буш 10 дугаар сарын 17-нд Капитолын Ротунда танхимд Дээрхийн гэгээн Далай ламд АНУ-ын Конгрессын иргэний дээд шагналыг гардуулсан юм.
Харин энэ удаагийн айлчлалын үеэр Нобелийн Энх тайвны шагналт 72 настай Дээрхийн гэгээн Далай ламтай Японы Засгийн газрын ямар нэгэн албан тушаалтан уулзах төлөвгүй байна. Япон дахь Төвөдийн алба уг айлчлалыг томоохон хоёр буддын шашны холбооны урилгаар хийж байгаа бөгөөд Японы Засгийн газрын албан ёсны уулзалт, томилгоо хөтөлбөрт тусгагдаагүй хэмээн мэдэгдэж байна.
1951 оноос хойш Төвөдийг захирч ирсэн Хятад улс гадаадын өндөр албан тушаалтнууд Дээрхийн гэгээн Далай ламтай уулзахыг эсэргүүцдэг. Төвөдийн удирдагч Төвөдийн тусгаар тогтнолыг бус, харин илүү өргөн хүрээний өөртөө засах эрхийг эрэлхийлж буйгаа олон нийтэд мэдэгдсээр ирсэн ч Хятад улс Дээрхийн гэгээн Далай ламыг тус улсыг хагалан бутаргахыг санаархаж байна хэмээн буруутгасаар байна.
