Зураг. Дэлхий дахинд шашин хоорондын эв найрамдлыг дэмжих үйлсэд тууштай ханддаг Дээрхийн гэгээн Далай лам Исэ хотын Шинто сүмд хүндэтгэл үзүүллээ. Сүмийн тэргүүн тахилч Тошия Вада (зүүн талд), Дээрхийн гэгээн Далай ламын Токио дахь төлөөлөгч Лхагвацог (баруун талд) нар... Зургийг Данзан Дасэл.
Япон улс, Исэ хот. 2007 оны 11 дүгээр сарын 18. Дээрхийн гэгээн Далай лам дэлхийн өнцөг булан дахь шашны ариун газруудад хүндэтгэл үзүүлэх замаар шашин хоорондын эв найрамдлыг дэмжих үйлсийнхээ хүрээнд өнөө өглөө Японы Миэ мужийн Исэ хотод орших Шинто шашны хамгийн ариун сүмд морилон саатлаа.
Төвөдийн оюун санааны удирдагчийг Исэ Жингү сүмд хүрэлцэн ирэхэд сүмийн тэргүүн тахилч Тошия Вада олон сүмээс бүрдсэн, ой мод бүхий сүмийн цогцолбороор дагалдан явжээ. Дээрхийн гэгээн Далай лам үндсэн Найкү сүмд хүндэтгэл үзүүлэхийн өмнө тус цогцолбор дахь голын усаар өөрийгөө ариусгав. Төвөдийн оюун санааны удирдагч гол сүмийн өмнө бөхийж, залбирал үйлджээ.
Дээрхийн гэгээн Далай лам Когаккан Их Сургуульд болох шашны форумд оролцохын өмнөх хэвлэлийн хурлын үеэр шашин хоорондын эв найрамдлыг дэмжих нь амьдралынхаа гол зорилтуудын нэг болохыг мэдэгдсэн юм.
“Би хаашаа ч явсан, хэрэв цаг зав гарвал янз бүрийн шашны сүм хийдүүдэд хүндэтгэл үзүүлж, мөргөл үйлддэг” хэмээн Дээрхийн гэгээн Далай лам хэлсэн юм.
“Дээрхийн гэгээн Далай лам 4 жилийн өмнө буюу 2003 онд энэ бунханд анх зочлохдоо манай өвөрмөц оюун санааны уламжлал болон 20 жил тутамд шинэ сүмд “ками”-г шилжүүлэн залах “Сингу” зан үйлд ихэд сэтгэгдэл төрсөн. Тиймээс ч Дээрхийн гэгээн Далай лам энд дахин зочлохыг хүсэж байсан бөгөөд өнөөдөр хүслээ биелүүллээ” хэмээн сүмийн тэргүүн тахилч Тошия Вада “Phayul” агентлагт баяр хөөртэйгөөр ярьжээ.
Дээрхийн гэгээн Далай лам дараа нь Когаккан Их Сургуулийн гол танхимд хүрэлцэн ирж, шинто, бурхны шашин, шугэндо шашны төлөөлөгчид оролцсон шашин хоорондын форумд “шашин хоорондын эв найрамдал” сэдвээр айлдвар айлдав. Уг арга хэмжээнд олон тооны үзэгч оролцжээ.
Шашин хоорондын эв найрамдлын ач холбогдлыг онцлон тэмдэглэж, Дээрхийн гэгээн Далай лам өөр өөр шашны итгэл үнэмшлийн хооронд эв нэгдэл, харилцан ойлголцлыг бэхжүүлэх нь нэн чухал болохыг хэлэв. “Шашны итгэл үнэмшил нь харилцан ойлголцол дутагдсанаас болж заримдаа асуудал, хагарал үүсгэж болзошгүй. Гэвч бүх шашинд хайр, энэрэн нигүүлсэхүйн тухай нийтлэг, бүх нийтийн сургаал агуулагддаг” хэмээн Дээрхийн гэгээн айлджээ.
Шашин хоорондын итгэл үнэмшлийн талаар хэлэлцэх үеэр Далай лам шашнуудын ялгаа, зөрчилдөөнийг илүү өргөн хүрээнд хэлэлцэж, эргэцүүлэн тунгаах замаар тодорхой ойлгож, цаашид хүн төрөлхтөнд илүү сайнаар үйлчлэх шинэ санаа, мэдлэгийг эрэлхийлэх шаардлагатайг онцолсон байна.
“Хүн төрөлхтөнд хүний өөр өөр үнэт зүйлс, гүн ухааныг дэмжин дэлгэрүүлэх өөр өөр арга барил хэрэгтэй. Итгэл үнэмшил, оюун ухаан хоёр хамтдаа байх ёстой. Хүн төрөлхтөн аз жаргалтай байвал би ч үүнээс хамгийн их ашиг тус хүртэнэ. Хэрэв хүн төрөлхтөн аз жаргалгүй байвал би ч бас зовлон амсах болно. Бидний ирээдүйн амьдралын хариуцлагыг бид өөрсдөө хүлээнэ. Энэ бол тодорхой зүйл. Тиймээс бид энэ талаар бодож, сайн эргэцүүлэн бодох ёстой” хэмээн айлдсан юм.
Дээрхийн гэгээн Далай лам маргааш өглөө Ёкохама хотыг зорих бөгөөд тэнд сургуулиудаар зочилж, 11 дүгээр сарын 20-нд айлдвар айлдахаар төлөвлөжээ.
