Энэтхэг улс, Махараштра муж, Пуна хот. 2008 оны 11 дүгээр сарын 8. Төвөдийн удирдагч Дээрхийн гэгээн Далай лам “Энэтхэг, Төвөд хоёр нь багш, шавийн холбоотой. Шавь нь зовж зүдэрвэл багш нь үүний төлөө хариуцлага хүлээх учиртай” хэмээн айлджээ.
Дээрхийн гэгээн 11 дүгээр сарын 8-ны Бямба гарагт Садху Васвани байгууллагын Гита Мандир сүмийн нээлтийг хийхээр Пуна хотод морилсон юм. Тэрбээр мөн 42 дахь удаагаа зохион байгуулсан “Сарводая Самаж Саммелан” чуулганы хаалтын өдрийн арга хэмжээнд оролцжээ.
Садху Васвани байгууллагын арга хэмжээний үеэр Далай лам хүмүүсийн хоорондын харилцаанаас эхлээд улс төр хүртэлх олон асуудлыг хөндөн ярьсан байна. Энэтхэгээс түгсэн хайр энэрлийн сургаал Төвөдөд хүрснээр тус орон иргэншсэн нийгэм болж төлөвшсөнийг тэрбээр онцолжээ. Мөн “Бурхан багшийн сургаал төвөдүүдийн амьдралыг чиглүүлсэн. Хятад улс манай газар нутагт ихээхэн хяналт тогтоосон ч төвөдүүд Энэтхэгээс дэмжлэг, хайр энэрэл ирнэ гэж найдсаар байна” хэмээн айлдав.
Дээрхийн гэгээн Төвөдийн эрх чөлөөний төлөөх үйл хэргийг дэмжихдээ улс төрийн асуудлаас илүүтэй байгаль орчин, соёл, хүмүүнлэгийн асуудалд ач холбогдол өгөхийг уриалжээ. Түүнчлэн Энэтхэг, Хятадын найрсаг харилцаа чухал болохыг онцолж, “Энэтхэг, Хятад хоёр жинхэнэ найрсаг харилцаатай болбол дэлхий ертөнц илүү аюулгүй болоод зогсохгүй Төвөдийн эрх чөлөөнд ч тус дэм болно” хэмээн айлдсан байна. “Хүн төрөлхтөн бүтэн зууны турш цус урсгаж, хүний амь хөнөөсөн олон үйл явдлыг тууллаа. Одоо хүмүүс энх тайвны үнэ цэнийг ухаарч байна. Хүн бүр дотоод сэтгэлдээ амар амгаланг төлөвшүүлж байж л дэлхий дахинд энх тайван тогтоно” хэмээн Дээрхийн гэгээн айлджээ. Зэвсэг хураах гэдгийг зөвхөн зэвсгээс татгалзах бус, бусдыг уучилж, сэтгэл санааны хувьд эвлэрэх гэж ч ойлгож болохыг тэрбээр тайлбарлав. Мөн “Яриа хэлэлцээ хийснээр улс орны дотоодод төдийгүй улс орнуудын хооронд үүсэх олон зөрчил, мөргөлдөөнөөс зайлсхийх боломжтой” хэмээн айлдсан байна.
Энэ үеэр Ж.П.Васвани Далай ламд хүндэтгэл үзүүлж, “Далай лам даруу төлөв атлаа Хятад шиг хүчирхэг улсын өөдөөс зогсох зориг, тэнхээтэй хүн” хэмээн хэлжээ.
“Сарводая Самаж Саммелан” чуулганы үеэр Дээрхийн гэгээн Энэтхэгийн хүчирхийлэл үл хэрэглэх, хүлцэн тэвчих эртний уламжлалыг онцлон тэмдэглэв. Тэрбээр “Энэтхэг улс эдгээр үнэт зүйлсийг дэлхий дахинд түгээн дэлгэрүүлэхийн төлөө хичээх хэрэгтэй” хэмээн айлджээ. Мөн өөрийн онцгойлон чухалчилдаг хоёр чиглэлийн талаар дурдсан байна. Эхнийх нь ахимса буюу хүчирхийлэл үл хэрэглэх зарчим, хоёр дахь нь шашин хоорондын эв найрамдлыг дэмжих явдал юм. Дээрхийн гэгээн “Олон жил өнгөрсөн ч Гандигийн үнэт зүйлс, үзэл санаа, зарчмууд Энэтхэгийн ард түмний амьдралд гүн шингэсэн хэвээр байгаад баяртай байна. Олон бэрхшээл, тэмцлийг туулсан ч энэтхэгчүүд хүчирхийлэл үл хэрэглэх зарчмыг баримталсаар байгаа нь сайхан хэрэг” хэмээн айлджээ.
Гурван өдөр үргэлжилсэн тус чуулганд Энэтхэг болон дэлхийн бусад орноос ирсэн Гандийн үзэл санааг баримтлагчид илтгэл тавьсан байна.
