Нидерланд улс, Амстердам хот. 2009 оны 6 дугаар сарын 4. Дээрхийн гэгээн Далай лам Нидерланд дахь айлчлалынхаа эхний өдөр Шантидэва гэгээний “Бодьсадвын явдалд орохуй” зохиолын тухай айлдвар айлдаж, үдээс хойш “Ээдрээт цаг үе дэх энэрэл нигүүлслийн хүч” сэдвээр олон нийтэд айлдвар айлдлаа. Эдгээр арга хэмжээ Амстердам хотын RAI төвд болсон бөгөөд тус бүрд нь 10,000 гаруй хүн оролцжээ. Үүнээс гадна ойролцоох танхимд байрлуулсан дэлгэцээр шууд дамжуулсан бөгөөд хэдэн зуун хүн үзсэн байна. Олон нийтэд зориулсан айлдварыг www.boeddhistischeomroep.nl цахим хаягаас үзэх боломжтой.
Дээрхийн гэгээн өглөөний айлдвараа эхлүүлэхээсээ өмнө Нидерланд, Бельгид амьдардаг төвөдүүдтэй уулзжээ. Уулзалтад монголчууд, бутанчууд ч оролцсон байна. Дээрхийн гэгээн Далай лам уулзалтын үеэр хилийн чанадад амьдарч буй төвөдүүдийг боловсрол эзэмшихээ үргэлжлүүлж, аливаад соргог, ухаалаг хандахын зэрэгцээ мунхаг харанхуйгаас зайлсхийхийг уриалав. Мөн хилийн чанадад өсөж буй төвөд залуу үеийнхний боловсрол ямар чухал болохыг онцлон тэмдэглэжээ. Тэрбээр Хималайн бүс нутгийн ард түмний нийтлэг өв соёл, шашны уламжлалын талаар ярив. Ялангуяа монголчууд төвөдийн ард түмэн болон тэдний буддын шашны соёлтой гүн гүнзгий холбоотойг санууллаа. Түүнчлэн төвөдийн өнөөгийн нөхцөл байдлын талаар ярьж, Европт амьдарч буй төвөдүүдийг тууштай, зоригтой байж, эх оронд нь өрнөж буй үйл явдлыг анхааралтай ажиглан мэдэж байхыг уриалсан байна.
Төвөдүүдтэй хийсэн уулзалтын дараа Амстердам хотын тухайн үеийн дарга, Засгийн газрын сайдаар ажиллаж байсан Жоб Коэн Дээрхийн гэгээн Далай ламд бараалхав.
Дээрхийн гэгээн өглөөний айлдварынхаа үеэр дэлхийн томоохон шашнуудад бүгдэд нь чухалчлан үздэг хайр, энэрэл нигүүлсэл, хүлээцтэй байдлын тухай айлдав. “Энэ нь буддын шашны уламжлалд бүр ч тодорхой илэрдэг бөгөөд тэдгээрт энэрэл нигүүлсэл, хайр нь аливаа оюун санааны дадал, бясалгалын үндэс суурь болдог хэмээн үздэг. Хүн бүрийн дотор орших хайр, энэрэл нигүүлслийн чадавхыг бүрэн хөгжүүлэхийг хүсвэл тэдгээрийн эсрэг чанар болох үзэн ядалт, түрэмгийллийг хянаж сурах нь зайлшгүй чухал юм” хэмээн айлдсан юм.
Тэрбээр өөрийн уламжлал, өв соёлоо эрхэмлэхийн чухлыг дурдан, буддын шашныг бусдад дэлгэрүүлэхийг зорьдоггүй, харин харилцан ойлголцлыг нэмэгдүүлэхийг хүсдэгээ тайлбарлав. “Соёлын харилцаа, ойлголцлыг хөгжүүлэх нь бусад шашныг илүү сайн ойлгоход төдийгүй өөрийн шашин, уламжлалаа гүнзгийрүүлэн танин мэдэхэд тусалдаг. Гэхдээ энэ үйл явц заримдаа зөрчилдөөн үүсгэж ч болох юм” хэмээжээ.
Үдээс хойш Дээрхийн гэгээн Далай лам олон нийтэд зориулсан айлдвар айлдлаа.
