Канад улс, Оттава хот. 2007 оны 10 дугаар сарын 28. Буддын шашны тэргүүн Дээрхийн гэгээн Далай лам Канадын улс төрчидтэй албан ёсоор уулзаж, олон мянган хүнд сургаал айлдах түүхэн айлчлалынхаа хүрээнд Ням гарагт Оттава хотод морилон ирлээ. XIV Далай лам Данзанжамцыг Оттавагийн олон улсын онгоцны буудалд Байгаль орчны сайд Жон Бэйрд, Оттава хотын дарга Ларри О'Брайен нар угтан авчээ.
Өдгөө 72 насыг зооглон буй Дээрхийн гэгээн Далай лам өнөөдөр үдээс хойш Оттавагийн Иргэний төвд олон мянган хүнд хандан “Бүх нийтийн хариуцлагаар дамжуулан дэлхийн иргэн болох нь” сэдвээр илтгэл тавихаар төлөвлөсөн байна. Энэхүү арга хэмжээг Канадын Төвдийн хороо зохион байгуулж байгаа юм.
Ерөнхий сайд Стивен Харпер Дээрхийн гэгээн Далай ламтай Парламентын ордонд уулзах юм. Энэ нь Канадын ерөнхий сайд хилийн чанадад буй шашны тэргүүнтэй албан ёсны яриа хэлэлцээр хийж буй анхны тохиолдол болох юм.
Дээрхийн гэгээн Далай лам 2004 онд тухайн үеийн ерөнхий сайд Пол Мартинтай Оттавагийн Ромын католик шашны хамба ламын өргөөнд 1 цагийн турш хувийн уулзалт хийж байжээ. Харин Мартины өмнөх ерөнхий сайд Жан Кретьен ийм уулзалт хийхээс татгалзсан байна.
Зураг. Дээрхийн гэгээн Далай лам Оттавагийн олон улсын нисэх буудалд хүрэлцэн ирэхдээ Төвөдийг дэмжигчдийн парламентын бүлгийн хамтарсан дарга, сенатор Кон ди Нинотой мэндчилж байна. Энэ үеэр Далай лам цагаан өнгийн хадаг барьжээ.
Зураг. Сенатор Кон ди Нино, Байгаль орчны сайд Жон Бэйрд, Оттава хотын дарга Ларри О'Брайенд Дээрхийн гэгээн Далай лам цагаан хадаг барьж буй нь... Хадаг барих нь төвөдийн уламжлалт мэндчилгээ бөгөөд ариун цагаан сэтгэлийг бэлгэддэг. 2007 оны 10 дугаар сарын 28.
Дээрхийн гэгээн Далай лам одоогоор 2008 оны Бээжингийн олимпын наадмын өмнө Төвөдийн өөртөө засах эрх болон төвөдийн буддын шашны соёлыг хадгалан хамгаалах үйлсийг сурталчлах зорилгоор Хойд Америкаар аялж байна.
1949 онд Хятад улс Хималайн нуруунд орших тус улсад цэрэг оруулсан байна. Дараа жил нь буюу 16 настайдаа Дээрхийн гэгээн Далай лам Төвөдийн Засгийн газрын тэргүүний хувиар улс төрийн бүрэн эрх мэдлийг гартаа авчээ. 1959 онд болсон бослого амжилтгүй болсны дараа Дээрхийн гэгээн Далай лам Энэтхэгийн хойд хэсэг рүү дүрвэн гарч, өдгөө хүртэл цөллөгт амьдарч байна.
Хятадын албаныхан Нобелийн шагналт Дээрхийн гэгээн Далай ламыг улс төрийн зүтгэлтэн, салан тусгаарлагч хэмээн үзэж, гадаадын удирдагчид түүнтэй уулзахыг эрс эсэргүүцдэг. АНУ-ын ерөнхийлөгч Жорж Буш, Германы Канцлер Ангела Меркель нар Дээрхийн гэгээн Далай ламтай саяхан олон нийтийн өмнө уулзсаныхаа төлөө Хятадын удирдлагын зүгээс ширүүн шүүмжлэлд өртсөн билээ.
Оттава дахь Хятадын Элчин сайдын яам Харперийн Парламентын ордонд хийсэн олон нийтийн уулзалтыг шүүмжилсэн товч мэдэгдэл гаргав. Тус мэдэгдэлд Дээрхийн гэгээн Далай ламыг “салан тусгаарлах” үйл ажиллагаа явуулдаг улс төрийн зүтгэлтэн хэмээн тодорхойлжээ. Энэ нь Дээрхийн гэгээн Далай лам өнгөрсөн жил Канадын хүндэт иргэншил хүртсэнээсээ хойш тус улсад хийж буй анхны айлчлал юм. Тэрээр Холокостын баатар Раул Валленберг, Нелсон Мандела болон хамгийн сүүлд уг хүндэтгэлийг хүртсэн Бирмийн ардчиллын төлөө тэмцэгч Аун Сан Су Чи нарын эгнээнд нэгдэж байна.
Долоо хоногийн сүүлээр Төвөдийн буддын шашны тэргүүн Торонто хотод зочилж, “Рожерс” төвд “Аз жаргалын урлаг” сэдвээр олон нийтэд зориулсан айлдвар айлдахаар төлөвлөжээ.
