(Төвөд эхийн орчуулга)
Эх орондоо болон хилийн чанадад амьдарч буй үндэс угсаа нэгт ахан дүүстээ Төвөдийн Эзэн хааны цаг тооллын 2136 он, XVII жарны шороон үхэр жилийн сар шинийн мэндийг дэвшүүлье. Бидний шударга ёсны төлөөх үйл хэрэг алсдаа бүтэж, энх тайван, хөгжил цэцэглэлт ирэх болтугай хэмээн залбиръя.
Өдөр, шөнө, сар, жилийг үүтгэгч гараг эрхсийн тасралтгүй эргэх мөчлөгт хуучин, шинэ он цаг гэх үе завсар байхгүй ч хуучин он улирч, шинэ он эхэлснийг тэмдэглэх уламжлал дэлхий даяар байдаг. Үүний нэгэн адил Цастын орондоо бид гарч буй жилийнхээ тэргүүн сарын шинийн нэгэнд шашны уламжлал хийгээд орчин цагийн хөг аясыг хослуулан шинэ оноо ёслол төгөлдөр тэмдэглэдэг уламжлалтай билээ. Гэвч өнгөрсөн жил Төвөд орон даяар Хятадын эрх баригчдын бодлогод сэтгэл дундуур байгаагаа илэрхийлснийхээ төлөө олон зуун төвөд хүн амь насаа алдаж, хэдэн мянгаараа хоригдож, яргалал зовлонд унасан.
Төвөд ахан дүүс минь ийм зовлон амсаж байхад бидний хувьд сар шинийн баяр ёслол тэмдэглэн хөөрөн баясах цаг яав ч биш билээ. Төвөдөд болон хилийн чанадад амьдарч буй төвөдүүд энэ шинэ жилээр баяр ёслолын үйл ажиллагаанд оролцохгүй байх шийдэмгий алхмыг хийж байгааг би ихэд сайшаан үнэлж байна. Энэ цаг хугацаанд та бид бусдын тусыг үл бодсон муу үйлийг орхиж, сайнд шамдан, буян хурааж, хураасан буянаа Төвөдийн үйл хэргийн төлөө тэмцэж яваад амиа алдсан, түүнчлэн өнгөрсөн жилийн эмгэнэлт үйл явдлын улмаас амь үрэгдсэн бүх хүний төлөө, тэднийг өндөр дээд төрлийг олж, бурхны хутагт үтэр түргэн хүрэхийн тухайтад зориулбал нэн сайн юм. Мөн яг одоо зовж шаналж буй хүмүүс сааралтгүй түргэнээ эрх чөлөө, аз жаргалыг эдлэхийн тухайтад буянаа зориулах нь зүйтэй. Чингэж хамтдаа буян хураах замаар бид Төвөдийн үйл хэргийг шударга ёсны дагуу үтэр түргэн шийдвэрлүүлэхийн төлөө хичээх учиртай.
Бидний таамаглаж байсанчлан, Төвөдөд "хатуу цохилт өгөх" кампанит ажил дахин эхэлж, ихэнх хотод зэвсэгт хүчин, цэргийн хяналт тогтоогоод байна. Хүсэл зоригоо жаахан ч атугай илэрхийлж зүрхэлсэн хүмүүс хаа сайгүй эрүү шүүлтэд орж, хоригдож байна. Ялангуяа сүм хийдүүдэд тусгай хориг тавьж тогтоож, эх оронч үзлийг төлөвшүүлэх сонсгол сургалтыг эхлүүлж, гаднын аялагч жуулчдыг нэвтрүүлэхийг хязгаарлажээ. Мөн Төвөдийн сар шинийн баярыг тусгайлан тэмдэглэх өдөөн хатгасан тушаалууд гаргасан байна. Энэ бүх үйл явдлыг харахад, Төвөдийн ард түмнийг тэвчих аргагүй харгислал, дарамтад оруулж, эсэргүүцэл үзүүлэхээс өөр аргагүйд байдал хүргэх гэсэн санаа цаана нь цухалзаж байгаа нь тодорхой байна. Ард түмэн эсэргүүцэн босвол эрх баригчид урьд өмнө хэзээ ч байгаагүй, төсөөлшгүй хүчтэй дарангуйллын үйл ажиллагаа хэрэгжүүлэх болно. Иймд олон төвөд хүний алтан амь үрэгдэхээс сэргийлж, эрүү шүүлт, зовлон шаналал амсахгүй байхын тухайтад би Төвөдийн ард түмэнд энэ бүхэнд хүлээцтэй хандаж, дээрх өдөөн хатгалгад автахгүй байхыг анхааруулан уриалж байна.
Төвөдөд суугаа үндэс угсаа нэгтнүүдийнхээ урам зориг, шийдэмгий дайчин чанар, гаргасан золиосыг ихэд бахдан биширч явдгийг минь үгээр хэлэх юун. Гэсэн хэдий ч амь насаа үрэх замаар утга учиртай үр дүнд хүрнэ гэдэг бэрх. Хамгийн гол нь хүч үл хэрэглэх зарчмыг баримтлахаа бид амласан тул энэ замаас хазайхгүй байх нь чухал билээ.
Төвөдийн ард түмэн дарангуйлал, тамлал зовлонгоос ангижирч, эрх чөлөө, жаргалыг эдлэх болтугай хэмээн дахин залбиръя. Хамаг амьтан амгалан байх болтугай.
Далай лам
2009 оны 2-р сарын 25
(Төвөдийн цаг тооллын шороон үхэр жилийн шинийн нэгний өдөр)
Орчуулсан Д.Дуламжав
