Зураг. Дэлхийн төвөд мэргэжилтнүүдийн холбооны (GTPN) гишүүд 2009 оны 9 дүгээр сарын 6-ны өдөр Дээрхийн гэгээн Далай ламд мөргөж буй нь... Зургийг GTPN.
Энэтхэг, Шинэ Дели. 2009 оны 9 дүгээр сарын 6. Тэдний нүдэнд нулимс цийлэгнэн, хоолой нь чичирч байлаа. Хурц үгтэй хуульчдаас эхлээд мэс заслын эмч нар, хатуу зарчимт захиргааны ажилтнуудаас эхлээд шаргуу хөдөлмөрлөдөг бизнес эрхлэгчид хүртэлх олон салбарын мэргэжилтнүүдээс бүрдсэн энэ бүлгийн хүмүүс сэтгэл хөдлөлөө барьж чадсангүй. Магадгүй Дээрхийн гэгээн Далай лам өөрөө ч мэдэлгүй хүн бүрд ийм сэтгэгдэл төрүүлдэг биз ээ.
Шинэ Дели хотын 40 гаруй төвөд мэргэжилтэн Таж Махал зочид буудалд Дээрхийн гэгээн Далай лам болоод Төвөдийн Засгийн газрын тэргүүн, профессор Самдан ринбүүчитэй уулзах завшаан тохиов. Энэ мэргэжилтнүүд бол Энэтхэг, Хойд Америкт салбар нэгжтэй, өргөжин тэлж буй Дэлхийн төвөд мэргэжилтнүүдийн сүлжээ (GTPN)-ний гишүүд юм. Уулзалтыг Шинэ Дели хотын Дээрхийн гэгээн Далай ламын Тамгын газар болон “Алсын харааг бодит болгохуй” төслийн дэмжлэгтэйгээр зохион байгуулжээ. Уулзалтын зорилго нь Дээрхийн гэгээнд GTPN-ийн үйл ажиллагааг танилцуулж, сүүлийн үеийн ажлынхаа талаар мэдээлэл өгөх явдал байв.
Дээрхийн гэгээн оролцогчдод хандан, “Та бүхэн өөр өөрийн салбарт ажиллаж буй төвөд хүний хувьд ард түмнээ төлөөлөх үүрэгтэй. Төвөд хүмүүсийг би бээр машид шударга гэж үздэг бөгөөд хүмүүс ч тэдэнд итгэдэг. Та бүхэн энэ итгэлийг дааж явах ёстой юм шүү” хэмээн айлдав. Тэрбээр цааш нь мэргэжилтнүүдийн хувьд шударга зан чанар амьдралын хэв маяг болох ёстойг онцолжээ. “Та бүхэн эхэндээ урам хугарах зүйлтэй тулгарч магадгүй юм. Шударга байсныхаа төлөө хохирох ч үе гарч болно. Гэвч шударга байдал нь урт хугацаандаа үр өгөөжөө өгдөг. Тиймээс та бүхэн бүгд шударга амьдрах ёстой” хэмээн Дээрхийн гэгээн Далай лам айлджээ.
Төвөдийн Засгийн газрын тэргүүн, профессор Самдан ринбүүчи ч мөн мэргэжлийн ур чадвартай, ёс зүйтэй байхын чухлыг онцлон, “Ажил хийх эсвэл тодорхой ажлыг сонгоход мөнгө цор ганц шалгуур байх ёсгүй. Нийгэм, хамт олны хэрэгцээг хангах талаас нь авч үзвэл энэ нь хүн бүрд тустай байх болно. Та бүхэн ажилдаа чин сэтгэлээсээ хандаж, тууштай ажиллах ёстой” хэмээсэн юм.
Самдон ринбүүчи, Дээрхийн гэгээн тэргүүт нар төлөвшсөн, хариуцлагатай төвөд хүн болохын тулд төвөд үндэстний онцлог, уламжлалт үнэт зүйлсийг орчин үеийн мэдлэгтэй хослуулах шаардлагатайг онцгойлон сануулжээ. Дээрхийн гэгээн, “Би төвөд хүн гэдгээрээ бахархдаг. Та бүхэн ч мөн адил бахархах ёстой. Төвөд нутагтаа амьдарч буй хүмүүс хятадууд бидэнд юу ч хийсэн бууж өгөхгүй гэдэг. Тэд ийм бат хатуу байхад бид яаж бууж өгөх билээ. Тэгвэл ичгүүртэй хэрэг болох бус уу? Тиймээс төвөд хүн гэдгээрээ бахархаж яваарай” хэмээн захив.
Оролцогчид Дээрхийн гэгээн Далай лам, Самдан ринбүүчийн хамтаар зургаа татуулснаар уулзалт өндөрлөжээ. Үүний дараа GTPN-ийн гишүүдийн тусгай уулзалт болсон байна.
