Дээрхийн гэгээн Далай лам өглөөний 9:00 цагт зочид буудлаасаа хөдөлж, "Энэрэн нигүүлсэхүй дэлхийн энх тайвны тулгуур багана" сэдэвт олон нийтийн илтгэл тавихаар Флорида Атлантик Их сургууль (ФАИУ)-ыг зорив. ФАИУ-д ирээд Дээрхийн гэгээн хагас цагийн турш хэд хэдэн хувийн уулзалт хийсний эцэст 10:00 цагт тайзан дээр гарч, Флоридагийн хэдэн мянган үзэгчдэд хандан илтгэлээ эхлүүллээ.
Флорида Атлантик Их сургуулийн ерөнхийлөгч Жон Притчетт Дээрхийн гэгээнийг тайзан дээр угтаж, өнөөгийн түгшүүртэй цаг үед нэн шаардлагатай үнэт зүйл болох энэрэн нигүүлслийн талаар ярихаар хүрэлцэн ирсэн явдлыг нь нэр төрийн хэрэг хэмээн хүлээн авч байгаагаа илэрхийлэв. Тэрбээр Дээрхийн гэгээнийг "үнэхээр итгэл үнэмшлийнхээ дагуу амьдардаг" хүн хэмээн тодорхойллоо. Дээрхийн гэгээн үзэгчдэд өөрийгөө Энэтхэг улсын элч хэмээн танилцуулав. Тэрбээр хэлэхдээ нэгдүгээрт, буддын шашны үнэт зүйлс болон буддын ном Энэтхэгээс гаралтай. Хоёрдугаарт, Дээрхийн гэгээний номлодог шашны эв нэгдлийн талаар ойлголт нь мөн л эртний Энэтхэгийн зарчим бөгөөд олон мянган жилийн турш Энэтхэгчүүд шашны олон ургальч үзлийн баримталж ирсэн хэмээлээ. Дээрхийн гэгээн цааш үргэлжлүүлэн, шашны эв нэгдэл, үл хүчирхийллийн зарчим нь Энэтхэгийн уламжлалт үнэт зүйлс байсан хэмээгээд, "Би өөрийгөө Энэтхэгийн элч гэж үзэхдээ бахархалтай байдаг" гэсэн байна.
Дээрхийн гэгээн мөн харилцан ойлголцол, энх тайван, хүчирхийлэлгүй байдлыг сурталчлах зорилготой ФАИУ-ийн "Энх тайвны долоо хоног"-ийн үйл ажиллагааг өндрөөр үнэлж буйгаа илэрхийлэв. Тэрбээр “Өөр хэл, өөр соёл, өөр үндэстэн - энэ бүгд хоёрдогч зүйлс. Үндсэндээ бид бүгд хүн төрөлхтөн" гээд, чин сэтгэлийн инээмсэглэл гэдэг "хүнд байдаг өвөрмөц бэлэг", мөн хүмүүст хайр энэрлээр хандвал эргээд хайр энэрлээр хариулдаг болохыг онцоллоо. Бид бүгдээрээ эхээс төрсөн бөгөөд тэд бидэнд ойр дотно, салшгүй холбоотой байх мэдрэмжийг төрүүлдэг тул бид бүгд энэрэн нигүүлсэх ижил чадамжтай гэж Дээрхийн гэгээн үргэлжлүүлэн ярив.
Дээрхийн гэгээн энэрэнгүй сэтгэлийг хоёр түвшинд хуваан тайлбарлалаа. Эхний түвшин болох биологийн үндэслэлтэй энэрэл нигүүлсэл нь найз нөхөд, гэр бүлээ илүүд үздэг, хандлагатай холбоотой, тийм ч учраас хязгаарлагдмал байдаг бол харин хоёр дахь түвшин нь хэнийг ч ялгаварладаггүй, объектив, хандлага бус харин хувь хүнээс хамаарна. Бид энэ хоёр дахь түвшний энэрэл нигүүлслийг төлөвшүүлж сурах хэрэгтэй хэмээн Дээрхийн гэгээн сургалаа. Тэрбээр жинхэнэ амар амгалан гэдэг хайр, энэрэл нигүүлслээс үүсэх бөгөөд ийм жинхэнэ дотоод амар амгалан байж байж л дэлхий дээр тогтвортой энх тайван тогтох боломжтой хэмээв.
Илтгэлээ дуусгаад Дээрхийн гэгээн АНУ-ын Конгрессын гишүүн асан Бенжамин Гилман болон түүний гэр бүлтэй товчхон уулзаж, дараа нь зочид буудал руугаа буцлаа.
Дээрхийн гэгээн үдээс хойших хөтөлбөрийнхөө хүрээнд Брауард коллежид зочилж, тус бүс нутгийн зургаан коллеж, их сургуулийн ерөнхийлөгчидтэй "Өнөөгийн даяаршсан нийгэм дэх дээд боловсролын үүрэг хариуцлага" сэдэвтэй хэлэлцүүлэгт оролцов. Үүнд Нова Зүүн Өмнөдийн Их Сургууль, Флоридагийн Семинол Мужийн Коллеж, Таллахассигийн Нийтийн Коллеж, Флоридагийн бие даасан коллеж, их сургуулиудын нийгэмлэг, Линний Их Сургууль, Флоридагийн Мемориал Их Сургуулийн ерөнхийлөгчид байлаа.
Нова Зүүн Өмнөдийн Их Сургуулийн ректор Рэй Ферреро уг арга хэмжээг удирдан явуулав. Ерөнхийлөгчид Дээрхийн гэгээнээс дэлхий нийтийн иргэдийг сурган хүмүүжүүлэх үүрэг хариуцлага, хамт олны доторх хувь хүний үнэ цэнэ, дотоод амар амгаланг олж авах талаар түүний үзэл бодлыг асууж ярилцсан байна.
Ректор Ферреро Дээрхийн гэгээний технологийн талаарх үзэл бодлыг асуухдаа саяхан нээгдсэн түүний "Твиттер" хуудсыг дурдлаа. Дээрхийн гэгээн "Ерөнхийдөө технологи бидний амьдралыг хялбар болгож байна. Үнэхээр их үнэ цэнэтэй" хэмээн хариулаад, цааш үргэлжлүүлэхдээ, гэсэн хэдий ч технологийг бүтээлчээр, эсвэл хор хөнөөлтэй байдлаар ашиглах нь тухайн хувь хүний сэдлээс бүрэн хамаарна хэмээв. Технологид өөрт нь ямар нэг ухамсар, сэдэл байхгүй. Дээрхийн гэгээн мөн хүний тархийг амьд технологи гэж үзэж болох бөгөөд түүнийг бүтээлчээр ашиглах эсэх нь бас л бидний сэдлээс хамаарна хэмээсан байна.
Өөрчлөлтийн тухайд гэвэл өөрчлөлт эхлээд нэг хүнээс, дараа нь арав, дараа нь хэдэн мянган хүнээс гарах хэрэгтэй учраас санаачилга үргэлж хэн нэгэн хувь хүнээс эхлэлтэй байдгийг Дээрхийн гэгээн онцлов.
Тэрбээр мөн үзэгчдийн дунд байсан деканууд, багш нарт хандан орчин үеийн боловсролын үүрэг нь оюутнуудын оюуны чадамжийг хөгжүүлэхээс гадна ёс суртахууныг давхар төлөвшүүлэх явдал болохыг анхаарч үзэхийг уриалаад, тэдний үеийнхэн хойч үедээ зөв замыг зааж өгөх ёстой болохыг санууллаа.
Дээрхийн гэгээн Далай лам энэ орой АНУ-аас Энэтхэгийг зорин ниссэн байна.
