Чили улс, Сантьяго хот. 2006 оны 5 дугаар сарын 6. Дээрхийн гэгээн өнөөдөр Чили улсад хийсэн 4 өдрийн айлчлалаа өндөрлүүллээ.
Дээрхийн гэгээн энэ өглөө Чилийн Тээврийн сайд Серхио Эспехо Яксег хүлээн авч, 30 минутын турш тусгайлан уулзжээ.
Дараа нь Сантьяго хотын хамгийн спортын ордон “Сантьяго Арена”-д “Оюун судлахуйн найман бадаг” сэдвээр 2 цагийн айлдвар айлджээ. Сургаалыг 2500 гаруй хүн сонссон бөгөөд оролцогчдын дийлэнх нь буддын шашинтан биш байв. Дээрхийн гэгээн айлдвар айлдсаныхаа дараа хэвлэл мэдээллийн төлөөлөгчийн хамтаар О’Хиггинсийн цэцэрлэгт хүрээлэнгийн “Төвөдийн талбай”-д мод тарих ёслолд оролцсон юм.
Арга хэмжээний дараа 1992, 1999 онд Чили улсад хийсэн өмнөх айлчлалуудыг зохион байгуулж байсан хүмүүс мөн Чилийн Төвөдийн соёлын холбоо, Дрикун Кагьюгийн төв, Шамбала төв, Зэн төвийн удирдлагуудыг хүлээн авч уулзжээ. Тэрбээр буддын шашны удирдагчдад зан үйл, ёслолыг хадгалан үлдээхээс гадна Бурхан багшийн сургаалын мөн чанар, буддын гүн ухааныг хүмүүст түгээн дэлгэрүүлэхэд илүү анхаарахыг зөвлөсөн байна. Мөн устаж мөхөх аюулд ороод буй төвөдийн баялаг соёл иргэншил, өв уламжлалыг хадгалан хамгаалж, дэлгэрүүлэхэд туслалцаа үзүүлэхийг тэднээс хүсжээ.
Дараа нь чилийн хөгжимчид болоод Наваан Хэчокийг хүлээн авч уулзсан байна. Тэд Дээрхийн гэгээний олон нийтэд зориулсан айлдварын дараа оройн цагаар зохион байгуулсан Энх тайвны концертод оролцжээ.
Дээрхийн гэгээн энэ өдрийн үдээс хойш “Энэрэнгүй сэтгэлийн хүч” сэдэвт олон нийтэд зориулсан айлдвар айлджээ. Уг арга хэмжээнд 7000 гаруй хүн оролцсон байна. Чиличүүд ялангуяа залуу үеийнхэн Далай ламын сургаалыг ихээхэн сонирхон сонсжээ. 5 дугаар сарын 5-ны өдөр Дээрхийн гэгээн “Оюун санааг танин мэдэхүй” сэдэвт бүтэн өдрийн хуралд оролцсон байна. Тэрбээр уг хурлын “Шинжлэх ухаан хоорондын холбоос”, “Шинжлэх ухаан хийгээд оюун санаа” хэмээх хэлэлцүүлэгт олон орны эрдэмтэд, чиглэлийн мэргэжилтнүүдийн хамт оролцжээ. Тус хуралд 500 гаруй эрдэмтэн, мэргэжилтэн, судлаач, шинжлэх ухааны чиглэлээр суралцаж буй оюутнууд оролцсон байна. Олон эрдэмтэд төрөн гарсан Чилийн нийгэмд уг хурал онцгой анхаарлыг татаж чаджээ. Эрдэм шинжилгээний хурлын үеэр Дээрхийн гэгээн Чилийн Боловсролын сайд ноён Матин Зилич, Соёлын сайд Паулина Уррутиа, Дотоод хэргийн дэд сайд Фелипе Харбоэ Баскунан нартай уулзсан юм. Мөн Сантьягогийн хамба, кардинал Франсиско Хавьер Эррасурис Оссатай машид халуун дотноор уулзжээ. Далай лам, кардинал хоёр олон асуудлаар ижил байр суурьтай байсан тул уулзалт товлосон хугацаанаасаа нэлээд удаан үргэлжилсэн юм. Хоёр шашны тэргүүний уулзалтыг сурвалжлахаар 50 гаруй гэрэл зурагчин, сэтгүүлч уулзалтын өрөөний гадна хүлээж байв. Дээрх уулзалтуудаас гадна Колумбын ерөнхий консул Маурисио Авила, Сантьяго хотын Харвардын Их Сургуулийн салбар Дэвид Рокфеллерийн Латин Америк судлалын төвийн бүсийн хөтөлбөрийн захирал Стив Райфенберг нарыг хүлээн авч уулзсан байна. Дээрхийн гэгээн Чилид төрсөн, мэдрэл судлалын эрдэмтэн, талийгаач Франсиско Варелагийн гэр бүлийнхэнтэй хувийн, сэтгэл хөдөлгөм уулзалт хийжээ. Франсиско Варела нь Далай ламын орчин үеийн шинжлэх ухааны эрдэмтэдтэй хийх уулзалт яриаг эхлүүлсэн бөгөөд АНУ-ын Колорадо мужид төвтэй “Оюун ухаан ба амьдрал” хүрээлэнг Далай ламтай хамтран үүсгэн байгуулсан билээ.
