Энэтхэг улс, Баруун Бенгал муж, Силигури. Дээрхийн гэгээн Далай лам Польш улсын ерөнхий сайдаар дахин сонгогдсон Дональд Тускт баярын захидал бичиж илгээжээ.
Дээрхийн гэгээн захидалдаа, “Олон жилийн турш танай улс ардчиллын үнэт зүйлсийг зөвхөн эх орондоо төдийгүй хилийн чанадад түгээн дэлгэрүүлэхийн төлөө ихээхэн хүчин чармайлт гаргаж ирсэн билээ.
Таны үзэсгэлэнт оронд хэд хэдэн удаа айлчлах мөн тантай болон бидний эрхэм анд Лех Валенса тэргүүт бусад удирдагчтай олон удаа уулзах боломж олдсоныг би бээр нэр төрийн хэрэг хэмээн үздэг билээ.
Польшид айлчлах бүрд нийгмийн бүхий л давхаргын хүмүүс энэрэн нигүүлсэхүй, уучлал, хүлээцтэй байдал, сэтгэл ханамж, өөрийгөө сахин захирах чадвар зэрэг хүний суурь үнэт зүйлсийг түгээн дэлгэрүүлэх, шашин хоорондын эв нэгдлийг бэхжүүлэхийн төлөөх миний хүчин чармайлтыг сонирхон дэмжиж ирсэн юм. Надад үзүүлсэн нөхөрсөг хандлагад тань мөн төвөдийн ард түмэнтэй эв санааны нэгдэлтэй байгаад би гүнээ талархаж байна.
Өнөөдөр дэлхий ертөнц хүнд хэцүү цаг үеийг туулж байна. Гэсэн ч хүн төрөлхтөн нэгэн бүхэл бөгөөд бид бие биеэсээ харилцан хамааралтай гэдгийг ойлгох ухамсар улам бүр нэмэгдэж байна. Тиймээс нөхцөл байдал ойрын хугацаанд сайнаар өөрчлөгдөнө гэдэгт машид итгэж байна.
Польш улс дэлхийн энх тайван, аюулгүй байдлыг бэхжүүлэхэд чухал үүрэг гүйцэтгэх асар их боломжтой. Польш улсын ерөнхий сайдаар болон Европын Зөвлөлийн ерөнхийлөгчөөр ажиллаж байсан туршлагадаа тулгуурлан та хүчирхийлэл, зэвсгийн хэрэглээнээс ангид, илүү сайхан дэлхийг цогцлоох үйлсэд хувь нэмрээ оруулж чадна гэдэгт итгэлтэй байна.
Польшийн ард түмний хэрэгцээ, хүсэл эрмэлзлийг биелүүлэхийн төлөө, цаашид тулгарах сорилт бэрхшээлүүдийг даван туулахад тань өндөр амжилт хүсэн ерөөе” хэмээн бичжээ.
Дээрхийн гэгээн захидлынхаа төгсгөлд залбирал, сайн сайхан ерөөлийг өргөн дэвшүүлсэн байна.
