Энэтхэг, Карнатака, Мундгод. 2016.07.06 – Энэ өдөр Энэтхэгийн өнцөг булан бүрээс хүрэлцэн ирсэн олон лам хуврагууд, мөн төвөдийн энгийн сүсэгтэн иргэд олуулаа Дээрхийн Гэгээнтэн Далай Ламд урт наслахуйн даншүг өргөхөөр цуглацгаасан байлаа. Баярын үйл ажиллагааг гэлүгбийн шашны байгуулага болон Мундгод дахь төвөдийн Доегүлин суурингийн захиргаа хамтран тэмдэглэж байгаа аж.
Дээрхийн Гэгээнтэн Далай Лам түүний төрсөн өдрийн баярыг
тэмдэглэхээр цугласан 14,000 гаруй хүмүүсийн өмнө үг хэлж
байгаа нь. Энэтхэг, Карнатака, Мундгод, Брайбун хийд.
2016.07.06. Гэрэл зургийг Тэнзин Чойжор (ДЛО)Урт наслахуйн даншүг өргөх ёслол Брайбун хийдийн гол дуганы үүдэнд зохион байгуулагдав. Асар том асрын дор 14,000 гаруй иргэд цугласан байлаа. Үүнд орон нутгийн хүндэт зочид, христ болон муслим, хиндү шашны төлөөлөгч нар Дээрхийн Гэгээнтэн Далай Ламд хүндэтгэл үзүүлэхээр хүрэлцэн ирсэн байв. Тэд Дээрхийн Гэгээнтэнд дурсгалын зүйл бэлэглэн, урт наслахыг ерөөж байлаа. Дээрхийн Гэгээнтэн Далай Лам тэдгээр хүндэт зочидод хандан олон зуун жилийн турш хамтран эв найртай оршиж ирсэн Энэтхэгийн агуу их соёлд талархал илэрхийлэв. Тэрээр:
“Шашин хоорондын эв найрамдлын төлөө би ихэд хичээнгүйлэн ажиллаж байна. Та бүгдийг ч надтай нэгдэхийг уриалж байна.” гэсэн юм.
Дээрхийн Гэгээнтэн Далай Ламын төрсөн өдрийн бялууг дунд сургуулийн сурагч хүүхдүүд хуваалаа.
Энэ өдөр мөн Мундгод дахь төвөдийн Доегүлин суурин байгуулагдсаны 50 жилийн ойн баяр давхацсан юм. Үүнтэй холбогдуулан Дээрхийн Гэгээнтэн Далай Лам товч үг хэлэхдээ анх төвөдөөс дүрвэж ирсэн лам хуврагууд нэлээдгүй бэрхшээлтэй нүүр тулгарч байсныг дурьдсан юм. Төвөдөөс дүрвэн ирснийхээ дараа тэд Баруун Бенгал дахь дайны үед хорих лагерийн зориулалтаар ашиглаж байсан газарт суурьшсан бөгөөд маш хүнд нөхцлийн улмаас олон хүн насан эцэслэсэн байна. Тэрээр хүнд хэцүү цаг үеийг даван туулсан олон хөгшчүүлд талархал илэрхийлэхдээ тэдний ач тусаар өнөөгийн сайхан амьдрал бий болсон гэдгийг онцолсон юм.
Дээрхийн Гэгээнтэн Далай Лам Брайбун Лосалин дацангийн чойрын
шинэ тайлбайн нээлтэнд уригдав. Энэтхэг, Карнатака, Мундгод,
Брайбун хийд. 2016.07.06. Гэрэл зургийг Тэнзин Чойжор (ДЛО)Дараа нь Дээрхийн Гэгээнтэн Далай Лам Брайбун хийд дэхь Лосалин дацангийн чойрын шинэ тайлбан нээлтийн ёслолд уригдлаа. Тэрээр:
“Бид зөвхөн судар ном уншихыг чухалчилдаггүй. Бидний соёл уламжлал бол уншиж мэдсэн зүйлээ өөр хоорондоо хэлэлцэн мэтгэлцэх зарчмаар мэдлэг боловсролоо батжуулдаг. Энэ бол учир шалтгааныг эрхэмлдэг төвөдийн бурханы шашны үнэт өв билээ.” хэмээн тэмдэглэн хэлэв.
Дараа нь Дээрхийн Гэгээнтэн Далай Лам ахмадын асрамжийн газарт морилж өндөр настангуудтай уулзав. Өндөр настангуудтай уулзах үедээ тэднийг хүнд хүчир амьдралыг даван туулсныг магтахын зэрэгцээ шашин номдоо чин сүжигтэй байгааг мөн бас магтсан юм.
Маргааш Дээрхийн Гэгээнтэн Далай Лам Гоа мужийн зүг машинаар хөдөлж тэндээсээ Делигээр дамжин нисэж Дарамсала хотдоо очих болно.
