Австрали, Мельбурн хот 2011 оны 6 дугаар сарын 9 (Цэрэн Кинзомын мэдээ) – Дээрхийн гэгээн XIV Далай лам өнөө өглөө Шинэ Зеландаас Мельбурнд ирснээр Австралид хийх 11 өдрийн айлчлалаа эхлүүлэв. Түүнийг Австрали, Шинэ Зеланд, Зүүн Өмнөд Азид суугаа төлөөлөгч ноён Соннам Дагпо дагалдан ирсэн бол Австрали дахь Далай лам буюу (Dalai Lama in Australia Ltd ‘DLiA’) байгууллагын Ерөнхий менежер Линн Бэйн Дээрхийн гэгээн ийг Австралид хийж буй найм дахь айлчлалынх нь хүрээнд нисэх буудал дээр угтан авчээ.
Зураг. Австралийн Мельбурн хотод Дээрхийн гэгээн XIV Далай ламыг хүрэлцэн ирэхэд сүсэгтнүүд угтан авч буй агшин. Австрали, Мельбурн хот. 2011 оны 6 дугаар сарын 9. Гэрэл зургийг: Tөвөдийн мэдээллийн оффис
Мельбурн дахь Энэтхэгийн Консулын төлөөлөгч, орон нутгийн төвөдийн хамт олон болоод Австралийн дэмжигчдийн бүлэг мөн угтахад оролцов.
Хотын төв дэх зочид буудалдаа хүрэлцэн ирэхэд нь Австрали дахь Далай лам буюу (Dalai Lama in Australia Ltd ‘DLiA’)-ын удирдах зөвлөлийн гишүүд хүлээн авч, залуу төвөдүүд Таши Шёпа бүжгээр угтан мэндчилэв.
Өдрийн турш Дээрхийн гэгээн XIV Далай лам Австралийн нэр хүндтэй хэвлэл мэдээллийн байгууллагуудтай (Sydney Morning Herald, 9 дүгээр суваг, 10 дугаар суваг) ганцаарчилсан ярилцлага хийв.
Зураг. Австралийн Мельбурнд Дээрхийн гэгээн XIV Далай ламд алдарт Австралийн хөлбөмбөгийн тоглогч Харри О’Брайен бэлгэдлийн бөмбөг болон багийн хувцсыг гардуулж буй нь. Австрали, Мельбурн хот. 2011 оны 6 дугаар сарын 9. Гэрэл зургийг: Tөвөдийн мэдээллийн оффис
Үдээс хойш болсон хэвлэлийн бага хуралд 80 орчим сэтгүүлч оролцсон бөгөөд Дээрхийн гэгээн XIV Далай алм Төвөдийн ардчиллын хөгжил, хүнлэг чанар ба бүх нийтийн хариуцлагыг түгээн дэлгэрүүлэхийн төлөөх өөрийн тууштай байр суурь, Хятадын нийгэм-улс төрийн өөрчлөлтүүд болон нийгэм дэх хэвлэлийн үүргийн талаар өргөн хүрээтэй яриа өрнүүлэв. Жинхэнэ “австрали хэв маяг”-аар алдарт хөлбөмбөгчин Харри О’Брайен Дээрхийн гэгээнд Австралийн хөлбөмбөгийн бөмбөг болон багийн өмсгөлийг дурсгал болгон өргөн барьсан юм.
Австрали ба Шинэ Зеландын айлчлал нь Дээрхийн гэгээн XIV Далай лам улс төрийн эрх мэдлээ албан ёсоор шилжүүлсний дараах анхны гадаад айлчлал болж байна.
Дээрхийн гэгээн XIV Далай лам маргааш хөтөлбөрөө эхлүүлэх бөгөөд үүнд Вьетнамын буддын шинэ хийдийн нээлт, залуучуудын чуулга уулзалт болоод цагаачдын асуудлаар зохиогдох форум зэрэг өргөн хүрээтэй арга хэмжээнүүд багтжээ. Үдээс хойш нь Мельбурн хотын Холбооны парламентын гишүүн түүний хүндэтгэлд зориулсан хүлээн авалт зохион байгуулах юм.
Англи хэлнээс орчуулсан T.Ялгуун
