Ирланд, Дублин хот. (Майв Коннолли) - Дээрхийн гэгээн XIV Далай лам Бүгд Найрамдах Ирланд Улсад хоёр өдрийн айлчлалаа эхлүүллээ. Тэрбээр энэ үеэр Дублин, Килдэр, Лимерик хотуудад зохион байгуулах олон арга хэмжээнд оролцож, мянга мянган хүнд хандаж үг хэлэх юм.
Зураг. Дээрхийн гэгээн XIV Далай ламыг Дублин хотын нисэх буудалд хүрэлцэн ирэх үед ноён Ричард Мур угтан авлаа. Ирланд, Дублин хот. 2011 оны 4 дүгээр сарын 12. Гэрэл зургийг Спирс.
Тэрбээр Мягмар гарагт Дублин хотод газардсан бөгөөд түүнийг хөгжиж буй орнуудын хүүхдүүдэд тусламж үзүүлдэг “Children in Crossfire” хандивын байгууллагын үүсгэн байгуулагч Ричард Мур угтан авчээ.
Дээрхийн гэгээн XIV Далай лам тус байгууллагын ивээн тэтгэгч бөгөөд тэрээр Ричард Мурыг “Миний баатар” хэмээн хүндэтгэн нэрлэдэг эрхэм найз нь юм.
Энэ нь Дээрхийн гэгээн XIV Далай ламын Ирландын Бүгд Найрамдах Улсад хийж буй гурав дахь удаагийн айлчлал бөгөөд хамгийн сүүлд 20 жилийн өмнө зочилж байжээ. Өчигдөр түүнийг Дублин хотын нисэх буудалд ирэхэд нь 1991 онд яг энэ газар авсан гэрэл зургийг үзүүлэхэд Төвөдийн буддын шашны удирдагч үүнийг хараад элгээ хөштөл инээж, “Би өөрчлөгдсөн байна уу?” хэмээн асуухад Ричард Мур “Та бүр залуужжээ” хэмээн хошигнож, Дээрхийн гэгээн XIV Далай лам “Ганц өөрчлөгдсөн зүйл нь шинэ шилтэй болсон явдал” хэмээн инээмсэглэн хариулжээ.
Энэ удаагийн айлчлалын урилгыг түүнд ноён Мур гардуулсан бөгөөд олон жил нөхөрлөсөн найзтайгаа дахин уулзсандаа машид их баяртай байв.
76 настай, цөллөгт буй төрийн тэргүүн Дублинд өнөөдөр буюу Лхагва гарагт зохиогдох “Possibilities-2011” сэдэвт нийгмийн өөрчлөлтийн чуулга уулзалтад оролцож, “Нийтийн хариуцлага” сэдвээр илтгэх юм.
“Possibilities-2011” арга хэмжээг Ирландын “Children in Crossfire”, “Афри” (Afri), “Спанаут” (Spunout.ie) зэрэг сайн үйлсийн гурван байгууллага хамтран зохион байгуулж байгаа бөгөөд иргэдийг улс орондоо болон дэлхийн хэмжээнд өөрчлөлт авчрах үйлсэд идэвхтэй оролцохыг уриалж байна. Өдрийн турш үргэлжлэх чуулгад 2000 хүн оролцох аж.
НҮБ-ын Хүний эрхийн асуудал хариуцсан дээд комиссар асан, Ирландын ерөнхийлөгч асан Мэри Робинсон уг арга хэмжээнд оролцож байгаа бөгөөд түүнчлэн олон олон уран бүтээлч, яруу найрагч, жүжигчин, илтгэгчид ч оролцож байна.
Дээрхийн гэгээн XIV Далай лам арга хэмжээний дараа Килдэр мужид очин, Гэгээн Брижидийн католик сүмд "Өндөр дээд нигүүлсэхүйн сүсэг бишрэл" сэдвээр илтгэх юм.
Нобелийн энх тайвны шагналт тэрбээр Баасан гарагт Лимерикийн Их Сургуулиар зочилж, “Уучлалын хүч” сэдвээр олон нийтэд үг хэлнэ.
Зураг. Дээрхийн гэгээн XIV Далай лам Дублин хот дахь зочид буудалдаа хүрэлцэн ирэх үеэр хүмүүстэй мэндчилж буй нь... Ирланд, Дублин хот. 2011 оны 4 дүгээр сарын 12. Гэрэл зургийг Дэнзин Tахла.
Өчигдөр Дээрхийн гэгээн XIV Далай ламын байрлаж буй зочид буудлын гадаа хүмүүс цугларч, түүнийг угтан авчээ. Tэдний дунд Ирландад оршин суудаг төвөд гэр бүлүүд мөн шашны сүсэгтэн хуврагууд байсан бөгөөд эмэгтэй хувраг хүж уугиулж, бэлэг барин угтан зогсож байв.
Ирландад хорь хүрэхгүй төвөд дүрвэгч байдаг бөгөөд олонх нь хүүхдүүдээ авчирч, Дээрхийн гэгээн XIV Далай ламын ивээлийг хүртэхээр ирсэн байв. Дээрхийн гэгээн тэднийг халуун дотноор угтан авч, нэгэн жаахан хүүхдэд адис хүртээн, шашны хүмүүсийн толгой дээр зөөлөн хүрч, ерөөл өргөжээ.
Багшийнхаа айлдварыг сонсохоор ирсэн хүмүүсийн дунд Дэнзин Чойдэн (Жинхэнэ нэр нь Маржори Кросс. Англиас гаралтай ч одоо Ирландын иргэн болжээ) байв. Тэрбээр сүүлийн 35 жил буддын шашныг шүтэж байгаа бөгөөд Дээрхийн гэгээн XIV Далай лам түүнийг 13 жилийн өмнө Дарамсала хотод хувраг болгож өргөмжилжээ.
Дэнзин Чойдэн “Багш минь Ирландын нутагт хөл тавьсан нь үнэхээрийн онцгой явдал. Дээрхийн гэгээний сэтгэл бүрэн нээлттэй хийгээд тэр бол жинхэнэ энэрэх нигүүлсэх сэтгэлийн биелэл” хэмээн сэтгэгдлээ хуваалцжээ. Тэрээр өөрийнхөө буддын шашинд орсон шалтгааныг “Гучин жилийн тэртээ хайрлах, энэрэх сэтгэлд төвлөрч, үүнийг илүү өргөн хүрээнд хөгжүүлэх аргыг заадаг нь надад тун их сэтгэлд нийцсэн” хэмээн тайлбарлажээ.
Нийтлэл бэлтгэсэн: Мэйв Коннолли
Англи хэлнээс орчуулсан T.Ялгуун
