Ирланд, Дублин хот. (Irishtimes.com) - Төвөдийн шашны тэргүүн Дээрхийн гэгээн XIV Далай лам санхүүгийн хямралыг даван туулахын төлөө тэмцэж буй ирландчуудыг урам хугарч, итгэл найдвараа алдахгүй байхад уриаллаа.
Бүгд Найрамдах Ирланд Улсад хорин жилийн хийж буй айлчлалынхаа эхний өдөр Нобелийн энх тайвны шагналт Дээрхийн гэгээн XIV Далай лам 2,000 хүний суудал дүүрэн бага хуралд үг хэллээ.
Зураг. Дээрхийн гэгээн XIV Далай лам, Ричард Мур нар Дублинд болсон “Possibilities” иргэний чуулга уулзалтын үеэр. Ирланд, Дублин хот. 2011 оны 4 дүгээр сарын 13. Гэрэл зургийг Дэнзин Tахла.
Эдийн засгийн хямралаас хамгийн их цохилт амсаж, түүхэндээ хамгийн өндөр өртөгтэй банкны хямралтай тулгарсан улсын тухай 76 настай Дээрхийн гэгээн XIV Далай лам хэлэхдээ “Мөнгө хүнийг аз жаргалтай болгодоггүй” хэмээн айлдав.
“Эцсийн дүнд аз жаргал, сэтгэлийн амар тайван байдал нь мөнгөөр бий болдоггүй. Анзаараад байхад тэрбумтнууд аз жаргалгүй хүмүүс байдаг. Асар их эрх мэдэлтэй ч дотоод сэтгэлдээ хэт их түгшүүр, дарамт дор оршин байдаг.
Тиймээс хаана ч очсон миний байнга хэлдэг зүйл бол амжилттай, аз жаргалтай амьдралын хамгийн гол эх булаг нь бидний дотор оршдог юм.”
Дээрхийн гэгээн XIV Далай лам Дэнзин Гьяцо энэхүү илтгэлээ Ирландын төрийн бус гурван байгууллагын хамтран зохион байгуулсан “Боломжууд” буюу "Possibilities" иргэний дээд хэмжээний чуулга уулзалтад илтгэсэн бөгөөд эдгээр байгууллагад түүний найз Ричард Мурын үүсгэн байгуулсан “Children in Crossfire”, Афри (Afri), Спанаут (Spunout.ie) нар багтсан байв.
10 настайдаа Хойд Ирландад Британийн нэгэн цэрэгт нүдээ сохлуулсан Ричард Мур “Энэхүү чуулганы зорилго нь санхүүгийн сүйрлийн ирмэгт байгаа хүмүүст хамтын мэдрэмжийг бий болгох явдал юм” хэмээв.
Зураг. Дублин хотноо болсон “Боломжууд” буюу “Possibilities” Иргэний чуулга уулзалтын үеэр 2000 оролцогч Дээрхийн гэгээн XIV Далай лам, Ричард Мур нарыг сонсож буй агшин. Ирланд, Дублин хот. 2011 оны 4 дүгээр сарын 13. Гэрэл зургийг Спирс.
Дээрхийн гэгээн XIV Далай лам ноён Мурыг өөрийн баатар хэмээн тодорхойлж, арга хэмжээний турш түүний гарыг дулаанаар атгаж байв. “Энэ дэлхий дээр хүмүүсийг урам зоригтой болгох хүн Дээрхийн гэгээнээс хэн ч байхгүй гэж би итгэдэг” хэмээн ноён Мур хэлсэн байна.
Уламжлалт улаан орхимжтой байсан Дээрхийн гэгээн XIV Далай лам Ирланд улсыг 1959 онд НҮБ-д Төвөдийн улс төрийн нөхцөл байдлыг хөндөх түүний санаачилгыг дэмжсэнээр гүн холбоотой болсон хэмээжээ. Тэр жилдээ Хятадын ноёрхлын эсрэг бослого бүтэлгүйтсэний дараа эх орноосоо дүрвэн гарч, Энэтхэгт амьдарч эхэлсэн юм.
Дээрхийн гэгээн XIV Далай лам өөрийгөө мөнгө санхүүгийн их мэдлэгтэй биш хэмээгээд, дэлхийн эдийн засгийн хямрал нь хэт ойрыг бодсон байдал, хэт их шуналаас үүдэлтэйг найзууд нь хэлсэн тухай дурджээ.
“Зөвхөн мөнгөнд найддаг хүмүүс ихэд зовдог. Хайр халамж, аз жаргал нь гэр бүлийн амьдрал дотоод амар амгаланг авчирна” хэмээн айлдлаа.
“Банкны хариуцлагагүй ажилтнуудыг уучлах ёстой юу?” гэж асуухад Дээрхийн гэгээн XIV Далай лам “Уучилна гэдэг нь мартана гэсэн үг биш” хэмээн хариулжээ.
“Хүмүүсийг шүүмжилж болох ч уур хилэн бодлыг чинь эрхшээхийг хүлээн зөвшөөрч болохгүй. Уур хилэн орж ирмэгц та аль нэг талд хэлбийдэг. Тиймээс таны шүүмжлэл жинхэнэ бодитой биш болно.”
Зураг. Дээрхийн гэгээн XIV Далай ламыг Килдэр мужийн сурагчид угтан авч буй нь... Ирланд, Килдэр хот. 2011 оны 4 дүгээр сарын 13. Гэрэл зургийг Дэнзин Tахла.
Дээрхийн гэгээн XIV Далай лам Ирланд улсаас долоо хоногт ойролцоогоор 1000 хүн ажил хайж, гадагшаа явж буйг онцолж, цагаачлалын сэдвээр үг хэлжээ. Тэрээр өөртөө итгэлтэй байж, шаргуу хөдөлмөрлөн, шийдэмгий байвал эдийн засгийн хүндрэлийг давна гэдэгт итгэж байгаагаа илэрхийлсэн юм.
Дублин хотын Ситивест (Citywest) зочид буудалд болсон арга хэмжээнд оролцсон танхим дүүрэн хүн түүний алиа хошин, чөлөөтэй илтгэхэд халуун алга ташилтаар угтав. Тэрбээр илтгэлийнхээ аль ч хэсгийг урьдчилан бэлдээгүй байжээ.
2 дугаар сарын 1-ны өдөр арга хэмжээний тасалбарыг худалдаанд гаргаснаас хойш тавхан хоногийн дотор 1200ш тасалбар зарагдсан бол 800 тасалбарыг залуучууд болон олон нийтийн байгууллагуудад хямдралтай үнээр борлуулан, заримыг үнэгүй тараажээ.
Дээрхийн гэгээн XIV Далай лам Ричард Мурын гарыг атган зогсохдоо хүн бүхэн дулаан энэрэнгүй сэтгэлтэй байхыг уриалсан бөгөөд энэ нь эрүүл мэндэд сайнаар нөлөөлдгийг дурджээ. Түүнийг тайзнаас буухад танхим дахин алга ташилтаар дүүрч, тэрбээр дэмжигчидтэйгээ мэндчиллээ.
Уг арга хэмжээнд Ирландын ерөнхийлөгч асан агаад НҮБ-ын Хүний эрхийн комиссар асан Мэри Робинсон үг хэлж, хөгжимчид болон Донегалын Мовилл дахь Еохан сургуулийн сурагчид жүжигчилсэн тоглолтыг үзүүлэн, бусад уран бүтээлчид үзүүлбэр үзүүлжээ.
Зураг. Дээрхийн гэгээн XIV Далай лам, Ричард Мур нар Бригидийн галыг барин Килдэрийн Гэгээн Бригидийн католик сүм рүү алхаж буй нь... Ирланд, Килдэр хот. 2011 оны 4 дүгээр сарын 13. Гэрэл зургийг Дэнзин Tахла.
Цөллөгт буй шашны тэргүүн Дээрхийн гэгээн XIV Далай лам дараа нь Килдэрт очиж, Бригидийн сүсэгтнүүдийн урилгаар зохион байгуулсан айлчлалынхаа хүрээнд нутгийн сургуулийн сурагчдын хөгжмийн мэндчилгээг таалан сонордов.
Түүнийг амьдралынхаа туршид энх тайвны төлөө хийсэн үйл хэрэг, хүчирхийллийг үл хүлцэх зарчимд үнэнч байсныг нь хүндэтгэн “Бригидийн гал”-ыг гардуулсан бөгөөд Дээрхийн гэгээн бээр дахин хэд хэдэн бэлэг хүлээн авсны дараа нь бясалгаж, Гэгээн Бригид Паришийн католик сүмд цугласан 700 орчим хүнд хандан үг хэллээ.
Дээрхийн гэгээн XIV Далай лам энэ сарын эхээр Төвөдийн төрийн тэргүүнээс буух шийдвэрээ албан ёсоор зарлаж, ард түмнээс сонгогдсон залгамжлагчаа ажилд нь оруулах болно хэмээн мэдэгдсэн билээ.
Маргааш тэрээр Лимерикийн Их Сургуульд “Уучлалын хүч” хэмээх тусгай илтгэл тавихаар төлөвлөж байгаа бөгөөд уг арга хэмжээний 3100 тасалбар бүгд хэдийн зарагдаад дуусжээ.
Энэ нь түүний Бүгд Найрамдах Ирланд Улсад хийж буй гурав дахь айлчлал билээ. Тэрбээр 1973 оны 10 дугаар сарын 11-нд тэрээр Ирландын тухайн үеийн ерөнхийлөгч Эрскин Чайлдерсын урилгаар нэг өдрийн айлчлал хийж, ерөнхийлөгчийн ордон “Áras an Uachtaráin”-д зочилж байсан юм. Дараа нь Нобелийн Энх тайвны шагнал хүртсэнээс хоёр жилийн дараа буюу 1991 оны 3 дугаар сард дахин айлчилж байв.
Англи хэлнээс орчуулсан T.Ялгуун
