Шинэ Зеланд, Крайстчерч хот 2011 оны 6 дугаар сарын 8 (Сам Сачдева, The Press) – Дээрхийн гэгээн XIV Далай лам газар хөдлөлтөд нэрвэгдсэн Крайстчерч хотын оршин суугчдад эерэг урам зоригтой байхыг уриалжээ.
Төвөдийн шашны тэргүүн Дээрхийн гэгээн XIV Далай лам Австралид хийх айлчлалаасаа өмнө хоёр өдрийн айлчлал хийхээр өчигдөр Крайстчёрчид ирэв.
Зураг. ЖОН КИРК-АНДЕРСОН / The Press
Энэхүү айлчлалыг Дээрхийн гэгээн XIV Далай лам өөрийн хүсэлтээр зохион байгуулсан бөгөөд тэрээр 2 дугаар сарын 22-ны газар хөдлөлтийн дараа Шинэ Зеландын Ерөнхий сайд Жон Кийд эмгэнэл илэрхийлсэн захидал илгээж байв.
Крайстчерчийн оршин суугчид алдсандаа харамсаж суухын оронд “урагшаа харж” сурах хэрэгтэй хэмээн тэр хэлэв. “Энэ мөчид бид урагшаа харах ёстой. Гутарч суухын оронд урагшаа харж, даван туул. Гэр орон, хот тосгоноо дахин босго.”
Дээрхийн гэгээн XIV Далай лам Крайстчерчийн нисэх онгоцоор дамжин явахдаа 50 гаруй хүн зураг авч, адис хүртэхээр цагаан хадаг өргөн барив.
Tүүнийг алхан өнгөрөхөд хүмүүсийн нүдэн нулимс цийлэгнэн байлаа.
Лувсан Намжил гэр бүлтэйгээ Дээрхийн гэгээн XIV Далай ламтай уулзахаар Уангарейгаас зорьж ирсэн хэмээжээ.
“Бид маш их догдолж, Дээрхийн гэгээнтэй уулзах болсондоо үнэхээр аз жаргалтай байна... Далай лам бол хамгийн эрхэм хүн” гэлээ.
Рози Томпсон Дээрхийн гэгээн XIV Далай ламыг хараад “өвдөг сулраад уначих шиг” болсон гэжээ.
“Дээрхийн гэгээн хүмүүсийн гуниг шаналал болоод асуудлыг ойлгуулж тайвшруулах гайхалтай арга барилтай. Бидний эргэн тойронд асар их гуниг хүрээлж, заримдаа хэзээ ч дуусахгүй мэт санагддаг. Гэхдээ хүмүүс ирж түүний ярилцлагыг сонсвол амьдралдаа жинхэнэ утга учрыг олох байх гэж найдаж байна” хэмээн тэр хэлэв.
Линда Гудвин энэхүү айлчлалыг хотод тохиосон “агуу адислал” хэмээн тодорхойлов.
“Дээрхийн гэгээн нинжин сэтгэл, энэрэх сэтгэл хийгээд зүрхнээсээ амьдрахын тухай сайн сайхан захиасыг дагуулж авчирлаа. Энэ гурван зүйл бол яг одоо бидэнд хамгийн хэрэгтэй байгаа зүйл.”
Дээрхийн гэгээн XIV Далай лам өнөөдөр үдийн 12 цагт CBS Кентербери Аренад үнэ төлбөргүй илтгэл тавьж, дараа нь газар хөдлөлтийн хохирогчид болон яаралтай тусламжийн ажилтнуудыг Крайстчерчийн эмнэлэгт очиж уулзах юм. Газар хөдлөлтөд өртсөн арван гэр бүл олон нийтэд нээлттэй арга хэмжээнд оролцоно хэмээлээ.
Англи хэлнээс орчуулсан T.Ялгуун
