Энэтхэг, Химачал Прадеш, Дарамсала, Тэгчэн Чойлин – Энэтхэгийн Ерөнхий сайд Нарендра Модийн 72 насны төрсөн өдрийн баярыг тохиолдуулан Дээрхийн Гэгээнтэн Далай лам халуун сэтгэлийн мэндчилгээ дэвшүүлж, аз жаргал, эрүүл энхийг хүсэн захидал илгээв.
Энэтхэг коронавирусын цар тахлаас үүдэлтэй сорилтуудыг амжилттай даван туулж байгаа нь гайхалтай" гэж Дээрхийн Гэгээнтэн захидалдаа бичжээ.
Хэдийгээр цар тахлын аюул бүрэн дүүрэн дуусаагүй байгаа ч Энэтхэг улс ирээдүйд учирч болох үүнтэй адил төстэй сорилтуудыг ч амжилттай даван туулж чадах нь эргэлзээгүй байна гэлээ.
Энэтхэг Улс хөгжин цэцэглэж, өсөн дэвжиж буй нь энэ улсад хамгийн олон жил амьдран сууж буй надад илтэд мэдрэгдэж, харагдаж байна. Одоо тус улс нь эдийн засгийн хувьд хүчирхэгжиж, шинжлэх ухаан, технологийн тэргүүлэгч орон болж байна. Хүчирхэг ардчилсан тогтолцоо бүхий Энэтхэг Улс нь энх тайван, тогтвортой байдлын үлгэр жишээ орон болж байна. Хүн ам нь хамгийн залуу байгаа нь ирээдүйд эерэг хүсэл эрмэлзэл, хөгжил цэцэглэлтийг бий болгох том нөхцөл шалтгаан юм. Энэтхэг Улс нь дэлхийд өөрийн зохих байр сууриа эзлэхэд хэдийн бэлэн болжээ.
Махатма Ганди 'ахимса' хэмээх хүч үл хэрэглэх тухай эртний Энэтхэгийн уламжлалыг дэлхий даяар түгээж, тунхаглаж чадсанд нь би гүнээ бишрэн хүндэлдэг гээд Дээрхийн гэгээнтэн цааш үргэлжлүүлэв.
"Миний хувьд энэхүү зарчмыг хаа ч очсон таниулан тү, 'каруна' буюу нигүүлсэнгүй сэтгэлийн хүч нь хүмүүн бидний аз жаргалтай, утга учиртай амьдралыг бүтээдэг гэдгийг ухааруулахын төлөө хичээн зүтгэж байгаагаа энд дахин онцлон тэмдэглэмээр байна. Эдгээр нь Энэтхэгийн уламжлалаас өвлөгдөн ирсэн үнэт эрдэнэс билээ.”
Дээрхийн гэгээнтэн захидлаа талархал илэрхийлэн өндөрлүүллээ.
"1959 онд биднийг эх орноосоо аргагүйн эрхэнд дүрвэн ирэхэд минь Энэтхэгийн Засгийн газар болон энэ орны элэгсэг ард түмэн халуун дулаан, өгөөмөр, зочломтой сэтгэлээ дэлгэн хүлээн авч, өнөөг хүртэл энэ л хэвээр хандсаар буй энэхүү завшааныг ашиглан дахин чин сэтгэлийн халуун талархал дэвшүүлж байна.”
Англи хэлнээс орчуулсан Б.Баярмаа
