Энэтхэг, Химачал Прадеш муж, Дарамсала хот, Тэгчин Чойлин - Өнөө өглөө, борооны улирлын өмнөх бүгчим халуунд Дээрхийн гэгээн Далай лам өргөөнөөсөө Намжил дацангийн гол дуган Зүглагхан руу гольфын тэргээрээ морилов.
Тэрбээр сэнтийдээ залран, тэнд цугласан олон мянган сүсэгтэнтэй хамт Манал бурханы залбирал уншиж эхлэв. Дээрхийн гэгээний удахгүй тохиох 90 насны ой болон Төвөдийн Төв Захиргаанаас зарласан "Энэрэл нигүүлслийн жил"-ийг тохиолдуулсан уг арга хэмжээг Сэра Мэ хийдийн лам хуврагууд зохион байгуулж, Шарпа Чоже ринбүүчи болон Сэра Мэ хийдийн хамба нар удирдан явуулав.
Сэра Мэ хийдийн унзад ламын хөтлөн явуулсан уншлагын үеэр цай болон бэрээс тараалаа. Уншлага түр завсарлахад Дээрхийн гэгээнтэн хэдэн жилийн өмнө өөрийн зохиосон Балдан Лхам бурханыг урин залах уншлагын аман дамжлагыг хүртээв.
Нэг цаг гаруй хугацаанд мөргөлд оролцсоныхоо дараа Дээрхийн гэгээнтэн хоёр талаар эгнэн инээмсэглэн зогсох хүмүүсийн мэндчилгээнд хариулсаар хийдээс гарч өргөө рүүгээ буцлаа.
Англи хэлнээс орчуулсан Б.Одгэрэл
