АНУ, Миннесота муж, Миннеаполис хот — 2011 оны 5 дугаар сарын 6-ны өдөр үдээс хойш Дээрхийн гэгээн XIV Далай лам хоёр өдрийн хөтөлбөрөө эхлүүлэхээр Рочестероос Миннеаполис руу замд гарлаа. Энэхүү хөтөлбөрийг Миннесота их сургууль болон Миннесотагийн Төвөд-Америкийн сан хамтран зохион байгуулжээ. Миннесота их сургуулийн ерөнхийлөгчийн өргөөнд болсон угталтын хүлээн авалтад хүрэлцэн ирэхэд нь төвөдийн иргэд ёслолын бүжиг толилуулж, дрожо чэма өргөн барив. Төвөдийн олон нийтийн ерөнхийлөгч Цеванг Нгодуп удирдах зөвлөлийн гишүүд болон зочдыг танилцууллаа.
Зураг. Дээрхийн гэгээн XIV Далай лам АНУ-ын Миннесота мужийн Сэнт Пол хот дахь Миннесота их сургуулийн ерөнхийлөгчийн өргөөнд хүрэлцэн ирэхдээ түүнийг угтан авч буй хүмүүс рүү даллаж буй агшин. АНУ, Mиннесота муж, Сэнт Пол хот. 2011 оны 5 дугаар сарын 6. Гэрэл зургийг: AP
Хүлээн авалтын үеэр дэд ерөнхийлөгч Том Салливан, ерөнхийлөгчөөр томилогдсон Эрик Калер, Сүсэг бишрэл ба эмчилгээний төвийн захирал Мэри Жо Крейтцер нар мэндчилгээ дэвшүүлэв. Тэд Дээрхийн гэгээн XIV Далай ламын энх тайвны үзэл санааг өндрөөр үнэлж, их сургуульд хүрэлцэн ирсэнд нь талархаж буйгаа илэрхийлээд энэ нь оюутнууд тэргүүтэй ирээдүйн залуу үеийнхэнд урам зориг өгч байна хэмээв. Дэд ерөнхийлөгч Дээрхийн гэгээн XIV Далай ламын захиасуудыг онцлон дурдсаны дараа ерөнхийлөгчөөр томилогдсон хүнийг танилцуулсан бөгөөд тэрээр Дээрхийн гэгээн XIV Далай ламд хүндэт докторын зэрэг олгохоор болсныг мэдэгдэж, энэ шагналд түүнээс илүү тохирох хүн үгүй гэв. Захирал Мэри Жо Крейтцер Дарамсалад байрлах Төвөдийн анагаах ухаан болон Зурхайн хүрээлэнтэй хамтран судалгаа хийхээр их сургууль түншлэл тогтоосныг Дээрхийн гэгээнд танилцууллаа.
Угталтын хүлээн авалтад Дээрхийн гэгээн XIV Далай ламыг угтан ирсэн хүмүүсийн дунд их сургуулийн удирдах зөвлөлийн гишүүд, Сэнт Пол хотын дарга Крис Коулман, Конгрессын гишүүн Бетти МакКоллум нар байв. Тэрээр Дээрхийн гэгээн XIV Далай ламд АНУ-ын Төлөөлөгчдийн танхимын дарга асан Нэнси Пелосигийн мэндчилгээг уламжлав.
Зураг. Дээрхийн гэгээн XIV Далай лам АНУ-ын Миннесота мужийн Миннеаполис хотод хүрэлцэн ирэхэд нь “Дрожо чэма” өргөн барьж буй агшин. АНУ, Mиннесота муж, Сэнт Пол хот. 2011 оны 5 дугаар сарын 6. Гэрэл зургийг: Таши Хонгцоцан
Өгүүлэлдээ Дээрхийн гэгээн XIV Далай лам өөрийгөө онцгой хүн биш, харин аз жаргалтай хүн төрөлхтний нийгмийг байгуулахад хувь нэмрээ оруулж буй нэгэн хэмээн даруухнаар илэрхийлэв. Тэрээр хүн төрөлхтний нийтлэг ашиг сонирхлыг харгалзан үзэх шинэ бодит байдлыг ойлгох шаардлагатайг онцлов. Жишээ болгон дэлхийн дулаарлын асуудлыг дурдаад энэ нь зөвхөн Төвөд эсвэл Америкт бус, бүх дэлхийд нөлөөлдөг гэлээ. Байгаль орчны талаар Копенхагенд болсон уулзалт бүтэлгүйтсэн нь засгийн газрууд өөрийн улсын эрх ашгийг дэлхийн эрх ашгаас дээгүүр тавьсантай холбоотой гэж хэллээ. Тиймээс зорилго нь нэг — эрүүл нийгмийг байгуулах тул хүн бүр хамтран ажиллах шаардлагатайг цохон тэмдэглэв.
Мөн Дээрхийн гэгээн XIV Далай лам хүний үнэт зүйлийг дэмжих, шашны эв нэгдлийг бэхжүүлэх өөрийн үүрэг амлалтуудын талаар дэлгэрүүлэв.
Дээрхийн гэгээн XIV Далай лам их сургуулийн төвөд анагаах ухааны чиглэлээр хийж буй судалгааг өндрөөр үнэлээд өөрийгөө төвөд анагаах ухааны “хуучин өвчтөн” хэмээн хошигнон дурдав. Төвөдийн анагаах ухааны уламжлал нь төвөд, энэтхэг, хятад, персийн анагаах ухааны нэгдэл бөгөөд энэ нь VIII зуунд төвөдийн эзэн хаан олон улсын шинжтэй эмнэлгийн бага хурлыг зохион байгуулснаас үүдэлтэйг тайлбарлав. Төвөдийн анагаах ухааны үр нөлөөний тухайд, Энэтхэгийн Засгийн газраас албан ёсоор хүлээн зөвшөөрөхөөс өмнө ч Дели хотын нэрт эмч нарын гэр бүлийнхэн зэрэг олон нэр хүндтэй хүмүүс төвөд эмчилгээ хийлгэж байсан гэв. Мөн одоо Энэтхэгийн Засгийн газраас гадна Польш дахь төвөд эмнэлэг ч албан ёсны хүлээн зөвшөөрөл авсан гэдгийг хэлэв.
Дараа нь Дээрхийн гэгээн XIV Далай лам зочид буудалдаа буцан очив.
2011 оны 5 дугаар сарын 7-ны өдрийн хөтөлбөрт нь хэвлэл мэдээллийнхэнтэй уулзах, төвөдийн нийгэмлэгт хандаж үг хэлэх, мөн хятад болон бусад орны оюутан, эрдэмтэдтэй уулзах арга хэмжээнүүд багтжээ.
Англи хэлнээс орчуулсан T.Ялгуун
