Зураг. Далай лам халууцсаны улмаас хувцсаа нимгэлжээ.
Шинэ Зеланд улс, Окланд хот. 2007 оны 6 дугаар сарын 17. Энгийн хэр нь ээ хүчирхэг Далай ламын энэрэл нигүүлсэл, сайхан сэтгэлийн тухай сургаал өчигдөр Окландын 10,000 орчим иргэний анхаарлыг татлаа.
Хилийн чанадад буй төвөдийн удирдагч халууны улмаас ламын хувцсаа нимгэлэн, англиар багахан түүртэн ярихдаа үзэгчдэд хандан, "Та бүхнийг би өөрийн гэр бүлийн гишүүн мэт хүлээн авч байна" хэмээжээ.
Тэрбээр Vector Arena-д хор хөнөөлт сэтгэл хөдлөлд автахын оронд энэрэн нигүүлсэх сэтгэлтэй байхын ач тусын талаар ярив. "Би тэрбумтан болон улс төрчдийг би, минийх, миний, намайг гэж ярихыг байнга сонсдог. Тийм хүмүүс зүрхний шигдээс тусах эрсдэл өндөр байдаг" хэмээн хошигнон, “Хүмүүс дотоод үнэт зүйлсдээ илүү их анхаарч, нийгмээ нэг гэр бүл мэтээр үзэх хэрэгтэй. Цэрэггүй, зэвсэггүй дэлхий ертөнцийн төлөө ажиллах шаардлагатай байна” хэмээгээд, цөмийн зэвсгийн эсрэг тухайн үеийн Шинэ Зеландын ерөнхий сайд асан Дэвид Лангегийн хийсэн гайхалтай алхмуудыг дурджээ. Окландын хотын дарга Дик Хаббард түүнийг "Ерөнхийлөгч Данж" биш, Дэвид Ланге хэмээн залруулсан байна.
Далай ламын сургаал, ухаарал хайрласан ярианы хажуугаар жижиг тотьны тухай түүх, ахтайгаа хамт хичээлээсээ чөлөө авч байсан тухай дурсамж, шөнийн цэнгээний газар явахаас илүүтэй сайн унтаж амрахын ач тусын талаар ч ярьжээ.
Ногоон намынхан ерөнхий сайд Хелен Кларкийг маргааш Веллингтон хотод Далай ламтай албан ёсны уулзалт хийхийг уриалсаар байна. Гэвч Хелен Кларк өнгөрсөн долоо хоногт Брисбэнд Далай ламтай ярилцсан бөгөөд түүнтэй дахин албан ёсоор уулзах төлөвлөгөөгүй байгаа ажээ.
1989 онд Нобелийн Энх тайвны шагнал хүртсэн Далай лам 1959 онд Төвөдийн коммунист дэглэмийн эсрэг бослого бүтэлгүйтсэний дараа Энэтхэгт дүрвэн гарсан юм. Төвөдийг цэргийн хүчээр захирдаг Хятад улс Далай ламыг Төвөдийн тусгаар тогтнолыг дэмжин сурталчилдаг үймээн дэгдээгч хэмээн үздэг. Хятад улс дипломат дарамт шахалт үзүүлэх замаар аливаа улсын засгийн газрын төлөөлөгчдийг Далай ламтай уулзах, эсвэл түүнд дэмжлэг үзүүлэхээс татгалзуулахыг эрмэлздэг.
Ногоон намын гадаад харилцааны асуудал хариуцсан төлөөлөгч Кит Локк хэлэхдээ “Ерөнхий сайд Бээжингийн дарамтад автаагүй гэдгээ харуулах цорын ганц арга нь Далай ламтай албан ёсны уулзалт хийх явдал байв. Манай ерөнхий сайдыг Хятадын засгийн газар ийнхүү өөрийнхөөрөө хөдөлгөж байхыг харах нь нэр төр гутаасан хэрэг" хэмээн хэлсэн юм.
Зураг. Дээрхийн гэгээн Далай лам тайзан дээр гарахад буддын шашны лам нар босож, хүндэтгэл үзүүлж буй нь... Зургийг Кенни Рожер.
Өнөөдөр Далай лам Гадаад хэргийн сайд Уинстон Петерстэй уулзах боловч Петерс энэ уулзалтад Гадаад хэргийн сайдын хувиар бус, New Zealand First намын даргын хувиар оролцоно. Тэрбээр мөн National намын Гадаад харилцааны асуудал хариуцсан төлөөлөгч Мюррей МакКаллитай уулзах бөгөөд энэ уулзалтын үеэр тус намын дарга Жон Кий мөн оролцох аж.
