Энэтхэг, Химачал Прадеш муж, Дарамсала хот. Дээрхийн гэгээн XIV Далай лам 3 дугаар сарын 12-ны өдөр Япон улсын ерөнхий сайд Наото Канд илгээсэн захидалдаа Япон улсад болсон газар хөдлөлт, түүнээс улбаалсан цунамигийн тухай мэдээг сонсоод, гүнээ цочирдон харамсаж байгаагаа илэрхийлсэн байна. Тэрээр амь үрэгдэгсдийн төлөө залбирч, тэдний гэр бүл болон энэ гамшигт өртсөн бүх хүмүүст гүн эмгэнэл илэрхийлжээ. Мөн Японы Засгийн Газрын гамшгийн үеийн бэлтгэл ажил, зохион байгуулалтын үр дүн асар сайн байж, үүнээс их хохирол, үүнээс олон хүний амь эрсдэхээс сэргийлж чадсанд талархах хэрэгтэйг онцлон дурдсан байна. Дээрхийн гэгээн XIV Далай лам өдөр бүр “Зүрхэн судар”-ыг уншдаг бурхны шашны хувраг хүний хувьд энэ үед Японы буддистууд уг судрыг унших нь тустай хэмээн үзсэн юм. Энэхүү уншлага нь амь эрсэдсэн хүмүүсийн тусын тулд байгаад зогсохгүй ирээдүйд гарах аюул гамшгаас сэргийлэхэд ч тус дэм болох боломжтой хэмээжээ. Иймээс Дарамсалад “Зүрхэн судар”-ыг 100,000 удаа унших залбирлыг зохион байгуулж байгаа талаар мөн дурджээ.
Англи хэлнээс орчуулсан T.Ялгуун
