Энэтхэг, Уттар Прадеш, Санкиса – Дээрхийн Гэгээнтэн Далай Лам Дарамсалагаас Дели хот руу нисч, дараа нь Уттар Прадеш мужийн баруун нутаг Фаррухабад хүртэл ахин нислээ. Энэтхэгийн Залуучуудын Бурханы шашны нийгэмлэг (YBSI), орон нутгийн удирдлагууд, парламентын гишүүд, дүүргийн шүүгч, цагдаагийн хэсгийн ахлах мэргэжилтэн зэрэг хүмүүс түүнийг угтахаар хүрэлцэн ирсэн байв. Фаррухабадаас тэрээр Энэтхэг дэх бурханы шашны найман их дагшин газрын нэг болох Санкиса руу хөдөллөө.
Санкасяа буюу Санкиса нь Бурхан Багш гучин гурван тэнгэрийн оронд төрөл авсан өөрийн эхдээ ном номлоод бууж ирсэн газар гэж үздэг юм. Үүний тэмдэг болгож Ашока хаан орой дээрээ зааны дүрстэй том баганыг босгосон байна. Өнөөг хүртэл тэрхүү баганы зарим нь хадгалагдсаар байгаа ажээ. Санкасяад 5-р зууны үед Хятадын алдарт Тансан лам хүрэлцэн ирж байсан ба мөн 7-р зуунд Шуанзан лам ч ирж байсан гэх тэмдэглэл бий. 1842 онд генерал Александр Канчинхам энэ газрыг дахин нээжээ.
YBSI-ийн 120 гаруй сайн дурынхан Дээрхийн Гэгээнтний байрлах зочид буудлын өмнөх зүлэг талбай дээр цугласан байв. Тэрээр хэдэн минут тэдэнтэй ярилцсан юм.
"Та бүхний урилгаар энэхүү ариун дагшин газарт би ахин ирээд байна. Ирэх өдрүүдэд бид дахин уулзах болно. Тиймээс одоо надад хэлэх зүйл алга. Хамгийн гол нь бид амьдралыг утга учиртай болгохыг хичээх нь чухал юм. Дэлхий дээр хүмүүс бие биентэйгээ тэмцэж, бие биенээ хөнөөж буй энэ үед бид хүчирхийллийн бус арга зам, энэрэн нигүүлсэхүйг хөгжүүлэх нь чухал байна. Хүчирхийллийн бус арга зам нь бидний сайхан сэтгэл, энэрэн нигүүлсэхүйгээс үүддэг.”
Тэрээр сайн дурын групптэй гэрэл зургаа авхуулаад дотогш орлоо.
Маргааш тэрээр Шантидева гэгээний "Бодьсадвын явдалд орохуй" номыг номлоно.
