Энэтхэг, ХП, Дарамсала - Дээрхийн Гэгээнтэн Далай Лам Энэтхэгийн ерөнхий сайд Шри Нарендра Модид 68 насных нь төрсөн өдрөөр баяр хүргэсэн мэндчилгээ илгээж, эрүүл энх, сайн сайхны ерөөлийг дэвшүүллээ.
Тэрээр мэндчилгээндээ “Энэтхэг орон бол дэлхий дээрх хамгийн олон хүн амтай ардчилсан орон төдийгүй, дэлхий дахинд бэлэг болгон барих үнэт зүйлийн өвтэй гэсэн бодол тээж явдгаа энэ дашрамд таньтай хуваалцахыг хүсч байна. Хүн төрөлхтний сайн сайхны төлөө тогтвортой байдал, шашин хоорондын эв зохицол, каруна, ахимса зэрэг үнэт зүйлсийн тухай ойлголтоо бусдад дэлгэрүүлэхэд Энэтхэг орон голлох үүрэг гүйцэтгэж чадна гэдэгт би бүрэн итгэлтэй байдаг. Таны мэргэн удирдлагын дор Энэтхэг улс цаашдаа ч цэцэглэн хөгжих болно6” хэмээжээ.
“Би өөрийгөө Энэтхэг орны элч хэмээн үздэг бөгөөд очсон газар бүртээ тэвчээр хатуужил, шашин хоорондын эв зохицлыг хадгалж ирсэн тус орны олон зуун жилийн уламжлалыг магтан ярьсаар ирсэн. Саяхнаас би эртний Энэтхэгийн мэдлэгийг дахин сэргээх үүргийг өөртөө хүлээгээд байгаа билээ. Сэтгэлийн сөрөг хандлагаа өөрчилж, дотоод үнэт зүйлсээ хөгжүүлэхэд нь энэ мэдлэг хүмүүст хэмжээлшгүй тус нэмрийг өгнө гэдэгт би итгэж байна. Орчин тойрны эрүүл ахуйг сахиснаар бие махбодь эрүүл байдаг шиг сэтгэлийн эрүүл ахуйг сахиж, сөрөг сэтгэлээ номхотгосноор сэтгэл санаа саруул болно. Энэ утгаараа эртний Энэтхэгийн агуу мэдлэг өнөөдрийн хүмүүст маш их хэрэгтэй гэдэгт би итгэлтэй байна."
С"этгэлийн амар амгаланг цогцлоох үүднээс эртний мэдлэгийг орчин үеийн боловсролтой хослуулж чадах бүрэн боломжтой ганц орон бол Энэтхэг орон юм. Энэтхэгт, ялангуяа залуучуудын дунд эртний өв уламжлалаа сэргээх сонирхол нэмэгдэж байгаад би их баяртай байна.”
“Энэтхэг орон бидний эх нутаг болсоор 59 жил болжээ. Эх орон нэгт төвөд иргэдийн нэрийн өмнөөс бидэнд агуу уужим сэтгэлээр хандаж ирсэн Энэтхэгийн засгийн газар, Энэтхэгийн ард түмэнд энэ завшааныг ашиглан чин сэтгэлийн гүн талархал илэрхийлье. Энэтхэг орны агуу өгөөмөр сэтгэлийн ачаар цагаачлалд байгаа бид эртний өв соёлоо хадгалж чадаж байгаа билээ.” хэмээн Дээрхийн Гэгээнтэн мэндчилгээндээ бичсэн байна.
