Энэтхэг, ХП, Дарамсала – Жаран есөн нас сүүдэр зооглосон өдрийг нь тохиолдуулан Дээрхийн Гэгээнтэн Далай Лам Энэтхэг улсын ерөнхий сайд Нарендра Моди-д баярын захидал илгээв. Тэрээр түүнд урт удаан нас, эрүүл энхийг хүсэн ерөөгөөд,
“Энэтхэг улсад урт удаан хугацаанд зочны хувиар амьдарч байгаа, энэ орны ирээдүйн төлөө гүнээ сэтгэл зовниж явдаг хүний хувьд таны хичээл зүтгэлийн ачаар ард түмний итгэл найдвар сэргэж байгааг тэмдэглэн, талархал илэрхийлье. Энэтхэг орны ололт амжилт нь зөвхөн Энэтхэгийн ард түмэнд үр өгөөжтэй төдийгүй, нийт хүн төрөлхтний хөгжилд жинтэй хувь нэмрийг оруулж байгаа билээ.
Өмнө нь танд өгүүлж байсанчлан, дорноос мандах наран лугаа агаар нэгэн эртний Энэтхэгийн агуу мэдлэгийг сүүлийн үед залуус улам их сонирхох болсонд би туйлын баяртай байна. Өнө эртнээс түүхтэй хүч үл хэрэглэх зарчим буюу ‘ахимса’, түүн дээр суурилсан энэрэнгүй үзэл ‘каруна’ нь өнөөгийн дэлхий дахинд чухал ач холбогдолтойгоос гадна нэн хэрэгтэй үзэл санаа мөн.
Эдгээр эерэг үзэл баримтлал, түүнчлэн сэтгэл хийгээд сэтгэл хөдлөлийн тухай гүн гүнзгий мэдлэг нь амар амгаланг бясалгах ‘шаматха’, юмсын гүнд нэвтрэн шинжлэх ‘випяшана’ бясалгалын үр шим гэж би боддог. Учир шалтгааны ухааны үүднээс дээрх үзэл баримтлалыг гаргаж түгээсэн Наландагийн уламжлалыг орчин үеийн боловсролтой хослуулж болно гэдэгт би итгэлтэй байдаг бөгөөд ингэх нь хүн төрөлхтний сайн сайхны төлөөх үйлс байх болно.
Би өөрийгөө Энэтхэг орны элч төлөөлөгч хэмээн үздэгийн хувьд, дэлхийн өнцөг булан бүрт хүмүүстэй уулзахдаа олон шашныг хүлээн зөвшөөрөх, олон ургальч үзэл гүн бөгөөд баттай нутагшсан, хамгийн их хүн амтай ардчилсан орон хэмээн Энэтхэг орноор бахархан ярих дуртай. Энэтхэг бол эв зохицол, тогтвортой байдлын үлгэр жишээ орон. Үүний баталгаа нь үндэсний болон мужийн түвшинд явагддаг тайван сонгуулийн үйл явц мөн” хэмээн захидалдаа өгүүлжээ.
“Гадаад оронд орогнон амьдарч байгаа төвөдүүд бидний хувьд Энэтхэг орон бол бидний оюун санааны хоргодох орон төдийгүй 60 гаруй жилийн турш бидний бодит орон гэр минь болсоор ирлээ. Энэ завшааныг ашиглан, биднийг халуун дотноор хүлээн авсан Энэтхэгийн засгийн газар, ард түмэнд чин сэтгэлийн талархал илэрхийлэхийг хүсч байна” хэмээн Дээрхийн Гэгээнтэн Далай Лам мэндчилгээнийхээ төгсгөлд цохон тэмдэглэсэн байна.
