Энэтхэг, ХП, Дарамсала – Дээрхийн Гэгээнтэн Далай Лам Энэтхэгийн бүх нийтийн сонгуулийн дүнг сонсоод ерөнхий сайдад Нарендра Модид захидал илгээн, Н.Моди тэргүүтэй эрх баригч Бхаратия жаната парти /BJP/ нам болоод уг намыг удирдагч Үндэсний ардчилсан эвсэл/NDA/ ялалт байгуулсанд баяр хүргэв.
Тэрээр захидалдаа ингэж бичжээ.
“Дэлхийн хамгийн том ардчилсан төр улс болох Энэтхэг нь олон улсад манлайлах түвшинд түрэн гарч ирч буйг хараад надад бахархалтай, бас магтаад баршгүй санагддаг. Энэтхэг бол дэлхийн дөрвөн том соёл иргэншил үүсэн цэцэглэсэн өлгий нутгийн нэг нь бөгөөд хүч үл хэрэглэх /ahiṃsā/ болон энэрэл нигүүслийг /karunā/” төр улсынхаа үндсэн онцлог болгон ирсэн юм.”
“Миний хувьд хүн төрөлхтөн нь энэ дэлхий дээр амьдрах нэгэн гэр бүл гэсэн үзэл баримтлал, шашин хоорондын эв нэгдлийг дэмжих, мөн эртний Энэтхэгээс эхтэй сэтгэл судлалын асар нарийн мэдлэг боловсролыг дахин сэргээхийг зорьж ажиллаж ирсэн билээ. Энэтхэг улс нь эртний мэдлэг болон өнөөгийн боловсролыг уялдуулснаар хүний сэтгэл хэрхэн амар тайван байж чадах арга замыг үнэн зөвөөр мэдэж чадах, улмаар бусдад түгээж чадах цорын ганц улс гэж би итгэдэг. Зөв хандлагууд эхнээсээ харагдаж эхэлсэн бөгөөд ялангуяа Энэтхэг залуучуудын дунд ийм боломжийг хайн судалж байгаа нь их ажиглагдаж байна. Үүнийг би тэдний хүсэл мөрөөдлийн илэрч буй тэмдэг гэж бодож байна.”
“Төвөдүүд бид өөрсдийн сэтгэлзүйн соёлын эх ундарга гэдэг утгаар нь Энэтхэг улсыг асар ихээр хүндэтгэж ирсэн юм. 8-р зуунд Төвөдөд уламжлагдсан Наланда их сургуулийн уламжлал нь бидний сэтгэлгээний соёлын хөгжилд туйлын том нөлөө үзүүлсэн билээ. 14-р зууны нэгэн нэрт төвөд эрдэмтэн “Буддын ухаан хэмээх мэдлэгийн гэрлийг Энэтхэгээс авчрах хүртэл Төвөд орон нь “Цастын орон” гэж нэрлэгддэг ч түнэр харанхуйд бүрхэгдсэн байсан” гэж хүндэтгэн хэлсэн байдаг.”
“Өнгөрсөн 4-р сард бид дүрвэн гарснаас хойшхи 60 дахь жилийн ой тохиож байна. Энэ завшааныг ашиглаад Энэтхэгийн засгийн газар болон Энэтхэгийн ард түмэн та бүхэндээ төвөд хүн бүрийг төлөөлөн чин сэтгэлээсээ талархал илэрхийлье! Бид дүрвэн гарч Төвөдийн эртний соёлын өвийг хадгалж чадсан нь Энэтхэгийн ард түмний уужуу тайван, эелдэг, нөхөрсөг сэтгэл гаргасны ач билээ.”
Төгсгөлд нь тэрээр: “Та аливаа асуудал бэрхшээлийг даван гараад Энэтхэг хүн бүрийн хүсэл зорилгыг биелүүлэх болтугай хэмээн хүсье!” гэж бичжээ.
