Энэтхэг, ХП, Дарамсала – Энэ өглөө Дээрхийн Гэгээнтэн Далай Лам Кивунимын ажилчид болон 51 оюутныг хүлээн авч уулзлаа. Хебревийн коллежийн дэргэдэх энэхүү байгууллага нь Иерасулимд бүтэн жилийн академик сургалт явуулдаг бөгөөд энэ хугацаанд 11 оронд аялал зохион байгуулдаг ажээ. Дээрхийн Гэгээнтэн Далай Лам тэднийг сүүлийн 60 гаруй жил амьдран сууж буй өөрийн өргөөндөө угтсан юм.
"Дэлхий дээр амьдран буй 7 тэрбум хүмүүс бүгд оюун санаа, сэтгэл хөдлөл, бие махбодиороо адил юм. Хэдийгээр та муслим, еврей, христ, мөн үүнээс өөр итгэл үнэмшилтэй байсан ч та бидний эхээс төрөх, эцэстээ насан эцэслэх зэрэг нь бүгд адилхан билээ. Бидний амьдрал эхийн хайраар тэтгэгдэж эхэлдэг ба хэрэв энэ үгүй бол бид амьд үлдэж чадахгүй.”
“Шинжлэх ухааны эрдэмтэд хүний үндсэн чанар энэрэнгүй болохыг судласан байна. Мөн тэд үргэлжийн уур хилэн, үзэн ядалт нь бидний дархлааны системийг доройтуулдаг болохыг ч нотложээ. Иймийн тул бид эрүүл байхын тулд биеийн эрүүл мэндийг сахидагтай адил аз жаргалтай байхын тулд дотоод сэтгэлийн эрүүл мэндийг ч сахих хэрэгтэй болж байна. Энэ нь сөрөг сэтгэл хөдлөлөө арилгах хэрэгтэй гэсэн үг ээ.”
Дээрхийн Гэгээнтэн цааш нь тайлбарлахдаа тэрээр хүний үнэ цэнийг хөгжүүлэх тал дээр өөртөө үүрэг хүлээсэн гэв. Учир нь хүмүүс өөрсдийн амьдралыг аз жаргалтай, баяр баясал дүүрэн өнгөрүүлэх бүрэн боломжтой гэж үздэг гэлээ. Үүний улмаас тэрээр шашин хоорондын эв нэгдлийг бэхжүүлэх тал дээр ч мөн адил үүрэг хүлээжээ. Учир нь адил бус үзэл онолыг үл харгалзан дэлхийн томоохон бүх шашин энэрэн нигүүлсэхүй, тэсвэр тэвчээр зэргийг номлодогоороо адил юм. Тэрээр бүтээгч Эзэн тэнгэрт чинхүү сүсэг бишрэлтэй болж чадвал бусад хүмүүсийг үнэхээр ахан дүүс минь мөн байна гэж харна гэсэн юм.
Дээрхийн Гэгээнтэн Далай Лам цааш нь ярихдаа шашны нэрийн өмнөөс зөрчил, тэмцэл явагдаж байгаад харамсаж явдагаа тайлбарлав.
"Шашин нь хүмүүсийг нэгтгэхэд машид дэм болдог байхад шашны нэрээр зөрчил, тулаан явуулж байгаа нь үнэхээр санаанд багтахгүй байна. Ялангуяа нэг шашны урсгалууд, жишээлбэл муслимын сүнни болон шиа урсгал өөр хоорондоо тэмцэлдэж байгаад нэн харамсаж байна. Ийм зөрчил Энэтхэгт үгүй билээ.”
Тэрээр 2011 онд өөрийн улс төрийн бүрэн эрх мэдлээ шинээр сонгогдон гарч ирсэн удирдагч нарт хүлээлгэн өгсөнөөс хойш Төвөдийн баялаг соёл, хэл уламжлалыг хадгалан үлдэх тал дээр бүрэн анхаарлаа хандуулж ажиллах болсноо дуулгав.
"Наландагийн уламжлал нь бодит үнэнд учир шалтгаан, шинжлэх ухаанч арга замаар ханддаг тул энэ нь бурханы шашны үнэт уламжлал юм.”
Төвөдийн байгал орчныг хамгаалах талаар тэрээр шинжлэх ухааны эрдэмтэд түүнд хэлэхдээ өндөрлөг газрын байгаль орчин нь эмзэг бөгөөд эргэн сэргэхэд урт хугацаа шаардагддаг гэж тайлбарласныг дурдав.
“Түүхийн эх сурвалжуудад 7,8,9 зууны үед Төвөд, Монгол, Хятад гэсэн гурван эзэнт гүрэн зэрэгцэн оршиж байсан гэдгийг тэмдэглэсэн байна. Гэвч өнгөрсөн цаг хугацаа хэдийнээ улиран оджээ. Өнөөгийн нөхцөл байдлыг сайтар тооцоолох хэрэгтэй. Бид Хятадаас салан тусгаарлах бодлого баримтлахгүй, БНХАУ-ын харьяалалд үлдэхэд бэлэн байна. Энэ нь бидэнд харилцан ашигтай хувилбар юм. Би хувийн ашиг сонирхолоос илүү нийтийн эрх ашигийг илүү тавьсан Европын холбоог биширдэг.”
Дээрхийн Гэгээнтэн Далай Лам зарим оюутнуудын асуултанд хариулсны дараа тэдэнтэй хамт зургаа татуулснаар энэхүү уулзалт өндөрлөсөн юм.
