2019 оны 7 дугаар сарын 6-ны төрсөн өдрөөр олон хүнээс халуун дулаан мэндчилгээ хүлээн авсандаа би чин сэтгэлээсээ талархан баярлаж байгаагаа илэрхийлмээр байна. Би 84 нас хүрсэн ч, цаашид ч үргэлж та бүхэнтэйгээ хамтдаа энэ өдрийг тэмдэглэж байх болтугай хэмээн хүсч байна.
Урд нь хэлж байсанчлан надад төрсөн өдрийн бэлэг илгээхийг хүсч байгаа бол, хамгийн том бэлэг маань миний гурван үндсэн үүргийг биелүүлэхэд тус дэм болох явдал юм. Түүний эхний үүрэг нь хүн төрөлхтөн дэлхий дээр амьдардаг нэгэн гэр бүл гэсэн ойлголтонд тулгуурлан хүний сайн сайхан чанарыг хөгжүүлж, илүү энэрэнгүй нийгмийг бүтээх, хоёрдугаарт - дэлхийн томоохон шашин хороондын эв нэгдэл, харилцан ойлголцлыг дэмжих, гуравдугаарт - Төвөдийн хэл соёл, мөн эртний Энэтхэгийн их багш нараас Төвөд хүмүүст дамжсан Наландагийн нандин уламжлалыг хадгалахын зэрэгцээ Төвөдийн хүрээлэн буй байгаль орчныг хамгаалахад хүчин зүтгэх юм.
Мөн би орчин үеийн нийгэмд амьдрах Энэтхэг залуучуудын дунд эртний Энэтхэгийн мэдлэгийг дахин сэргээх явдалд ч бүх хүчээ дайчилж байна. Энэрэнгүй сэтгэл болон халуун дулаан сэтгэлийг хөгжүүлэхийг одоогийн боловсролын хөтөлбөртөө тусгасан илүү Нэгдмэл /Холистик/ боловсролын хөтөлбөр хэрэгтэй гэж бодож байгаа учраас юм. Одоо дэлхий нийтээр бидэнд тулгараад байгаа тогтворгүй байдлын ихэнх нь өөрийн төөрөлдсөн сэтгэл хөдлөлд автан тэр сэтгэлээ зөв удирдаж чадахгүй байгаагаас шалтгаалж байна.
Тиймээс эртний Энэтхэгийн уламжлалд хадгалагдан үлдсэн сэтгэл болон сэтгэл хөдлөлийн үйл явцын талаарх ойлголт нь маш агуу бөгөөд одоогийн нийгэмд тохирсон зүйл гэж би боддог. Үүнийг шашны өнцгөөс бус хүний сэтгэлийн үндсэн хичээл дадлага болгож өөртөө авч хэрэглэх нь маш их үнэ цэнэтэй гэж бодож байна. Эрүүл байхад биеийн ариун цэвэр чухлын адилаар сэтгэлийн амгаланг олоход эрүүл саруул сэтгэл хөдлөлийг хадгалах нь чухал. Үүний тулд хөнөөлт сэтгэл хөдлөлийг зөв удирдах арга барилд суралцах шаардлагатай.
Ийм үзэл санааг би хаана ч хэзээ ч миний яриаг сонсохыг хүссэн бүх хүмүүстэй хуваалцая гэж боддог. Тэгээд хэрвээ та бүхэн надтай хамт энэхүү ажиллагааг дэмжвэл би туйлын баяртай байх болно.
2019 оны 7-р сарын 10 Дээрхийн Гэгээнтэн XIV Далай Лам
