Энэтхэг, ХП, Дарамсала - Өнөөдөр ирсэн мэдээний дотор Дээрхийн Гэгээнтэн Далай Ламын хуучны нөхөр Капила Вацяаяан таалал төгсөн тухай байсанд тэрээр түүний ах Шри Субаш Бхашид хандан захидал бичиж эмгэнэл илэрхийллээ. Тэрээр Капила Вацяаяаныг 1956 онд Энэтхэгт Будда Жаяанти 2500 жилийн ойн баярт оролцохоор Энэтхэгт анх ирсэн цагаасаа хойш мэддэг байснаа дурьджээ.
“Надад болон Төвөдүүдэд үзүүлсэн эх мэт сэтгэлийг нь хүндэтгэн би түүнийг “Амала” (Ээж минь) гэж дууддаг байсан юм. Төвөдийн буддист соёлыг хамгаалан үлдэх түүний хувийн хүсэл зорилгод нь би үргэлж талархан явж ирсэн билээ. Тэрээр 1970-аад онд Төвөд судлалын төв институтыг Варанаси дахь Сарнатад байгуулахад маш идэвхитэй оролцож байсан нь эртний Энэтхэгийн ‘ахимса’ ‘каруна’ уламжлалыг хөгжүүлэх гол цөм институт болон хөгжсөн юм.”
“Тэрээр Энэтхэгийн засгийн газрын соёлын яамны нарийн бичиг байхаасаа эхлэн тэтгэвэрт гарах хүртлээ Менежментийн институтын ТУЗ-ийн даргаар ажиллаж байсан юм. Мөн саяхныг хүртэл Шинэ Дели дэх Соёлын төвийн Төвөдийн хэсгийг голлон удидаж ажиллаж байлаа. Би түүнийг Төвөдүүдийн насан туршийн найз байсан гэж үздэг.”
“Бидний буддын соёлыг хадгалан үлдэхэд дэмжлэг үзүүлэн ажиллаж, чухал асуудлуудыг шийдэмгий арга барилаар ханддаг түүнд би гүн талархал илэрхийлмээр байна. Бид олон жилийн туршид хоорондоо холбоотой байсан ба хамгийн сүүлд өнгөрсөн жилийн 11-р сард Шинэ Делид уулзаж билээ.”
Дээрхийн Гэгээнтэн төгсгөлд нь, “Энэ таагүй мэдээ Энэтхэгүүд болон Төвөдүүдийн хувьд их хүнд байлаа. Бид бүхэн сайн найзаа алдлаа. Тэрээр Энэтхэгийн урлаг, соёлын салбарт манлайлагч нь байгаад зогсохгүй маш их утга учиртай амьдралыг туулж 92 насыг зооглов. Түүний эх үндэстнийхээ төлөө зүтгэсэн зүтгэл нь бүх хүнд итгэл найдварыг өгч байсан юм.” гэжээ.
