Энэтхэг, Бихар, Бодьгаяа – Өнөө өглөө Дээрхийн Гэгээнтэн Далай Лам Калачакра талбайн зүг явах үед Бодьгаяа орчмын цаг агаар дахин хүйтэрч, өтгөн манантай болсон байлаа. Тэрээр заншил ёсоор явах замд эгнэсэн хүмүүсээс аль болох олон хүмүүсийг харан мэндчилж байв.
Тайзнаас оролцогчид руу даллахад олон хүмүүс түүн рүү мөн даллав. Индэрт хүрэхээсээ өмнө тэрээр зарим лам нар болон зочидтой мэндчилээд тайзны ард болон эргэн тойронд өлгөсөн ариун нандин шүтээнүүдийг харан хүндэтгэл үзүүлэв.
Дээрхийн Гэгээнтнийг сэнтийндээ заларсан даруйд цаг алдалгүй Энэтхэгт дэх тайландчуудын ахлагч бөгөөд Тайландын хааны хийдийн хамба ламаар удирдуулсан 8 лам Мангала судрыг пали хэлээр уншив. Тэдний араас Японы лам, эмэгтэй хуврагууд, энгийн хүмүүсээс бүрдсэн 10 хүн "Билгүүний зүрхэн судар" -ыг япон хэлээр уншлаа.Тэдний араас 11 монгол лам, эмэгтэй хуврагууд, энгийн хүмүүс хамтдаа дахин "Билгүүний зүрхэн судар" -ыг монгол хэлээр уншив.
Дээрхийн Гэгээнтэн "Би өнгөрсөн жил эхэлсэн “Манзушрийн номын аймаг”-ийг үргэлжлүүлэн өнөөдөр, маргааш, нөгөөдөр өгөх болно. Энэ удаад үлдсэн хэсгийг бүрэн өгч дуусгана гэж найдаж байна.” хэмээгээд номын айлдвараа эхлэв.
"Эдгээр увидсууд бидэнд Лама Умаба Баву Доржоос дамжин ирсэн юм. Тэрээр багадаа хонь хариулдаг жаахан хүүхэд байхдаа Манзушри бурханыг харсан гэдэг. Би энэхүү дамжлагыг Дадаг ринбочегээс авсан билээ. Манзушри бурханыг бишрэн хүндэтгэх үүднээс хэлэхэд, тэрээр залуу төрхтэй бөгөөд түүний саруул мэргэн ухаан нь гурван ертөнцийн харанхуйг арилгадаг. Энэ нь материаллаг харанхуйг бус, мунхаг сэтгэлийн харанхуйг хэлж байгаа юм.
"Бүтээгч Эзэн тэнгэрийг шүтэгчдийн хувьд бурханд итгэх нь хангалттай. Харин Бүтээгч Эзэнд итгэдэггүй хүмүүс оюун ухаанаа бүрэн дүүрэн ашиглах хэрэгтэй болно. Оюун ухаанаа өөрчилж, цогц, саруул, хурдан бөгөөд гүн гүнзгий билиг оюуныг хөгжүүлэх хэрэгтэй. Эдгээр билиг оюуныг хөгжүүлэх, оюун ухаанаа дээшлүүлэхийн тулд олон хийдүүд буддын гүн ухааны нарийн сургалт явуулдаг. Ингэхдээ философийг учир шалтгаан ба логикийн үндсэн дээр суралцдаг юм.”
"Агуу их багш Шантаракшита, ловон Бадмасамбхава, Тисрон Дэзэн хаан нар Наландагийн уламжлалыг Төвөдөд нэвтрүүлсэн билээ. Энэхүү уламжлалыг хадгалан авч үлдэхдээ Төвөд хүмүүсийн дунд эхнээсээ л өвлөгдсөн учир шалтгаан ба логикийн арга барилыг хэрэглэдэг. Бид ном сургаалыг логикийн үүднээс судалж, дараа нь маргаан, мэтгэлцээн өрнүүлдэг юм.”
"Би бэлтгэл уншлага унших зуур та бүхэн Манзушир бурханы "Ум ара база на ди" тарнийг уншаарай. Энэхүү эхний авшигийг өгсний дараа би дараагийн ёслолын бэлтгэлийг хийнэ.
"Эдгээр өдрүүдэд та бүхэнд хүртээж буй даган соёрхол ба авшиг өгөх энэхүү үйл ажиллагаа цахим сүлжээгээр алс холын хүмүүст хүрч байна. Би эдгээр сургаалыг чин сэтгэлээсээ, энэрлийн сэтгэлээр түгээж буй билээ. Цахим сүлжээгээр итгэл үнэмшилтэй, сүсэг бишрэлтэй үзэж буй тэдгээр хүмүүс даган соёрхол ба авшиг хүртэх боломжтой. Бурхан Багшийн үед сүсэгтнүүд түүнтэй биечлэн уулзаж чадахгүй байх тохиолдол гарч байсан ч элч зардсаар дамжуулан гэлэн санваар хүртээж байсан байна. Энэхүү “Манзушрийн номын аймаг” нь ханьцашгүй дээд йогийн дантарт харьяалагддаг бөгөөд энд байхгүй байгаа ч итгэл үнэмшил, сүсэг бишрэлтэй үзэж буй хүмүүс хүлээн авах боломжтой.”
“Бид энэхүү хүмүүний амьдралыг олсон ба мэдээж зовохыг хүсдэггүй. Бид аз жаргалтай байхыг хүсдэг ч зовлон шаналал, түүнийг хэрхэн даван туулах талаар хангалттай анхаарал хандуулдаггүй. Аз жаргалын шалтгаанууд юу вэ гэдгийг бид нэг их боддоггүй. Гэвч бид оюун ухаанаа сахилга баттай байлгах арга замыг заадаг Энэтхэгийн уламжлалын нэг хэсэг болох Бурхан Багшийн сургаалтай учирсан байна. Гол асуудал бол бид зовж шаналах, эсвэл тааламжтай байх эсэх нь бидний сэтгэлийн төлөв байдлаас ихээхэн хамаардагт оршино.”
“Судар ба тантаруудад аз жаргалгүй байх хамгийн гол шалтгааныг хүний хувиа бодох аминч үзэл гэж үздэг бөгөөд ялангуяа энэ үзэл нь хүмүүс, юмс үзэгдлийг бодитой байдлаар оршдог гэсэн ташаа ойлголттой холбоотой гэж тодорхойлсон байдаг. Эдгээртэй тэмцэхийн тулд бид Бурханд аврал одуулж, Манзушри бурхан, Хутагт Нагаржуна болон түүний шавь нар, мөн Майдар гэгээний айлдсан ном сургаалийг үзэж судлах хэрэгтэй.Тэд Бурханы заасан зүйлийг зүрх сэтгэлдээ олсноор гэгээрэлд хүрсэн билээ. Би хүмүүст Бурхан Багшийн хөргийг өгөхдөө “Бидний багш” гэж тайлбарладаг. Бидний багш учраас түүний ном сургаальд бид суралцах ёстой.”
"Бурхан Багш урьд өмнө тоолшгүй гурван их галавт бодьсадвын (бодийн) сэтгэлийг хөгжүүлсэн бөгөөд дараа нь маш их буян, билиг билгүүнийг хуримтлуулсан байдаг. Эцэст нь тэр энэхүү онцгой газарт гэгээрэлд хүрсэн билээ. Энэ зам мөрд бид одоо ч орж болох юм.”
Энэхүү номын айлдварын долоо дахь авшиг нь Гухямасамажа тантарт багтдаг, хүчит Цагаан Дарь эх бурхантай холбоотой гэж Дээрхийн Гэгээнтэн тэмдэглэв. Бромдон гэгээн энэ бурхантай онцгой холбоотой байсан бөгөөд Төвөдийн ард түмний дунд ч өргөн дэлгэрсэн хэмээлээ.
Маргааш Дээрхийн Гэгээнтэн Хар Жэвзүнмагийн даган соёрхолыг өгөх болно.
