Энэтхэг, ХП, Дарамсала - Дээрхийн Гэгээнтэн Далай Лам оюун санааны дотны анд, арчбишоп Десмонд Туту таалал төгссөнийг мэдээд түүний охин Мфо Тутуд захидал бичжээ.
"Миний эмгэнэлийг хүлээн авна уу. Ээждээ болон гэр бүлийн бусад гишүүдэд ч мөн адил илэрхийлээрэй. Би түүний хойноос залбиран ерөөж байна."
“Та мэдэж буй, олон жилийн турш танай аав бид хоёрын нөхөрлөл үргэлжилсэн билээ. Бид хамтдаа 2015 онд Дарамсала хотод амар амгалан, баяр баясгаланг хэрхэн нэмэгдүүлэх талаар санал бодлоо хуваалцаж долоо хоногийг хамтдаа өнгөрүүлж билээ. Энэ мэт олон удаа хамтдаа цагийг өнгөрөөж байсныг дурсан санаж байна. Бидний нөхөрлөл, сэтгэл оюуны холбоо маань бидний эрхэмлэдэг үнэт зүйл байсан юм."
“Дэсмонд Туту олон олон ах, дүүсийнхээ сайн сайхны төлөө бүхнээ зориулдаг байсан юм. Тэр бол жинхэнэ хүнлэг, хүний эрхийн төлөө тууштай тэмцэгч байсан. Түүний Үнэн ба эвлэрлийн комиссын ажил нь дэлхийн бусад хүмүүст урам зориг өгсөн юм."
“Түүнийг нас барснаар бид үнэхээр утга учиртай амьдралаар амьдарсан агуу хүнээ алдлаа. Тэрээр бусдад, ялангуяа зовлонт хүмүүст үйлчлэхэд бүхнээ зориулдаг байв. Түүний сэтгэл оюуныг амьд байлгаж чадах хамгийн сайн хүндэтгэл бол түүний үйл хэргийг үргэлжлүүлж, бид ч бас бусдад хэрхэн тусалж чадахыг үргэлж эрэлхийлэх явдал гэдэгт би итгэлтэй байна."
