Миний 87 насны төрсөн өдрөөр чин сэтгэлийн халуун дулаан мэндчилгээ илгээсэн бүх хүмүүст баярласан талархсанаа илэрхийлж байна. Та бүхний энэхүү мэндчилгээ нь илүү амар амгалан, энх тайван нийгмийг цогцлоохын төлөө миний оруулсан өчүүхэн хувь нэмрийг үнэлсэн үйлдэл хэмээн хүлээн авч, талархаж сууна.
Бусдын төлөөх үйлсэд хүчин зүтгэж буй надад та бүхний чин сэтгэлийн үгс маш их дэмжлэг боллоо. Та бүгдийн надад өгч буй итгэл найдвар, урам зориг дэлхий дээр амьдарч буй 7 тэрбум гаруй хүн төрөлхтний сайн сайхны төлөө хувь нэмрээ оруулах хүсэл эрмэлзэл, зорилго зорилтыг улам бэхжүүлж өглөө.
Учир шалтгааны ухаанд суурилсан энэрэл нигүүлсэл нь бусдын сайн сайхны төлөө санаа тавихаас эхтэй бөгөөд үүнийг л хүн төрөлхтөн нэн чухалд авч үзэх хэрэгтэй.
Биднийг хүүхэд байхад ижий минь л анхаарал, халамж тавин, асрал энэрлийн сэтгэлээр хүмүүжүүлдэг шүү дээ. Энэрэл нигүүлслийн сэтгэлийг дадуулж амьдарвал бид өөрсдөө аз жаргалтай байхаас гадна гэр бүл, найз нөхдөдөө ч эерэг нөлөө үзүүлэх боломжтой.
Дотоод сэтгэлдээ энэрэл нигүүлслийн үрийг хүн бүр үндэслүүлж чадвал дэлхий илүү амар амгалан, энх тайван болох бодит хувь нэмрийг оруулж буй хэрэг юм.
Өнөөдөр бүхий л найз нөхдөдөө хандаж хэлэхэд, та шашин шүтдэг эс шүтдэгээс үл хамааран энэрэл нигүүлслийг сэтгэлдээ дадуулж, хэзээ ямагт, хэн байхаас нь үл шалтгаалан бусдад тусалж байгаарай. Өнөөдөр хэлэх гэсэн үгс минь энэ бөлгөө. Таши дэлэг!
