Энэтхэг, ХП, Дарамсала - Дээрхийн Гэгээнтэн Далай Лам Их Британийн ерөнхий сайдаар томилогдсонд нь баяр хүргэж өнөөдөр Риши Сунакт захидал илгээжээ.
Түүний захидалд "Сүүлийн хэдэн арван жилийн хугацаанд би Нэгдсэн Вант Улсад тогтмол зочлох боломжтой болсон бөгөөд нийгмийн бүхий л давхаргын хүмүүсийн энэрэл, нөхөрлөл надад үргэлж гүн сэтгэгдэл төрүүлж байсан юм. Мөн хүн төрөлхтний нэгдмэл байдал, шашин хоорондын эв найрамдлыг бэхжүүлэхийн төлөөх миний хүчин чармайлтыг тэд сонирхож, дэмжиж байсан нь надад урам зориг өгсөн билээ."
"Үүний зэрэгцээ би энэ завшааныг ашиглан Төвөдийн ард түмний эрх чөлөө, нэр төрийг эрхэмлэн дээдлэх хүсэл эрмэлзлийг тууштай дэмжиж ирсэн Их Британийн ард түмэнд гүнээ талархаж байгаагаа илэрхийлье."
"Энэ цаг үе маш хэцүү цаг үе юм. Өнөөдрийн харилцан хамааралтай ертөнцөд дэлхийн аль нэг хэсэгт болж буй үйл явдал бидэнд бүгдэд нь нөлөөлдөг. Тиймээс Нэгдсэн Вант Улсын ард түмний итгэл найдвар, хүсэл тэмүүллийг биелүүлэхэд тулгарч буй сорилтуудыг даван туулж, илүү энх тайван дэлхийг цогцлоох үйлсэд тань өндөр амжилт хүсье” гэжээ.
