Энэтхэг, УТ, Ладак, Лех - Дээрхийн Гэгээнтэн Далай Ламыг номын айлдварын талбайн асарт хүрэлцэн ирэхэд Ладакын Буддын шашны нийгэмлэгийн (LBA) дэд ерөнхийлөгч Церин Доржэй Лакрук уламжлал ёсоор мандал өргөж, бусад төлөөлөгчид хадаг өргөлөө.
Номын айлдварын эхэнд "Зүрхэн судар" уншив.
Дээрхийн Гэгээнтэн өнөөдөр Төвөдийн билгийн тооллын 6-р сарын шинийн нэгэн тул өглөө эрт Балдан Лхам сахиусанд залбирч, тахил өргөснөө олон нийтэд мэдээлэв.
Тэрээр номын айлдварын өмнө “Бодьсадвын явдалд орохуй” ном хичнээн чухал болохыг тайлбарлаад “Төвөдүүд болон Гималайн бүс нутгийн хүмүүс Жанрайсиг бурханы “Ум мани бадмэ хум” болон Дарь Эхийн “Ум дарэ дүдарэ дүрэ суха” хэмээх тарниудыг байнга уншдаг боловч үүн дээр нэмээд бусдыг энэрч хайрласан сайхан сэтгэлтэй байж, эцэстээ гэгээрэлд хүрэхийг хүссэн утга дүүрэн амьдралаар амьдрах хэрэгтэй” гэж айлдлаа.
"Өчигдөр ерөнхий номын айлдвар явагдсан, өнөөдөр би номын бүх шүлгийг уншиж энэхүү номын эш хүртээх болно."
Тэрээр номыг унших үедээ үе үе тайлбар хийж байлаа.
“Бодьсадвын явдалд орохуй” нь бодь сэтгэлийг төрүүлэх, оюун ухааныг хөгжүүлэх арга замуудын маш сайн гарын авлага юм. Би энэ номыг ширээн дээрээ байнга байлгаж, боломжтой үедээ уншдаг. Нэмж дурдахад, хоосон чанарын талаар суралцах сонирхолтой хүмүүст энэ номын есдүгээр бүлгийг судлавал илүү үр дүнтэй байх болно.”
“Наландагийн уламжлалыг дагагчид эрүүл мэнд, аз жаргалын аль алиныг нь бий болгодог саруул оюун ухааныг бий болгох арга замыг мэддэг. Бид Чухаг дээд гуравт аврал одуулах үедээ Бурхан Буддагийн хүрсэн гэгээрэлд ч бид хүрэх ёстой, үүний тулд бүхий л эрдэмд суралцах ёстой гэдгийг чухалчилах нь зүйтэй юм.”
“Зүрхэн судар”-ын тарни буюу “Гадэ гадэ бара гадэ барасам гадэ боди суха” гэх тарни нь гэгээрэлд хүрэх замыг дэс дараалан заадаг.”
“Бидний эцсийн зорилго бол гэгээрэлд хүрэх явдал бөгөөд түүнд хүрэхийн тулд бид аргын тал болох бодь сэтгэлийг төрүүлэх ба билгийн тал болох хоосон чанарыг ухаарсан билиг оюуныг төрүүлэх ёстой. Бид эдгээрийг санаж, насан туршдаа гэгээрлийн зам мөрийг дагахын төлөө хичээх хэрэгтэй.”
Дээрхийн Гэгээнтэн өглөө сэрэнгүүтээ бодь сэтгэлийн талаар эргэцүүлэн боддог гэж айлдлаа.
“Бодьсадвын явдалд орохуй” номын 3-р бүлэг нь нь бодь сэтгэлийн ач тустай чанаруудыг онцолсон байдаг.
Дээрхийн Гэгээнтэн номын үлдсэн хэсгийг тууштай уншиж, замдаа үе үе тайлбар хийв.
Есдүгээр бүлгийн эхэнд Дээрхийн Гэгээнтэн өмнөх бүлгүүдэд гарсан арга ухаанууд бүгд энэ бүлгийн гол сэдэв болох билиг оюуныг хөгжүүлэхэд туслах зорилготой гэдгийг тэмдэглэв. Есдүгээр бүлгийн хоёр дахь хэсэгт “билиг ухаан” гэдэг үгийг ашигласан нь хоёрдмол ойлголтыг илэрхийлдэг гэдгийг тэрээр тодруулсан юм.
Дээрхийн Гэгээнтэн номын эш хүртээж бүрэн уншиж дууссаны дараа үзэгч олондоо үүнийг уншиж, бодь сэтгэлийг бясалгах, хоосон чанарыг ойлгох үндэс болгон ашиглахыг уриалав.
Төгсгөлд нь Дээрхийн Гэгээнтэн,
"Бид маргааш дахин уулзах болно. Маргааш агуу нигүүлслийн биелэл болсон Жанрайсиг бурханы авшиг хүртээх болно.” хэмээлээ.
