Энэтхэг, Ладак, УТ, Лех, Шей - Ладакын муслим шашинтнуудын зохицуулалтын хороо өнөөдөр өглөө Дээрхийн Гэгээнтэн Далай Ламд хүндэтгэл үзүүлж, Шейн Шах-е-Хамдан дахь Масжид Шарифд хүлээн авлаа. Түүнийг суннит болон шиа шашны удирдагчид угтан авсны дараа нутгийн Имам мөргөл үйлдэв.
Үндсэн үйл ажиллагааны өмнө Дээрхийн Гэгээнтэн тус үйл ажиллагаа болох газрын ойролцоо 1382 онд баригдсан Масжид Шариф сүмд мөргөл үйлдэв. Дээрхийн Гэгээнтэн дараа нь янз бүрийн шашны бүлгүүдийн төлөөлөгчид, Ладакын Өөртөө Засах Хөгжлийн Тэргүүлэгчдийн Зөвлөлийн (LADHC) сонгогдсон удирдлага болон орон нутгийн муслим шашинт нийгэмлэгийн гишүүдээс бүрдсэн хурлын гишүүдэд мэндчилгээ дэвшүүлсэн юм.
Дээрхийн Гэгээнтэн тэдэнд хандан муслим шашинт ахан дүүстэйгээ уулзахдаа үргэлж баяртай байдаг гэлээ. Тэрээр зүүн хойд Төвөд дэх өөрийнх нь төрсөн газрын ойролцоо олон муслим шашинтнууд амьдардаг байсан тул муслим шашинтнуудын өдөр тутмын залбирлын хэв маягийг мэддэг байснаа дурсан ярив. Хүүхэд байхдаа түүний тоглодог найзуудын дунд олон мусульман хүүхдүүд байсан бөгөөд тэд хамтдаа эвтэй найртай тоглодог байсан талаар дурсан ярьсан юм.
"Хожим нь намайг Лхас хотод очиход төвөдүүд болон хотын багахан муслим шашинтнууд хоорондоо сайн, найрсаг харилцаатай байсан. Тэднийг Төвөдийн Засгийн газраас хүндэтгэж байгаагийн илэрхийлэл болгон тэмдэглэдэг бүх баяр наадамдаа оролцохыг урьдаг байсан юм. Ихэнх нь Энэтхэгээс бараа импортлодог худалдаачид байсан ч тэд гадаад ертөнцөөс мэдээ, мэдээлэл авчрахад бас нэгэн чухал үүрэг гүйцэтгэдэг байж билээ.”
“1954-1955 онд Хятадад очих үеэрээ би Мао дарга тэргүүтэй Хятадын хэд хэдэн удирдагчтай уулзсан юм. Төвөд рүү буцахын өмнө Мао даргатай хамгийн сүүлд уулзахад намайг шинжлэх ухаанч сэтгэлгээтэй гэж байсан. Тэр надад хэрхэн удирдах талаар зөвлөгөө өгч байсан ч сүүлдээ "шашин бол ард түмнийг мансууруулагч" гэж билээ.”
“Миний "шинжлэх ухаанч оюун ухаан" нь сэтгэл оюун, сэтгэл хөдлөлийн үйл ажиллагааны талаар эрдэмтэдтэй өргөн хүрээнд санал бодлоо солилцоход хүргэсэн юм.”
“Түүнчлэн буддын шашны лам хүний хувьд би санскрит болон пали уламжлалыг дагадаг бусад орны буддын шашинтнуудтай харилцах боломжтой болсон билээ.”
“Үнэндээ бид бүгд аз жаргалтай байж, утга учиртай амьдрахыг л хүсдэг. Нэмж хэлэхэд шашны янз бүрийн уламжлалууд философийн өөр өөр үзэл онолыг илэрхийлдэг ч нийтлэг зорилго нь өөрсдийн сүсэгтнүүдийг энэрэнгүй сайхан сэтгэлтэй болоход нь туслан дэмжих явдал билээ."
Дээрхийн Гэгээнтэн цааш нь айлдахдаа материаллаг зорилгод голчлон анхаардаг учраас орчин үеийн боловсрол нь сэтгэлийн амар амгаланг бий болгоход хангалтгүй гэв. Хэрэв орчин үеийн боловсролыг Энэтхэгийн эртний "каруна" -энэрэл нигүүлсэл ба "ахимса" -хор хөнөөл учруулахгүй байх гэдэг зарчмуудтай хослуулсан үед илүү бүрэн дүүрэн байх болно гэж тайлбарлалаа.
Махатма Ганди "ахимса"-г талаар хүч үл хэрэглэх үүднээс зааж байсан бөгөөд түүний энэхүү маргааныг шийдвэрлэх арга барилыг дэлхийн олон оронд баримталж ирсэн байна. Уур, айдас, атаархал зэргээс үүдэлтэй олон зөрчилдөөнийг бусдын төлөө энэрэн нигүүлсэх сэтгэлийг хөгжүүлснээр шийдэж болох юм.
Хэдэн зуун жилийн турш Ладакаас Аруначал Прадеш хүртэлх Гималайн бүс нутгийн ард түмэн Төвөдийн ард түмэнтэй оюун санааны нийтлэг уламжлал, энэрэл нигүүлслийн соёлыг хамтаар эзэмшиж ирсэн билээ. Энэ бол Наландагийн уламжлалаас үүдэлтэй буддын шашны гүн гүнзгий соёлоос үүссэн уламжлал юм. Бид бүгд үүнийг хадгалахын төлөө хичээж байна.”
Дээрхийн Гэгээнтэн Гималайн бүс нутгийн ард олны түүнд итгэж буй гүн гүнзгий итгэл найдварт сэтгэл нь хөдөлж байгаагаа илэрхийлэв.
Тэрээр,
"Төвөдийн ард түмэн 60 гаруй жилийн турш ихээхэн бэрхшээлтэй тулгарсан ч сэтгэлийн хүч няцаагүй бөгөөд өв соёлоо хадгалан үлдээж чадсан билээ."
Мөн Ладакт муслим болон буддын шашинтнууд хоорондоо ойр, эв найрамдалтай амьдарч байгаад гүнээ талархаж байгаагаа илэрхийлэв.
Төгсгөлд нь тэрээр Ладакийн ард түмэн түүний зүрх сэтгэлд эртнээс ойр байсан гэлээ.
