Энэтхэг, Бихар, Бодьгаяа - Дээрхийн Гэгээнтэн Далай Лам АНУ-ын Конгрессын Төлөөлөгчдийн танхимын дарга, эрхэм Кевин Маккартид болон Ардчилсан намын удирдагч, эрхэм хүндэт Хакеем Жеффрис нарыг тус тусын албан тушаалд томилогдох сонгуульд ялалт байгуулсанд нь баяр хүргэж, захидал илгээв.
Дээрхийн Гэгээнтэн Далай Лам:
"Ардчилал, хууль дээдлэх ёс зэрэг үндсэн үнэт зүйлсийг эрхэмлэн сахиулах үйлсээр нь би АНУ-г удаан хугацаанд хүндэтгэн биширч ирсэн билээ." “АНУ нь дэлхийн томоохон чөлөөт гүрний хувьд эдийн засгийн сорилт, нийгмийн асуудал, уур амьсгалын өөрчлөлтийг шийдвэрлэх замаар илүү тайван ертөнцийг бий болгоход онцгой хувь нэмэр оруулж чадна. АНУ бүх иргэддээ эрх чөлөө, боломжийг олгодог. Энэ нь тэдний итгэл найдварын гэрэл болсон юм."
“1979 оноос хойш би АНУ-д олон удаа зочлохдоо баяртай байсан бөгөөд таны өмнөх спикерүүд зэрэг олон удирдлагуудтай өргөн хүрээний асуудлаар санал бодлоо хуваалцах завшаан надад тохиосон юм. Надад итгэл, найдвар хүлээлгэдэг Төвөд дэх төвөд ард түмний төлөө санаа зовж буйгаа би тэдэнд уламжилж байсан билээ."
"Төвөдийн ард түмэн АНУ-аас хүлээн авсан хоёр намын өргөн хүрээний дэмжлэгт машид талархдаг. Бидний тэмцэл хүн төрөлхтөнд бүхэлд нь тустай энх тайван, хүчирхийлэлгүй, энэрэн нигүүлсэхүйн соёл болох эртний мэдлэг боловсролоо хадгалж, сурталчлахын зэрэгцээ ард түмэн маань нэр төртэй амьдрахын төлөөх тэмцэл юм."
“БНХАУ-ын нөхцөл байдал хувьсан өөрчлөгдөж байгаа бөгөөд энэ нь эерэг өөрчлөлт авчирна гэдэгт би итгэж байна. Үүний зэрэгцээ, Төвөд дэх Төвөдийн ард түмний тууштай байдал, сэтгэл санаа няцашгүй хэвээр байгааг дуулгахад таатай байна."
“Би өөрийнхөө амьдралд хүний үнэт зүйлийг сурталчлах, шашин хоорондын эв найрамдлыг дэмжих, Төвөдийн буддын шашны соёлыг хадгалах, Төвөдийн эмзэг байгаль орчныг хамгаалах, түүнчлэн эртний Энэтхэгийн оюун ухаан, сэтгэл хөдлөлийн үйл ажиллагааны талаарх ойлголтыг бий болгоход тууштай ажилладаг."
Тэрээр төгсгөлд нь "Америкийн ард түмний итгэл найдвар, хүсэл тэмүүллийг биелүүлж, илүү аз жаргалтай, амар амгалан дэлхийг бий болгоход хувь нэмрээ оруулах та бүхний хүчин чармайлтад амжилт хүсье" гэж хоёр удирдагчид хүсчээ.
