Энэтхэг, Бихар, Бодьгаяа - Тайваньд өчигдөр болсон ерөнхийлөгчийн сонгуулийн дараа Дээрхийн Гэгээнтэн Далай Лам шинээр сонгогдсон ерөнхийлөгч ноён Лай Чин-тэд захидал илгээж, халуун баяр хүргэв.
"Тайваньд болж өнгөрсөн ардчиллын хэрэгжилтийг ажиглах нь эрх чөлөө, нэр төртэй амьдрахыг эрмэлздэг бид бүгдэд урам зориг өгөх эх сурвалж болж байна." гэж бичжээ.
“Ардчилал хэрхэн бат бөх үндэс суурьтай болсоныг харах үедээ би Тайваньд зочилсон тухайгаа, танай ард түмний надад хэрхэн зочломтгой хандаж байсныг эргэн санахад сайхан байна. Тайваний ард түмэн цэцэглэн хөгжиж, хүчирхэг ардчиллыг бий болгоод зогсохгүй эдийн засаг, боловсролын салбарт асар их амжилт олж, үүний зэрэгцээ уламжлалт баялаг соёлоо хадгалан үлдээсэн ард түмэн билээ.”
“Тайванийн буддистууд Бурхан Багшийн номд чин сэтгэлээсээ ханддагийг би биширдэг. Би буддын шашны лам хүний хувьд тэдний хүсэл, сэтгэл оюуны зүг чигийг заахыг хичээдэг.”
“Тайвань, БНХАУ-ын хоорондын сайн харилцаа нэн чухал. Хэлэлцээр хийх нь орон нутгийн, үндэсний болон олон улсын түвшинд тулгамдсан асуудлуудыг шийдвэрлэх хамгийн сайн арга гэдэгт би удаан хугацааны турш итгэлтэй байдаг."
Дээрхийн Гэгээнтэн төгсгөлд нь ноён Лайд Тайваний ард түмний итгэл найдвар, хүсэл мөрөөдлийг биелүүлэхэд тулгарч буй сорилтуудыг даван туулахад нь амжилт хүсэв.
