Ванкувер, Канад — 2006 оны 9-р сарын 11 (CP)
Ням гарагт улс төрчид, тамирчид, бизнесийн тэргүүнүүд болон нийгмийн идэвхи зүтгэлтэнгүүд үзэл бодлын ялгаагаа түр хойш тавин нэгэн өрөөнд цугларан Дээрхийн гэгээн Далай ламтай уулзан шинэ санаа, санаачлага сонсон авч, асуулт асуулаа.
Энэ уулзалт нь Далай ламын Ванкуверт хийсэн гурван өдрийн айлчлалын сүүлийн арга хэмжээ бөгөөд түүний нэрэмжит боловсролын төвийг нээх зорилготой айлчлалын гол хэсэг байлаа.
“Өөрчлөлтийн төлөө хамтарах нь” хэмээх нэртэй энэхүү бага хуралд дэлхийн өнцөг булан бүрээс 100 гаруй хүн оролцсон бөгөөд тэдний дунд Канадын өмнөх ерөнхий сайд Ким Кэмпбелл, олимпийн медальт сэлүүрчин Силкен Лауманн нар багтжээ.
Уулзалтын гол зорилго нь нийгмийн янз бүрийн салбарын удирдагчид харилцан ярилцаж, ойлголцох боломжийг бүрдүүлэх явдал байсан ба хуралд оролцсон хүмүүсийг ихэвчлэн нийгмийн огт өөр орчин, түвшнээс ирсэн хүнтэй хамт суулгасан бөгөөд олон оролцогч энэхүү арга барил нь маш үр дүнтэй байсан хэмээн онцолжээ.
Калгари хотод төвтэй, канадын томоохон байгалын газ нийлүүлдэг Canadian Hunter Exploration компанийн хамтран байгуулагч Жим Грэйг Ванкуверыг Доунтаун Ийстсайд дахь гудамжны хүмүүсээс лааз, шил худалдан авдаг “United We Can” байгууллагын захирал, өмнө нь хар тамхины донтолттой байсан Кен Лиотьертэй хамтран суулгажээ.
Лиотьеэр эхний уулзалтад хэт дэгжин хувцасласан бизнесийн хүмүүсийн дунд өөрийгөө эвгүй мэдэрч орхин гарсан тул Грэйг түүнийг дэмжихийн тулд хотын хамгийн ядуу хороолол руу явж, лааз тушаадаг төвд нь очсон ба тэд хоёр цаг гаруй ярилцажээ.
“Зөвхөн сайн харилцан яриагаар л бид итгэлцэлийг бий болгож чадна” хэмээн Грэйг хэлээд, донтолтын асуудлын талаар илүү ихийг судалж мэдэхээр ирэх аравдугаар сард охиныхоо хамт дахин айлчлах бодолтой байгаагаа хэллээ.
Өөр нэг сонирхолтой хамтрагч нь олон улсын ой модны бүтээгдэхүүний Weyerhaeuser компанийн Канад дахь ахлах дэд ерөнхийлөгч асан Жорж Вайерхаузер болон Британийн Колумбийн хуучин ерөнхий сайд, нийгмийн идэвхтэн Майк Харкурт нарыг холбосон явдал байв.
Вайерхаузер саяхнаас Дэлхийн Бизнесийн Зөвлөлийн Тогтвортой Хөгжлийн хүрээнд “хөдөлгөөн” буюу хот доторх тээвэр, зорчих асуудлыг хариуцах үүргийг хүлээжээ. Харин Харкурт энэ асуудлыг нийгмийн идэвхтний байр сууринаас хэдэн жилийн турш судалж ирсэн байна.
“Би гэнэт л энэ асуудлыг нийгмийн өнцгөөс нь тэргүүлэх түвшинд судалсан хүнтэй шууд ярилцах боломжтой болсондоо баяртай байна” хэмээн Вайерхаузер сэтгэгдлээ илэрхийлэв.
Сонгогдсон оролцогчид Далай ламд асуулт тавих боломжтой байсан бөгөөд нэгэн оролцогчийн асуулт нь хувь хүн рүү чиглэсэн нийгэмд хүмүүс хэрхэн хариуцлагаа ухамсарлах талаар байв.
“Өөрийгөө бодож, өөртөө анхаарал тавина гэдэг бол бүрэн зөв зүйл, гэхдээ илүү сайн бодож, ухаарч чадвал хүн ямар ч чадвартай, хүчтэй байлаа гээд нийгэмгүйгээр бие даан амьдрана гэдэг боломжгүй зүйл” хэмээн Далай лам айлдлаа.
