Энэтхэг, Химачал Прадеш, Дарамсала, Тэгчин Чойлин – Дээрхийн гэгээн Далай лам бээр Бихар мужийн Ражгир хотод Наланда Их Сургуулийн цогцолбор шинээр байгуулагдсантай холбогдуулан Ерөнхий сайд Нарендра Модид баярын захидал илгээв.
Дээрхийн гэгээн захидалдаа, “Эрдэм мэдлэгийн төв болсон анхны Наланда Их Сургууль дорно зүгт нар мэт гэрэлтэж байжээ. Тус сургууль нарийн дэг бүхий судалгаа, хэлэлцүүлэг, мэтгэлцээнд суурилсан боловсронгуй, дэвшилтэт сургалтаараа Азидаа шагшигдаж, алс холоос оюутнуудыг татаж байв. Тус сургуулийн оюутнууд философи, задлан шинжлэх ухаан, математик, анагаах ухаанаас гадна эртний Энэтхэгийн хүч үл хэрэглэх, энэрэн нигүүлсэхүйн зарчимд тулгуурласан уламжлалт мэдлэгийг судалдаг байсан агаад тэдгээр нь орчин цагт ч нэн чухал хамаатай хэвээр байна.
Наландагийн оюутнууд энэ бүх сайхан чанараас гадна Энэтхэгийн уламжлалт бясалгалын аргаар сэтгэлийг тогтоох, аливааг гүнзгий эргэцүүлэх чадамж эзэмшиж, сэтгэл оюун, сэтгэл хөдлөлийн талаар танин мэдэж авдаг байв. Дээрх эрдэм, чадварыг логик, учир шалтгааны үүднээс таниулан сургадаг байсан Наландагийн сургалтын арга барилыг хүн төрөлхтний сайн сайхны төлөө орчин үеийн боловсролтой хялбархан найрсуулан хослуулж болно хэмээн би итгэдэг” хэмээн дурджээ.
Тэрбээр захидлынхаа төгсгөлд, “Энэтхэг төдийгүй бусад орны залуусын дунд эртний Энэтхэгийн мэдлэг, мэргэн ухааныг сонирхох явдал нэмэгдэж байгаад би их урамшиж байна. Дэлхий нийтийг илүү энэрэнгүй болгоход энэ нь ихээхэн хувь нэмэр оруулах юм. Эртний Энэтхэгийн гүн ухааны мэдлэгийг танин мэдэх сонирхлыг дээшлүүлэхийн төлөө тууштай зүтгэдэг хүний хувьд энэхүү түүхэн газарт шинээр Наланда Их Сургууль байгуулсан явдал нь үнэхээрийн бахдан сайшаалтай хэрэг билээ. Шинэ сургууль хөгжин цэцэглэж болтугай” гэжээ.
Орчуулсан Б.Ганчимэг
