Энэтхэг, Химачал Прадеш, Дарамсала, Тэгчин Чойлин хийд - Ерөнхий сайд асан Манмохан Сингх таалал төгссөн тухай мэдээг хүлээн авмагц, Дээрхийн гэгээн Далай лам түүний эхнэр хатагтай Гуршаран Каурт гүнээ эмгэнэл илэрхийлсэн захидал бичжээ.
"Танай гэр бүлд тохиолдсон уй гашууг хуваалцан гүн эмгэнэл илэрхийлье. Түүний хойноос би залбирна. Өнгөрсөн олон жилийн турш түүнтэй уулзаж байсан мөч бүрдээ би түүний бусдын төлөө гэсэн сэтгэлийг мэдэрч, үнэтэй зөвлөгөөг нь машид талархан хүлээж авдаг байлаа. Тэрбээр надад ах шиг минь дотно санагддаг байсан юм. Таны хань бусдад туслах хүсэл эрмэлзэлдээ хөтлөгдсөн хүн байсан билээ. Тэрбээр Энэтхэгийн хөгжил цэцэглэлт, ялангуяа эдийн засгийн өсөлтөд чухал хувь нэмэр оруулж, ард түмнийхээ хувь заяаг өөдөө залсан юм. Мөн тэрбээр төвөд үндэстний сайн анд нөхөр байв. Таны нөхөр 92 наслахдаа үнэхээр утга учиртай амьдрал туулж, бид бүгдэд үлгэр дуурайл болсонд нь талархан даган баясаж байна" хэмээн Дээрхийн гэгээн захидалдаа дурджээ.
